عسگرین فیکیرلری (حیکایه)
عسگرین فیکیرلری
یازار: آلئکساندر قرین
حاضیرلایان: حسین واحدی
بوتون گئجه‌نی گؤزومو یوممامیشدیم.
سؤزون دوزو، قورخموردوم، آنجاق ایندییه‌دک سنگرده دالدالانیب اوزونو گؤرمه‌دیییم دوشمنله آتیشماقدان بوس‌بوتون فرقلی اولان، اونونلا بیرباشا اوز-اوزه گله‌جه‌ییمی دوشوننده بَرک هیجانلانیردیم.
ایندی‌دن او آنلاردا هانسی دویغولاری کئچیره‌جه‌ییمی بیلمَک ایسته‌ییردیم...
بودور، تنگ‌نفس، توفنگیمین اوجونا برکیتدیییم سونگونو [سرنیزه‌نی] ایره‌لی یؤنه‌لدیب، منیمکی کیمی ایتی سونگوسونو اوستومه توشلایا‌راق قاچیب گلن دوشمنه ساری جومورام... بیز قارشیلاشیب توققوشوروق...
آنجاق منیم یازیق تخیّلومو بوندان او یانا گئده بیلمیر، اوره‌ییم ایسه آنلاشیلمازلیق ایچینده قالیب سیخیلیردی.
هاوا ایشیق‌لاناندا های-کویلو دؤیوش حاضرلیغی باشا چاتدی و بیز بوینوزلاشاجاغیمیز آنین گلیب چیخاجاغینی گؤزلمه‌یه باشلادیق.
اؤنجه سیرا‌لاریمیزی دوزلدیب، سنگرده دالدا‌لانا‌راق دوشمنله آتیشدیق، داها سونرا بیزیم توپلار دوشمنی مرمی یاغیشینا توتاندان سونرا، دوشمن سنگرلرینه سونگو ایله هجوم ائله‌مک امری وئریلدی.
آنتون چئخوو ایله یادیگارلیق شکیل
آنتون چئخوو ایله یادیگارلیق شکیل
یازان: حسین واحدی
بیلگی‌سایار ایکی دفعه دینق-دینق
ائتمکله، بیلدیم یئنه ده بیر ساعات قورتولدو. مانیتورون قیراغینداکی ساعاتا
باخدیم. گئجه ساعات بیر ایدی. کؤچورمه هله یاری اولمامیشدی. “دیل بلاسی*”
منه، ” گؤز بلاسی” اولموشدو.
بیری یوخدو دئسین، گئجه‌نین بو واختیندا سن فیلان سایت‌دان بو حیکایه‌نی گؤرمه‌سیدن نه اولاردی؟، _ اؤز- اؤزمله دئدیم.
آنجاق حیکایه دونیامیزا یئنی بیر حیکایه آرتیریم دئیه دایانمادان آنتون
چئخوون اون ایللرجه بوندان اؤنجه یازدیغی حیکایه‌سینی حاضیرلاییب
قورتارماغا ماراقلی ایدیم.
کؤرپه‌لرده یوخو رئژیمی ساغلام اینکیشافین آچاری‌دیر
کؤرپه‌لرده یوخو رئژیمی ساغلام اینکیشافین آچاری‌دیر
حاضیرلایان: حسن واحدی
کؤرپه [نوزاد] بؤیودن عائله‌لرین یاشادیغی ان اهمیت‌لی چتینلیك‌لردن بیری، کؤرپه‌لری‌نین اوزون مدت قایدایا دوشمه‌ین گئجه یوخولاری‌دیر. دیلیمیزه یئرلشن "کؤرپه‌لر کیمی یاتماق" دئییمینه قارشی، کؤرپه‌لرین درین و کسیلمز بیر گئجه یوخوسونا گئتمه‌لری آنا-آتا‌لار اوچون چوخ واخت خیال‌دان او طرفه کئچمیر.
اوشاق ساعت 22.00 'ده ان درین یوخوسوندا اولما‌لی‌دیر!
اوشاق‌لارین یوخویا اولان احتیاج‌لاری و یوخو مدت‌لری بؤیومه دؤورلرینه گؤره دییشر. یئنی دوغولان دؤور، ان چوخ یوخویا احتیاجی اولان دؤوردور. یئنی دوغولان کؤرپه‌نین یوخوسو 18-20 ساعتا قدر چاتا بیلر. بؤیودوکجه قاوراما حیسسی اینکیشاف ائدن اوشاغین، یوخو مدتی ده قیسالاجاقتیر. بؤیومه هورمونو ساعت 22.00 اطرافیندا ان یوکسک سویه‌لره چاتا‌جاق. بو سببله اوشاق هانسی یاشدا اولورسا اولسون، بو ساعت‌لاردا درین یوخودا اولما‌لی‌دیر.
قهرمان
قهرمان
یازان: حسین واحدی
قهرمان، دونیایا گؤز آچیب، تئز بویا-باشا چاتیب، گئجه-گوندوز چالیشاراق، قهرمان اولدو. او، ایلده نئچه سئری مختلف مسابقه‌لرده قهرمانلیق كاپینی باشی اوسته آپاریب، اؤلكه‌سی ایله خالقینی باش اوجا ائتدی.
قهرمان یاشاییش بویو یالنیز قالیب اورك‌سؤزونو دئمه‌یه كیمسه‌نی تاپا بیلمه‌دی. او، سس‌سیز بیر گئجه‌نین قارانلیغیندا دونیا ایله ساغوللاشیب گئتدی!
ایندی ایسه، هامی قهرمان-قهرمان دئییب اونون آدینی دیری ساخلاماغا چالیشیر!!
-----------------------------------------------------------------------
بو حیكایه جیك همشهری ده (91/11/25) سایی 5908ده چاپ اولوبدور. دئمه لییم هرگون غربی آذربایجان همشهری سینده بیر توركجه حیكایه جیك چاپ اولور
تاپماجالار
تاپماجالار
حاضیرلایان:
حسین واحدی
ادبیاتیمیزین ان
ماراقلی بؤلوملریندن بیری، تاپماجالاردیر. ائلیمیز، بیر-بیرینین بیلگیسین اؤلچمك
ایله مشغول اولدوقلاری اوچون بیر- بیره تاپماجا دئیه رلر. آشاغیدا سیز عزیز
اوخوجولاریمیز اوچون نئچه تاپماجانی گتیرمیشیك. اونلاری اوخویوب، جاواب لارینی
دوشونون. بیلمه دیگینیز زامان، جاوابلارا باخین.
1ـ آرابا گئدر ایزی یوخ، یانار، یانار، كؤزو یوخ؟
2ـ چؤلده داغدی، پامبیق لیقدا آغدی، ائوه گلر، سویا دؤنر؟
3ـ بیری گئدر گلمز، بیری یاتار دورماز؟
4ـ او نه دیر، ایشیغی وار، ایستی سی یوخ؟
5ـ آغاجین توتماق اولماز، عطیریندن دویماق اولماز؟
6ـ بیر تندیریم وار، ایكی چؤرك توتور؟
7ـ بیر دامیم وار، تك دیركلی؟
8ـ گوندوز یاتار یووادا، گئجه گزر، اوبادا؟
9ـ نه ائوده دی، نه چؤلده، نه یئرده دی، نه گؤی ده؟
10ـ او نه دی، یئتمیش ایكی دیل بیلیر؟
11. الیم ایله اكه رم، دیلیم ایله بیچه رم؟
12. آخشام آچیلار، سحر ییغیلار؟
13ـ آچماز، اوچماز، یئره دوشسه، بئلی سینماز؟
14ـ بیر دامیم وار، قاپیسی یوخ؟
15ـ من گئدیرم، اودا گئدیر؟
تاپماجالارین جاوابی، یازینین آردیندا
كورسو باشی لارینی ایندیده یارادا بیله ریك
 | |||
| |||
كورسو باشی لارینی ایندیده یارادا بیله ریك
بایرام گلیر
یاز گلیر، ائلیمیزه نغمه گلیر، ساز گلیر...
كئچمیشلرده، بایرام لاردا، شنلیكلرده و گئجه اوتورمالاریندا، ائل- اوبامیز، بیر یئره ییغیشیب، بیرلیكده، بایاتی لار، ناغیل لار، تاپماجالار ... سؤیله ییب، زامان كئچیرَرمیشلر. قدیم لرده، ایندیكینه تای، رادیو- تلویزیون، بیلگی سایار، اینترنت دن، ... خبر یوخویدو. آخشام اولدوقدا قهوه خانالاردان آشیق لارین سازلارینین سسی، گؤزل داستان لاری ایله بیرگه خاطیره لی چاغلار یاراداردیلار. ائولرده اوشاقلی- بؤیوكلو صمیمیت له، بیر- بیرلری ایله دانیشیب، یاشاییش لاریندان لذت آپاراردیلار.
بؤیوكلر، اوشاقلارا، كئچمیش دن، تاریخ دن سؤیله ییب، عیبرتلی ناغیل لار ایله حیكایه لر دئیردیلر. یاشلی لارین چوخو ایندیده او، یاددان چیخمایان كورسو باشی لارینین خاطیر ه لرینی، ایندینین بوتون ایمكانلاری ایله دگیشمزلر.
كورسو باشی، بیزیم فولكلوروموزدا اؤزونه مخصوص بیر یئری واردیر. بیر یئره ییغیشماقلار، اویونلار، دانیشیق لار و.... هر زامان قالارگی اولوب لار.
ایندیكی چاخیمیزدا، آخشام اولدوقدا، ائولرین چوخوندا، آتا، تلویزیونون خبرلرین ایزله ییر. آنا، ائوینه، اؤزونه نه آلیب، نه قالیری دوشونور. اوشاق ایسه، بیلگی سایاردا اویون اویناییر! نه كئچمیش دن خبر وار، نه تاریخ دن، نه فولكلوردان!
كؤرپه لر، اؤز لای-لای لاریمیزی ائشیتمك یئرینه، چین لی لرین، جور به جور سسلی اویونجاقلاری ایله اویناییب و یاتیرلار!
اوشاق لار اؤز حماسی و آدلیم قهرمان لاریمیزین آدلارین بیلمه دن، اؤزگه لرین كارتون لار ایله فیلم ایله بوی آتیرلار. مدرسه چانتالاری، دفترلری و ... خاریجی كارتون لارین شخصیت لرینین شكیل لری ایله دولوبدور! بیزیم اؤز كولتوروموز یوخدورمو؟ ، سوالی هئچ كیمین دوشونجه سینه گلمیر، ائله بیل؟!
زامانی دالی قایتارا بیلمه سك ده، اؤز كولتور ایله دب لریمیزی ساخلاماغا و گله جك نسیل لره تاپشیرماغی هر زامان ائده بیله ریك. كورسو باشی لارینی، ایندی ده یاراتماق اولار، ائولره شنلیك، صفا و صمیمیتی ایندی ده، قاتا بیله ریك. اؤز كولتوروموزو، دب لریمیزی، عادت- عنعنه لریمیزی ایندیده یاشادا بیله ریك.
بو گؤزل گونلرده، بیرده قاییدیب اوشاق اولاردیم یئرینه، اوشاق لیغیمیزی ایندی یه گتیرك!
یازان: حسین واحدیشكیل: Mehr
سئوگیلیم
سئوگیلیم
گئجه-گوندوزوم، جانیم- اؤزوم، سئوگیم- سؤزوم، اونوتمارام سنی، هئچ آن سیلمه یه جم آدینی اوره ییمدن، گتیر مه یه جم باشقاسینین آدینی دیلیمه، قویمایاجام بیری گیرسین اوره ییمه، سون نفسیم قالانا قدر آدین قالاجاق دیلیمده، حتتا اؤلندن سونرا بئله یازدیراجام گؤزل آدینی كفنیمه، دویسون اینسانلار، ائشیتسین بوتون سئوگیلیلر، من سئوگیلیمی سئویرم، اونو اونوتماق ایسته میرم، اونوتمایاجام، اونسوز آن لاری آتاجام، آنیلاریما هر زمان آدینی قاتاجام، سسی نی دویاجام، آجیلارینا قاتیلاجام، اؤزو بئله بیلمه دن جیسمینده كی روحو اولاجام.
یازان: حسین واحدی
چیلله گئجه سی..
«چیلله گئجه سی» سنی گؤزله ییریك!
آی چیلله چیلله قارداش آتین قمچی‌له قارداش
بیر گلدین دانیشمادیق قلبیم آچیلا قارداش
آذربایجانین ان گؤزل و سئوملی دب لریندن بیری «چیلله گئجه سی»-دیر. چیلله گئجه سی ان قدیم دبلریمیزدن دیر. بؤیوكلو-كیچیكلی بو گئجه نی سئویب، ائلین لاپ بؤیوگو اولانین ائوینه ییغیشیرلار. چیلله گئجه سینده حالوا، میلاق،بادام، باسلیق، جئویز-كیشمیش، قارپیز و... اؤزلرینه مخصوص یئرلری واردیر. كئچمیش ده، ایندیكی ایمكانلارین اولمادیغی اوچون و گئت-گلین چتینلیغینه گؤره، یای مئیوه لرین، خوصوصی ایله قارپیزی، سامانلیقدا و سرین یئرلرده ساخلایاردیلار.
چیلله گونو، «چیلله لیك آلماق» ایسه گؤزل دبلردن دیر. چیلله گئجه‌سی اوغلان ائویندن آداخلی قیزا چیلله‌لیك گؤندریلر، دئمه‌لی چیلله گئجه‌سینه عایید یئمكلر او جمله‌دن: پشمك، قوووت، حالوا، قورو یئمیشلر، نار و ان واجیب اولان چیلله قارپیزینی (عموما بزه‌یه رك)، بیر خونچادا توپلانیب، آخشام باشی قیز ائوینه گؤندریلر. ائولندیكدن سونرا دا بیر نئچه ایل قیز گلینه چیلله‌لیك گئدر، آمما بو دؤنه خونچا اوغلان ائویندن دئییل، قیز ائویندن گؤندریلر. قیزین آتا-آناسینا گؤره بو هدیه‌لر اوغلان ائوی یانیندا قیزلارینین باش اوجالیغی ساییلیر.
كئچمیش لرده بو دب لر تشریفات دان اوزاق اولاراق داها چوخ صمیمت لرله قورولاردی. كورسو باشینا توپلانیب، قدیم ناغیللاریمیز دئییلردی. تاپماجا سؤیله مك، بایاتی دئمك ایسه بو گئجه نین اونودولماز ایشلریندن اولاردی. آمما تأسوفله ایندی او گونلردن فقط بیر قورو آد قالماق دادیر. بعضی لری بؤیوك ائوینه گئدیر، بعضی لری ایسه ائوده اؤز عاییله سینین یانیندا قالماغی خوشلاییر. بیر یئره ییغیشماق داها خوش و سئویملیدیر. قوهوم لار بیر-بیرینی گؤروب، كوسولو اولانلار ایسه باریشیب، بؤیوگ ایسه یوخلانیلیر. تشریفادان اوزاق دوشسك بو قدیم دب خاطیره لی اولوب، كولتوروموزده دیری قالاجاق دیر. ائوده اوتوروب تلویزیون لا مشغول اولوب چیلله گئجه سی كئچیرتمكدن «چیلله گئجه سی» چیخماز. بیر آزجا اوره ییمیزی گئنیش لندیریب، تشریفاتی قیراغا قویساق، ساده یئمك لر ایله ده چیلله گئجه سینی توتا بیله ریك.
گؤزل گونلر بیزی گؤزله ییر. قالیب بیز دونیانی نجور توتاق. چیلله سنی گؤزله ییرم. سنین گلمه گینله ائلیمیزه شنلیك گله جك دیر... تئز گل!
یازان: حسین واحدی
