حكایه‌جیك‌لر
حكایه‌جیك‌لر/ حسین واحدی
شانس‌سیز اوغرو
گئجه‌نین لاپ او شیرین یوخو گلن زامانی، دووارین یاپیشیغینداكی آغاجدان دیرماشیب ائوین حیطینه آتیلدی. سینه-سینه ائوه ساری گئدیب، الین یاپیشاجاغا آتیب قاپینین آچیق اولدوغونو گؤروب، سئویندی!
ایچه‌ری گیرنده، بیر كیشی‌نین اوتاقدا یوخودا اولدوغونو گؤردو. آیین ایچه‌ری‌یه دوشن ایشیغیندا ائوی آلت-اوست ائتدی، آما آپارماق اوچون درده ده‌ین بیر زاد تاپا بیلمه‌دی. اومودو پوزولوب قاچماق ایسته‌دیگی آن، ائو ییه‌سی یوخولو-یوخولو، “آی باشی داشلی اوغرو گون ایشیغیندا من بو ائوده بیرزاد تاپا بیلمیرم، سن، آی ایشیغیندا تاپماق ایسته‌ییرسن؟” دئییب، یورقانی تپه‌سینه چكدی!
گونش ایله گونه‌باخان
ساری ساچلی گونش، گؤیه دیرماشمیش داغلارین آرخاسیندا، خوروزون بانلاماسینی گؤزله‌ییردی. آخشامدان، بوغدا تارلاسیندا اولان یالنیز گونه‌باخان ایسه قارا دنه‌لرینی گونشین باتان یئرینه توتوب، گونشی گؤرمك اومیدی ایله یوخلامیشدی.
بیر آزدان، خوروز، سسی‌نی باشینا آتدی. كند ائولرینین چیراق‌لاری بیر-بیر ایشیقلاندی. گونش گؤزله‌دییی آنی گؤرونجه دوغماغا باشلادی. گونه‌باخان، سئوینجك اولوب، اویاندی. سئودییی گونشی بیرداها گؤره بیله‌جه‌یینه چیچه‌یی چارتلادی…
آرتیق، گونش گؤی اوزونده، هر یانی باخیشی آلتینا آلمیشدی. گونه‌باخان، گونش بونون اوچون گلیب‌دیر دئیه، اوزون اوندان چئویرمیردی. او، اوچوب گونشین یانینا گئتمك آرزوسوندایدی.
یاواش-یاواش آخشام گلیب چاتیردی. گونش یئره سردییی ساچلارینی داراییب، هؤرمه‌یه باشلامیشدی. گونه‌باخان ایسه گونشین گئتمه‌سیندن اوزولوردو. او، بیلیردی بیر آزدان گونش باتی‌داكی اوجا داغین آرخاسینا گئدیب یوخ اولاجاق‌دیر…
گونش، گئتدی! آنجاق هئچ بیلمه‌دی گونه‌باخان‌نین آدی‌دا اونون آدیندان آلینیب‌دیر. او هئچ بیلمه‌دی، گونه‌باخان بوتون یاشاییشیندا اونون سئوگی‌سی ایله یاشادی!
قورخولوق
آخشام اوستو كئچن گونلره تای، قارغالار، اوزوم باغینا هجوم چكدیلر. كئفلری چكینجه اوزوم یئییب باغی كورلادیلار.
قورخولوق آنلاملی سس‌سیزلیك له، باغین اورتاسیندا اونلارا باخیردی. الیندن بیر ایش گلمیردی، او ساده‌جه اؤز گله‌جه‌یینی دوشونوردو! دونن آخشام، باغ ییه‌سی، باغدان آیریلاندا، «صاباح‌دا گلیب گؤرسم قارغالار، باغی كورلاییب، قورخولوغو یئریندن چیخاردیب، یاندیرجایام» دئمیشدی!
بونلاری دوشونه‌رك، قورخولوغون اوره‌یی دولوب، خیمیر-خیمیر آغلاماغا باشلادی!
سعدی شیرازی‌نین آذربایجان توركجه‌سینده غزلی وارمیش
سعدی شیرازی‌نین آذربایجان توركجه‌سینده غزلی وارمیش
حاضیرلایان: حسین واحدی
فیلولوگیا[دیل تانیما] علم‌لری دوكتورو، پروفئسور شامیل جمشیدووون “علم و حیات” ژورنا‌لی‌نین 1987-جی ایل 10-جو ساییندا درج ائدیلمیش “سعدی شیرازی‌نین آذربایجان توركجه‌سینده بیر غزلی” یازی‌سینی و همین غزلی تقدیم ائدیر.
XIII [13-جو میلادی] عصر فارس پوئزیاسی‌نین[شعرینین] بؤیوك كلاسیكی مصلح‌ددین شئیخ سعدی شیرازی‌نین اثرلرینی آذربایجان اوخوجولاری همیشه بؤیوك ماراقلا اوخویورلار. حتی بیر زامان‌لار شاعرین مشهور “گولوستان” كیتابی مكتب و مدره‌سه‌لریمیزده درس‌لیك كیمی تدریس اولونموش‌دور. بو یاخین‌لاردا ال‌یازما‌لار خزینه‌سین‌دكی قدیم جونگ‌لر و توپلولار اوزرینده آراشدیرما‌لار آپاراركن شاعرین XVIII [18-جی میلادی]عصرده یازیلمیش نادیر بیر غزلی دقتیمیزی جلب ائتدی. باشلیقدا “كلامی شئیخ سعدی شیرازی” یازیلمیش، سون بئیتی “سعدی” تخللوصو ایله قورتاران بو غزل آذربایجان توركجه‌سینده یازیلمیش‌دیر. اثرین ترجومه و یاخود اوریژینال اولماسینی گؤسترن هئچ بیر قئید و علامت یوخدور.
