عسگرین فیکیرلری (حیکایه)
عسگرین فیکیرلری
یازار: آلئکساندر قرین
حاضیرلایان: حسین واحدی
بوتون گئجه‌نی گؤزومو یوممامیشدیم.
سؤزون دوزو، قورخموردوم، آنجاق ایندییه‌دک سنگرده دالدالانیب اوزونو گؤرمه‌دیییم دوشمنله آتیشماقدان بوس‌بوتون فرقلی اولان، اونونلا بیرباشا اوز-اوزه گله‌جه‌ییمی دوشوننده بَرک هیجانلانیردیم.
ایندی‌دن او آنلاردا هانسی دویغولاری کئچیره‌جه‌ییمی بیلمَک ایسته‌ییردیم...
بودور، تنگ‌نفس، توفنگیمین اوجونا برکیتدیییم سونگونو [سرنیزه‌نی] ایره‌لی یؤنه‌لدیب، منیمکی کیمی ایتی سونگوسونو اوستومه توشلایا‌راق قاچیب گلن دوشمنه ساری جومورام... بیز قارشیلاشیب توققوشوروق...
آنجاق منیم یازیق تخیّلومو بوندان او یانا گئده بیلمیر، اوره‌ییم ایسه آنلاشیلمازلیق ایچینده قالیب سیخیلیردی.
هاوا ایشیق‌لاناندا های-کویلو دؤیوش حاضرلیغی باشا چاتدی و بیز بوینوزلاشاجاغیمیز آنین گلیب چیخاجاغینی گؤزلمه‌یه باشلادیق.
اؤنجه سیرا‌لاریمیزی دوزلدیب، سنگرده دالدا‌لانا‌راق دوشمنله آتیشدیق، داها سونرا بیزیم توپلار دوشمنی مرمی یاغیشینا توتاندان سونرا، دوشمن سنگرلرینه سونگو ایله هجوم ائله‌مک امری وئریلدی.
بیز سنگردن چیخیب قارماقاریشیق «اورا!» قیشقیریق‌لاری ایله کلکؤتور چؤللوکله تول‌لانا-تول‌لانا ایره‌لییه جومدوق.
قارشیدان گوجلو کولک اسیردی؛ اوستوموزه یاغان گوللـه‌لرین فیت سسی کوله‌یین ویییلتی‌سینا قاریشمیشدی.
من دینمزجه آلمان دؤیوشچولری‌نین دالدالاندیغی سنگره ساری قاچیر، ایندیجه اؤلدوروله‌جه‌ییمی گؤزله‌ییردیم.
چوخ برک عصب سارسینتی‌سی کئچیردیییم‌دن بوتون بدنیم تیتره‌ییردی. ائله بو واخت چوخ عجایب بیر ایش اولدو...
بیردن منه ائله گلدی، اؤز ایرادمین عکسینه اولا‌راق، بیر آنلیغینا دایاندیم و آز سونرا بوتون بدنیمده سببینی بیلمه‌دیییم بیر یونگوللوک دویا‌راق یئنی‌دن ایره‌لییه قاچماغا باشلادیم.
آزجا اؤنده قاچان بیر عسگر منه چوخ تانیش گلدییین‌دن، بوتون دقت‌یمی اونا یؤنلتدیم.
بو عسگرین پاپاغی، کوره‌یی، چکمه‌لری، قاچیش طرزی، بیر سؤزله گؤرکَمی و داورانیش‌لاری چوخ تانیش گلیردی و من دئیه‌سن، بو عسگری چوخدان تانیییردیم؛ اؤزومو عسگره یئتیریب اونون اوزونه باخدیم؛ بو، منیم اوزوم ایدی؛ هه، من، فوق‌العاده درجه‌ده گولوو عصب گرگین‌لییی کئچیردیییم‌دن، اؤزومو قیراقدان گؤرمه‌یه باشلامیشدیم؛ ائله بیله‌سن، کیملیییم ایکییه بؤلونموشدو، آنجاق من اؤز عادی منیمله بو، عسگر منیم آراسینداکی قیریلماز علاقه‌نی ده گؤروردوم.
منیم عسگر کیملیییم عدی کیملیییم‌دن آرالانیب، آرتیق منیم ایسته‌ییم‌دن آسیلی اولمایا‌راق، قاچماقدا ایدی.
بو روانی لحظه منده آرتیق کیملیییمین بوس‌بوتون ایکی‌لییی توهّمونو یاراتمیشدی.
بئله‌لیکله ده، من قیراقدان اؤزومه باخیردیم و –نه گیزله‌دیم!– بو آندا، ال‌به‌یاخا ساواشا گیریشدیییم سولغون اوزلو، چوخ چئویک [زیرنگ] و عاغیللا حرکت ائله‌ین آلمان عسگری‌نین منی اؤلدوره بیله‌جه‌یین‌دن قورخدوم.
بو آندا ائکیز [دوغولو] تاییما چئوریلمیش دؤیوشچو فانیکووون منیم، عاغیللی و ایراده‌لی اولان کیملیییمین اشتراکی اولما‌دان، نئجه باجاریق‌سیز و ناشی‌لیقلا ساواشدیغینی گؤروردوم؛ منیم بیرینجی کیملیییم یالنیز مئکانیکی اولا‌راق بدنیمی حرکت ائله‌تدیریردی و بو واخت آز قالا ایکی دفعه آلمان سونگوسو ایکینجی فانیکووو دئشیب کئچه‌جکدی، اوندا آنلادیم:
من ایندیجه ایکینجی فانیکوولا بیرلشمه‌سم و اونون ضربه‌لرینی شعورلو شکله سالماسام، اوندا منیم بیرینجی و ایکینجی کیملیییمین هر ایکی‌سی محو اولا‌جاقدیر.
من بوتون ایراده‌می توپلاییب بونو ائله‌یه بیلدیم، آنجاق بونو نئجه ائله‌یه بیلدیییمی سؤزله آنلادا بیلمیره‌م.
او آندان باشلایا‌راق منیم قولوما گوج گلدی، حرکت‌لَریم چئویک‌لَشدی و من او آنداجا قارشیمداکی دوشمه‌نین ضعیف یئرلرینی گؤرمه‌یه باشلادیم، بیردن یالاندان سَندیرله‌ییب [تعادلومو پوزوب] اونو چاشدیرا دا بیلدیم، بیر آنلیغینا دیزی اوسته چؤکوب سونگونو اونون آیاغینا سانجدیم.
آمانسیز آغری دویان آلمان دؤیوشچوسو، بیر آنلیق، کؤکسونو [اوره‌یینین باشینی] قوروماغی اونوتدو؛ من ایسه، بو بیر آندان یارارلانیب سونگونو اونون کؤکسونه سانجماغا ماجال تاپا بیلدیم.
بیزیم اونونلا ساواشیمیز چوخ اوزاندیغیندان، دؤیوش یولداش‌لاریم دوشمنی قووا‌راق اوزاقلاشمیشدی‌لار؛ من آلمان دؤیوشچوسونو اؤلدورندن سونرا قاچا‌راق اؤزومو اونلارا چاتدیردیم و دوشوندوم:
«من ایندی "اؤزون‌دن چیخماق" دئییمی‌نین نه دئمک اولدوغونو آنلاییرام... بو چوخ قورخونج ایمیش!»
قایناق: kultura
