یاغیش اولماق ایسته ییرم، اورمو گؤلومه
یاغیش اولماق ایسته ییرم، اورمو گؤلومه
یازان: حسین واحدی
یاغیش یاغاندا، اوره ییم سیخیلاردی، دئمك اولار دونیا بیله مه دارالاردی، ندنی، گونش اولاندا فوتبال اویناماغا واخت تاپاردیق اولا بیلردی! نه یسه نه بیله یدیم بیر گون ائله بو یاغیش حسرت اولاجاقدیر بیزه! گونشه، دایان، آزجا یاغیش یاغماغا زامان وئر دئمك ایسته ییردیم، بولودلار قاچین گونش دایانیب، سیز یاغاسیز، آغلایین، واخت قورتولماقدادیر، آماندیر یاز – یای – گوز(güz) – قیش دئمه یین، آنجاق یاغیش یاغدیرین...
سئومك آنلامینی بو دویغولار منه وئردیلر. هئچ نه یی یارادانیمدان سونرا بو قدر سئوه بیلمه میشدیم، هئچ نه یی بو قدر دوشونمه میشدیم، هئچ نه یه بو قدر نیسگیل ائتمه میشدیم...
یارادانیم! سن، ایشیق وئرن كیتابیندا هر ندن چوخ، «من، باغیشلایان و یاخشیلیق ائده نم» دئییبسن و منده بونا اینانیرام، سن سونسوز سئوگیندن و اوجسوز – بیجاقسیز یاخشیلیغیندان بیزه باغیشلایاجاقسان، بیلیرم...
یاغمور، نه اولار دایانمادان، یاغ، بوتون كدریمی سن آلمالیسان، سئوگیمی منه قایتارمالیسان، جانیما جان قاتمالیسان...
یاراداینم، بولودلار، یاغمور، اینسانلار، یارانیش لار و بوتون جانلی و جانسیزلار دویون و آنلایین منیم اورمو گؤلومو...
یارادانیم؛ بوتون سئوگینله قورو سئوگیمی. یاغ یاغیش؛ هئچ دایانما، گؤلوم سنی گؤزله ییر. گونش؛ چیخما هئچ. بولودلار؛ یولو آچین، گلین یوردوما، آغلایین، اؤلو اورمو گؤلومه!!
آشنایى با زبان تركى خراسانى
كیتاب تانیتیمى (آشنایى با زبان تركى خراسانى)
حسین واحدى/ نئچه واخت بوندان قاباق، خوراسان توركلریندن اولان، عزیز اسماعیل سالاریان-ین وبلاگیندان، بیر دگرلى كیتاب ایله تانیش اولوب، اونو یازان ایله علاقه قوروب، كیتاب لار الیمه یئتیشدى. منیم اوچون خوراسان توركلرین دن بیلگى اله گتیرمك چوخ ماراقلى ایله دگرلى ایدى. بو كیتابین آدى «آشنایى با زبان تركى خراسانى» دیر. كیتاب، عزیز قارداشیم، اوستاد «جلال قلى زاده مزرجى» بگین الى ایله یازیلیب دیر.
قلى زاده جنابلارى، كیتابى ساده و آخارلى دیلده، آلتى بؤلومده یازیب دیر. ایلك بؤلوم ده، دیل ایله یازماغین ایلگیسیندن سؤز گئدیب. ایكینجى بؤلوم ایسه، تورك دیلینین كئچمیشى ایله خوراسان توركجه سیندن یازیلیب دیر. اوچونجو بولوم ده، ساده دیلده قایدالار آچیقلانیب دیر. دؤردونجو بؤلوم ده، سؤزجوك لر یئرلشیبلر. بئشینجى بولوم ده ایسه، ائیلملیك لر (مصادر) ایضاح ائدیلیب دیر. سون بولوم ده، خوراسان توركجه سینده اولان بعضى آتا-بابا سؤزلریندن اوخوجولار اوچون اؤرنك گتیریلیب دیر.
یئرى وار «قلى زاده» جنابلاریندان بو تایسیز و دگرلى ایشى اوچون اؤز تشككورومو بیلدیرب، بو عزیز قارداشیما اللرین وار اولسون دئیم. بو كیتابى، خوراسان دا، «دامینه» ایله «واسع» یایین ائولریندن، باشقا شهرلردن ایسه یازیچى ایله بیرباشا ایلگى قوروب، پست واسطه سیله، الده ائده بیلرسینیز.
قلى زاده جنابلارینین ایمیل ایله تئلفون سایى سى:
qolizadehmezerji@yahoo.com
09379081183
Urmiyə başqa baxışdan... اورمیه باشقا باخیشدان
شكیللر: حسین واحدى
şəkillər: Hüseyn vahidi
 |
اورمیه- (جامع) جمعه مسجدى |
تراختور-ون یئنى ماهنى سین یوكله یین
تراختور-ون یئنى ماهنى سین یوكله یین
گل-گل، محمد رضا رحیم پور-ون سسى ایله
Tiraxtur yığmasının yeni mahnısın yükləyin
oxuyan: Məhəmməd riza rəhim pur
  |
بو ماهنى نى همراه اول ده پیشواز آهنگ سئچمك اوچون ماهنى كودو:
- آدى: گل گل تراختور
- اوخویان: محمدرضا رحیم پور
- كد: 30362
اوشاق لاریمیز و آذربایجان ناغیل لاری
حسین واحدی
هامیمیزین اوشاق لیغیندا، ناغیل خاطیره لری واردیر و بؤیوك اولدوغوموزدادا او گون لری خاطیرلایاندا گؤزل دویغوسال آن لار (لحظه لر) یاشادیریق. او دؤوراندان الوان خاطیره لریمیز قالیر و بو خاطیره لرده او زامانین ناغیل لاریندان آلینیب دیر. عیبرتلی و فایدالی ناغیل لاریمیز ایندیده قولاق لاریمیزدا سسلنمكده دیر. آمما ایندیكی اوشاق لار بئلنچی ناغیل لاردان اوزاق قالیبلار.
آتا- آنالاریمیزدان اوشاق لیق لاریندان سوروشاندا، او زامانین تندیر داملاریندان، كورسو باشیندان و ناغیل سؤیله مه لریندن دئیه جكلر و او گون لردن سؤز آچماق دا، اونلارا یاخشی لحظه لر یارادیر.
چئشیتلی ائشیتملی آذربایجان ناغیل لاری، گئتدیكجه اونودولوب گئتمكده دیر و نسیلدن نسیله گلن او عیبرتلی ناغیل لار كولتوروموزون بیر بؤلومو اولاراق، اونودولوب گئدیرسه كولتوروموزده آرادان گئده جك دیر. ایندینین اوشاق لاری باتی (غرب) اؤلكه لرین ناغیل لارینین بیر- بیر آدلارین ساییب قهرمان لارین دئییرلر و بو ایش گئتدیكجه اوشاق لا اؤز كولتورونون آراسیندا آرا آچیب اؤزگه كولتورونه یاخینلیق دویغوسونو یاراداجاق دیر.
قاباقجالار عاییله نین بؤیوك آتا یوخسا آناسی، اوشاق لاری بیر یئره ییغیب اونلارا ناغیل سؤیله ردیلر. اوشاق ایسه او ناغیل لاردا اؤزونو ناغیلین قهرمان لارینین یئرینه قویوب درین بیر خییالا جوماردی. آنجاق بو ناغیل لار اؤزوموزون ایدیلر و قهرمان لاریدا بیزیم قهرمان لارییدیلار. زیرناچی ناغیلی، پیس پیسه لی پوسته خانیم، قوردون ناغیلی، گؤزل فاتما ایله ساری اینك، تولكو ایله قارغا، یالانچی چوبان، ... و مین لرجه بئله گؤزل ایله ائشیتملی ناغیل لاریمیز اؤز یئرلرین، بیزیم كولتوروموز ایله غریبه اولان و ساواشجیل باتی ناغیل لارینا وئریرلر.
تلویزیون ایله رادیودادا بو ناغیل لار اؤز یئرلرین ایتیریب لر و یئرلرینه یابانجی اؤلكه لرین كارتون لارین گونو گوندن داها چوخ یاییرلار. اوستانی شبكه لر بو قونودا اؤنملی رول اویناییرلار و آنا دیلیمیزده اولان ناغیل لارین كارتون لارین توركجه ده دوزلدیب اوشاق لاریمیزا گؤسترمكده كئچمیشدن قالان گؤزل ناغیل لاریمیزیدا دیری ساخلایا بیله جكلر.
آتا- آنالار ایسه بو ناغیل لار ایله تانیش اولوب اونلاری گله جك نسیل لره تاپشیرمالیدیرلار. بونلارین یانیندا اوشاق لار باخچالاری ( مهد كودك لری) داها مهم نقش ایفا ائدیرلر. اوشاقلارین چوخو اوشاق واختی بو یئره گئدیرلر و اورادا رسمی دیلیمیزین یانیندا اوشاق لارین آنا دیللرینین دیری قالماسی و كئچمیشدن قالان كولتوروموزو دیری ساخلامالیدیرلار و فایدالی و تجروبه لی آذربایجان ناغیل لارین سؤیله مكله گله جك نسیل لره بؤیوك قوللوق ائده بیلرلر.
ناغیل لاردا ایسلامی و ایرانی (هر بولگه ده اؤز دیل لرییله) كولتوروموزه یئر آییریب بو روحیه نی اوشاق لارا وئرمه لییك. ناغیل عؤمور وار كن اوشاغین ذهنینده قالیر و اوشاق اؤزون او ناغیل لار ایچینده یاشادیر. چوخلو اوشاق لار نصیحتدن قاچارلار و بونا گؤره چوخلو سؤزلری ائله بو ناغیل لارلا اوشاق لارا دئیه بیله ریك و اوشاغا نصیحتیده ناغیل عونوانیندا چاتدیرا بیله ریك.
اینسان اوغلو، ائشیدیرسنمى؟
اینسان اوغلو، ائشیدیرسنمى؟
یازان: حسین واحدى
اى اینسان اوغلو، نه ائدیرسن، نه یى دوشونورسن؟ نه یى كیمه وئرمك ایسته ییرسن؟ نه یى كیمدن آلیرسان؟ اؤزونه دؤن، اینسان اول! اینسان یاشا! آدینى اینسان قویوبسان، باریشى ایسه یالنیز كاغیذ اوسته یازیرسان!
بورا فلسطین دیر، گؤزل بیر اؤلكه، باریش ایسته ییر، اینسان اوغلو گؤروسنمى؟ بورا ایسه قاراباغ دیر. جننتین بیر بوجاغى. یئنیدن چیچكلنمك ایسته ییر. اؤز وارلیغى آذربایجان لا، بیرگه یاشاماق ایسته ییر، اینسان اوغلو سورگون لرى گؤرورسنمى؟ كؤرپه لرى، یاشلى لارى، قادین لارى،گؤرورسنمى؟
بورا عیراق دیر، بورا، افغانستان، بورا كئشمیر، بورا آفریقا، بورا اورتا دوغو، بورا دونیا دیر. اینسان لار باریش ایچینده یاشاماق ایسته ییرلر. اینسان اوغلو آنلاییرسانمى؟
