عسگرین فیکیرلری (حیکایه)
عسگرین فیکیرلری
یازار: آلئکساندر قرین
حاضیرلایان: حسین واحدی
بوتون گئجه‌نی گؤزومو یوممامیشدیم.
سؤزون دوزو، قورخموردوم، آنجاق ایندییه‌دک سنگرده دالدالانیب اوزونو گؤرمه‌دیییم دوشمنله آتیشماقدان بوس‌بوتون فرقلی اولان، اونونلا بیرباشا اوز-اوزه گله‌جه‌ییمی دوشوننده بَرک هیجانلانیردیم.
ایندی‌دن او آنلاردا هانسی دویغولاری کئچیره‌جه‌ییمی بیلمَک ایسته‌ییردیم...
بودور، تنگ‌نفس، توفنگیمین اوجونا برکیتدیییم سونگونو [سرنیزه‌نی] ایره‌لی یؤنه‌لدیب، منیمکی کیمی ایتی سونگوسونو اوستومه توشلایا‌راق قاچیب گلن دوشمنه ساری جومورام... بیز قارشیلاشیب توققوشوروق...
آنجاق منیم یازیق تخیّلومو بوندان او یانا گئده بیلمیر، اوره‌ییم ایسه آنلاشیلمازلیق ایچینده قالیب سیخیلیردی.
هاوا ایشیق‌لاناندا های-کویلو دؤیوش حاضرلیغی باشا چاتدی و بیز بوینوزلاشاجاغیمیز آنین گلیب چیخاجاغینی گؤزلمه‌یه باشلادیق.
اؤنجه سیرا‌لاریمیزی دوزلدیب، سنگرده دالدا‌لانا‌راق دوشمنله آتیشدیق، داها سونرا بیزیم توپلار دوشمنی مرمی یاغیشینا توتاندان سونرا، دوشمن سنگرلرینه سونگو ایله هجوم ائله‌مک امری وئریلدی.
«دایی جان پاپیل» تئاتری اورمیهده
«دایی جان پاپیل» تئاتری اورمیهده
«دایی جان پاپیل» تئاتری اورمیهده
«علی صابر رضایی»نین باشچیلیق ائتدیگی
«راد» تئاتر قروپو طرفیندن حاضیرلانان «دایی جان پاپیل» نوماییشی یاخین
گله‌جکده اورمو شهرینده تاماشایا قویولاجاقدیر.
قروپون یایدیغی پروگرام اساسیندا، ساتیرا مضمونلو اولان «دایی جان پاپیل»
نوماییشی دی آیینین ۲۷-سیندن بهمن آیینین ۶-سینادک هر گون ساعات ۶-دا،
اورمونون آپادانا بولواریندا یئرلشن «فرهنگی هنری» مجتمع‌سینده اجرا
اولاجاقدیر.
بو نوماییش احسان عارف، کیوان نصرالله‌پور، عمران پورخلیل، حسین حمیدی،
رویا جلیلی، ژاله رشیدی، زینب قلی‌نژاد، علیرضا تقی‌زاده، سالار تیموری،
نازیلا کریم‌پور، صدیقه مقدم و محمد خیرخواه‌ین امکداشلیغی‌ایله حاضیرلانیب
و اونون موسیقی ایشلرینی شایان برازش اؤز عهده‌سینه گؤتورموشدور.
نوماییشین بدیعی رهبری اورمو شهری‌نین تانینمیش صنعتکاری «علی صابر
رضایی»دیر.
امکداشیمیز «حسین واحدی» بو حاقدا یازیر:
آذربایجانین فخر ائدیجی شهری اولان اورمیهده، ۱۳۳۳-جو ایلده دونیایا گلن،
«علی صابر رضایی»، بو شهرده بویا-باشا چاتیب، حقوق قولوندا، تهران
بیلیم‌یوردوندا درسینی بیتیریب. درسین یانیندا، اینجه‌صنعت دونیاسیندا دا
فعالیت گؤسته‌ریب، بیر چوخ پییئس (نمایشنامه) یازاراق، اثرلرینین بیر
چوخونو دا اؤزو یؤنتمنلیک ائدیبدیر. رضایی‌دن بو گونه کیمی ۱۵ جیلیددن چوخ،
پییئس، کیتاب اولاراق، فارسجا و تورکجه دیللرینده ایشیق اوزو گؤروبدور.
اونلاردان: «کابوسهای آقای پاک سرشت»، «در محاکمه‌ی یک مجرم»، «تولد یک
حباب»، «موش کور»، «اسکندر مقدونی در ایران»، «ماجرای درخت نارون»، «جام
آخر»، «رویای پشت بام»، «فرار از سایه‌ها»، «اندر حکایت آدمها و موشها»،
«بازیهای توقف ممنوع و رویای دیگر» فارسجا اولاراق و «اصلی ایله کرم»، «ملک
محمد و آدی یوخ اوغلان»، «گول آغا»، «اوتوبوس ایستگاهی» و «سونا خاتین و
کیم گؤردو کیم گؤرمه‌دی» و… پییئس‌لرینی تورکجه اولاراق آد چکمک اولار.
اومید ائدیلیر، بو طنز تئاتردان دوزگون استقبال اولونسون. بوندان اؤنجه ده،
بیر نئچه تورکجه و فارسجا تئاتر، رضایی، جنابلارینین یازدیغی پییئس‌لردن و
آیری یؤنتمن و صنعتکارلاردان اورمیه ده اجرا اولوبدور. اینشاللاه گلن
گونلرده چالیشاجاییق بو قروپون تمرین‌لریندن ده گؤرونتولر حاضیرلایاق.
قایناق: ishiq.net
اؤتن گونلریم / گنجعلی صباحی
اؤتن گونلریم / گنجعلی صباحی
عنوان : اؤتن گونلریم
مولف : گنجعلی صباحی
چاپ: ۱۳۶۲
زبان : ترکی آذربایجانی
فرمت: PDF
حجم : ۲/۴۸مگا بایت
تعداد صقحه: ۱۲۳ صفحه
کیتابی آشاغیداکی آدرس‌دن ائندیره بیلرسینیز:
http://ishiq.net/wp-content/uploads/477-Her-Qapidan-Oten-Gunlerim-Gencali-Sabahi.pdf
قایناق: ایشیق سایتی
چوخ یاخیندا یاییلاجاق: یابانچی
یاخیندا یاییلاجاق؛
آلبئرت کامونون "یابانچی" آدیندا رومانی، تورکجه ترجمهسیله یاخیندا یاییلاجاق
تورکجه‌یه چئویرن: حسین واحدی
یایین‌ائوی: بوتا - اورمیه
Yaxında yayılacaq
Yabançı
Albert Kamyu
Türkcəyə çevirən: Hüseyn Vahidi
آنتون چئخوو ایله یادیگارلیق شکیل
آنتون چئخوو ایله یادیگارلیق شکیل
یازان: حسین واحدی
بیلگی‌سایار ایکی دفعه دینق-دینق
ائتمکله، بیلدیم یئنه ده بیر ساعات قورتولدو. مانیتورون قیراغینداکی ساعاتا
باخدیم. گئجه ساعات بیر ایدی. کؤچورمه هله یاری اولمامیشدی. “دیل بلاسی*”
منه، ” گؤز بلاسی” اولموشدو.
بیری یوخدو دئسین، گئجه‌نین بو واختیندا سن فیلان سایت‌دان بو حیکایه‌نی گؤرمه‌سیدن نه اولاردی؟، _ اؤز- اؤزمله دئدیم.
آنجاق حیکایه دونیامیزا یئنی بیر حیکایه آرتیریم دئیه دایانمادان آنتون
چئخوون اون ایللرجه بوندان اؤنجه یازدیغی حیکایه‌سینی حاضیرلاییب
قورتارماغا ماراقلی ایدیم.
عادی بیر آدام
عادی بیر آدام
تورکجه‌یه چئویریب حاضیرلایان: حسین واحدی
فرانس کافکا*، 1883-جو ایلده بیر آلمانلی عایله‌ده پراق شهرینده دونیایا گلدی. فرانس عایله‌نین ایلکین اوشاغی ایدی. ایکی قارداشی، یئددی یاشلارینا یئتیشمه‌میش دونیادان گئتمیشدیلر. اوچ باجی‌سی ایسه نئچه ایللر سونرا ایکینجی دونیا ساواشی‌نین اؤلوم کمپ‌لرینده اؤلدورولدولر. کافکانین آتاسی چوخ مذهبی و جدی ایدی. اونون بو اخلاقی آتا-بالا آراسیندا بؤیوک اختلافلارا نه‌دن اولدو. البته بو جدی‌لییی کافکانین اثرلرینده ده گؤرمک اولور.
ژاپونلو یازیچی هاروکی موراکامی
ژاپونلو یازیچی هاروکی موراکامی
Yaponiyalı yazıçı Haruki Murakami
حاضیرلایان: حسین واحدی
hazırlayan: Hüseyn Vahidi
هاروکی موراکامی* 1949-جو ایلده ژانویه آیینین 12سینده کییوتو شهرینده دونیایا گلمیشدیر. آتاسی بوت‌پرست کئشیش، آناسی ایسه ادبیات معلمی اولان هاروکی هله گنج یاشلاریندان بَری ادبیاتا مئیل گؤسترمیشدیر. اوشاقلیق دؤنه‌مینی اؤز اثرلرینده تئز-تئز عکس ائتدیرن یازیچی بیر چوخ مصاحبه‌لرینده اوشاقلیقدا آتا-آناسیندان اؤیره‌ندیگی گئرچکلرین اونون اوچون وازکئچیلمز اولدوغونو آچیقلامیشدیر. گنج هاروکی گنجلیگی‌نین بؤیوک بیر بؤلومونو کوبئ [kobe] شهرینده کئچیرمیشدیر. توکییونون واسئدا بیلیم‌یوردونون ادبیات فاکولته‌سینی بیتیرمیش یازیچی بیلیم‌یوردو ایللرینده اوسلوبیاتین [سبک‌تانیمانین] دَرین سیرلرینی اؤیرنمیش، چئشیدلی دوغما و خارجی اثرلردن رنگارنگ تصورات‌لار آلمیشدیر. یازیچی گنج یاشلاریندان کیتاب‌لارا، اؤزللیکله ده باتی [غرب] ادبیاتینا خصوصی مئیل گؤسترمیشدیر.
خیال پرده‌سی Xəyal pərdəsi
خیال پرده‌سی
یازار: محمدعلی ضیایی*
چئویرن: حسین واحدی
... قادین قیشیردی (بلکه ده من بئله گومان ائتمیشدیم) :
- دئدیم دا! سنه احتیاجیم یوخدو. مه‌یه من ائلییه بیلمه‌رم بو ایشی تک‌باشیما گؤره‌م؟
تله‌سیردیم، آما ماراقدان، آددیملاریم سارسیلدی. قادین، اوتوز قارلی فصیلی گؤرندن داها چوخ گنج ایدی. بوندان داها تئز یئنی چادیرا ایله ده‌ییشه بیله‌جه‌یی کؤهنه چادیراسینی، فرنگی قونداغین اوستونه چکمیشدی. سورتولموش پالچیقلی و دابانلی باشماقلارینی، جَمده‌ک کیمی یئرده سوروتله‌ییردی. کیشی اونا ساری آتیلیب، اوز-اوزه‌سینده دایاندی. ألینی قالدیردی و سانکی یئنی‌جه بیر مؤوضوعنو آنلاییبدیر دئیه یان یؤوره‌سینه باخدی. مندن سونرا بیر-ایکی نفر یولدان کئچن ده وار ایدی. یقین بیزیم اولماغیمیزین قرارینی ده‌ییشمه‌یه یئترلی اولدوغو اوچون، ألینی یاواشجا قادینین چییین‌لرینه کیمی آشاغی ائندیریب، علاجسیزلیق‌لا دئدی:
یاغیش آلتیندا پیشیک Yağış altında pişik
یاغیش آلتیندا پیشیک
یازار: ائرنئست هئمینگوئی
حاضیرلایان: حسین واحدی
مسافرخانادا ایکی آمئریکا‌لی قالیردی. اورا‌داکی‌لاردان هئچ کیمی تانیمیردی‌لار. قالدیقلاری دنیز منظره‌لی نؤمره ایکینجی مرتبه‌ده ایدی. پنجره‌دن پارک و ساواش قوربان‌لاری اوچون قویولموش آبیده گؤرونوردو. گؤز اوخشایان پارکا ایری[iri] خورما آغاجلاری، یاشیل اوتوراجاقلار بیر باشقا گؤزللیک وئریردی. یاخشی هاوا اولان کیمی هانسی‌سا رسام قولتوغوندا رساملیق تاختاسی ایله پارکا گلر، اوجا خورما آغاجلارا، مسافر‌خانایا، دنیزه تاماشا ائدر، اونلاری فیرچاسی ایله عکس ائتدیرمه‌یی سئوردی. ایتالیالی‌لار آبیده‌نی گؤرمک اوچون اوزون یول گلیردیلر. بورونجدن دوزلدیلن هئیکل یاغیش آلتیندا پاریلداییردی. یاغیش یاغیر، داملا‌لار پالما یارپاقلاریندان سوزولوردو. چینقیل یولدا سولار چوخورا آخیب گؤلمه‌چه‌لر دوزه‌لیردی. یاغیش آبیده‌نین قارشی‌سین‌داکی بوش مئیدانچانی دؤیَج‌له‌ییردی. مئیدانین اوبیری طرفینده کافه‌نین قاپی‌سی آغزیندا قارسون دایانیب اطرافا تاماشا ائدیردی.
گؤی‌ده اولان ائی بیزیم آتامیز
گؤی‌ده اولان ائی بیزیم آتامیز
یازار: لئاندرو اوروینا
چئویرن: حسین واحدی
چاووش، اوشاغین باجی‌سی ایله آناسینی سورغویا چکیردی، یوزباشی ایسه اوشاغین الیندن توتوب اؤزو ایله باشقا اوتاغا آپاردی.
"آتان هاردادیر؟" دئدی.
اوشاق دیل آلتی جاواب وئردی: گؤیه گئدیب‌دیر.
یوزباشی حئیرانلیق‌لا سوروشدو: نمنه؟! اؤلوب؟!
اوشاق، "یوخ. هر گئجه گؤی‌دن آشاغی گلیب، بیزله شام ییئیر.» دئدی.
یوزباشی، گؤزلرین دولاندیریب تاوان‌دا بیر قاپی‌جیغی گؤردو.
***
سؤزلوک:
چاووش: گروهبان
یوزباشی: سروان
حئیران: تعجب
تاوان: سقف
قاپی‌جیق: دریچه/دربچه
