آنتون چئخوو ایله یادیگارلیق شکیل
آنتون چئخوو ایله یادیگارلیق شکیل
یازان: حسین واحدی
بیلگی‌سایار ایکی دفعه دینق-دینق
ائتمکله، بیلدیم یئنه ده بیر ساعات قورتولدو. مانیتورون قیراغینداکی ساعاتا
باخدیم. گئجه ساعات بیر ایدی. کؤچورمه هله یاری اولمامیشدی. “دیل بلاسی*”
منه، ” گؤز بلاسی” اولموشدو.
بیری یوخدو دئسین، گئجه‌نین بو واختیندا سن فیلان سایت‌دان بو حیکایه‌نی گؤرمه‌سیدن نه اولاردی؟، _ اؤز- اؤزمله دئدیم.
آنجاق حیکایه دونیامیزا یئنی بیر حیکایه آرتیریم دئیه دایانمادان آنتون
چئخوون اون ایللرجه بوندان اؤنجه یازدیغی حیکایه‌سینی حاضیرلاییب
قورتارماغا ماراقلی ایدیم.
اۆزۆک ÜZÜK
اۆزۆک
یازار:
کنوت هامسون Knut Hamsun
حاضیرلایان:
حسین واحدی Hüseyn Vahidi
بیر دفعه قوناقلیقدا اولدوغوموز زامان اونون چؤهره‌سینده یئنیجه عشقه دوشموش گنج قادینین جیزگی‌لرینی گؤردوم. ماوی گؤزلری اوّل‌لر اولمادیغی کیمی پاریلداییر و اؤز حس‌لرینی هئچ جور گیزله‌ده بیلمیردی. او، کیمی سئویر آخی؟ دئیه‌سن بایاق پنجره قارشی‌سیندا دایانان گنج جئنتلمنی- أینینه موندیر گئیینمیش، سسی آسلان نریلتی‌سینه بنزه‌ین مالک اوغلونو. آمان آللاه، قادینین گؤزلری گنج اوغلانا ائله بیر محبت‌له باخیردی …
آخشام ائوه قاییدارکن اونون خاصیتینه یاخشی بلد اولدوغومو نظره آلا‌راق دئدیم:
- نئجه آیدین، معجزه‌وی [مؤعجوزه‌وی] هاوا وار. بو گون ماراقلی کئچدی، هه؟
ایلیاس / حیکایه
ایلیاس
یازار: لئو تولستوی
کؤچورن: حسین واحدی
اوفا بؤلگه‌سینده،
ایلیاس آدلی بیر باشقیرد یاشاییردی. اونو ائولندیرن‌دن بیر ایل سونرا آتاسی وفات
ائله‌دی. او واخت مال-حئیوان‌دان ایلیاسین 7 مادیانی، 2 اینه‌یی و 20 قویونو وار
ایدی. بیر مولک صاحبی کیمی ایلیاس ثروت توپلاماغا گیریشدی: صاباح‌دان آخشاما قدر
آروادییلا مین بیر زحمته قات‌لاشدی، هر کس‌دن ائرکن اویانیب، هامی‌دان سونرا
یاتاغا گیردیگی اوچون ایلدن-ایله زنگین‌لشدی. دوز 35 ایل اذیت چکن ایلیاس، ان سونوندا،
بؤیوک وار-دؤولت قازاندی. آت‌لاری‌نین سایی 200-ه، ایری بوینوزلو حئیوان‌لاری‌نین
سایی 150-یه، قویون‌لاری‌نین سایی ایسه 1200-ه چاتدی. نؤکر-نایب‌لری اونون ایلخی و
سورولرینی اوتاریر، قاراواش‌لاری ایسه مادیان‌لارینی و اینک‌لرینی ساغیر، سودون‌دن
کومیس[ایشمه‌لی
آدی]، پنیر و یاغ حاضیرلاییردی‌لار.
ایلیاسین مالی، ثروتی باشین‌دان آشیردی. بوتون ماحال جاماعاتی اونا حسد آپاریردی.
حاقیندا دئییردیلر: "ایلیاس بخته‌ور آدام‌دیر. بو جور وارلی-حال‌لی بیری‌سینه هئچ
اؤلوم ده یاخین دوشمز".
نفوذلو اینسان‌لار دا ایلیاسین سسینی-سوراغینی آلیب، اونونلا دوستلوق قورماغا جان آتیردی‌لار. چوخ-چوخ اوزاق‌لاردان قاپی‌سینا قوناق‌لار گلیردی. ایلیاس ایسه اونلارین هامی‌سینی خوش قارشیلاییر، یئدیریب-ایچیریردی. قاپی‌سینا گلن هر کسین قاباغینا کومیس، چای، شئربا (پولو تمیزلنمه‌میش خیردا بالیق‌لاردان بیشیریلن شوربا نؤوو اولماقلا، تاتار و باشقیرد مطبخی‌نین تامی‌دیر - آ.ی.) و قویون اتی قویولوردو. حیه‌طه قوناق‌لار گیرن کیمی ال‌اوستو بیر-ایکی قویون، قوناق-قارا لاپ چوخ اولاندا ایسه آت کسیلیردی.
