قار/حیکایه Qar - Kamal Abdulla
قار
یازار: کمال عبداله
کؤچورن: حسین واحدی
قیش قورتاردی، یاز گلدی، قار یئنه یاغمادی کی، یاغمادی. حسن عمی قیش‌دان بری ائله هئی دئیینیب دورموشدو: – قار حؤکمن یاغما‌لیدی. آدامین گؤزو قار گؤرمه‌لیدی. یوخسا اولماز. – حسن عمی، آی حسن عمی، قار یاغاجاق؟ – حه‌یط‌ده گؤزلرین‌دن جین چیخان قونشو اوشاق‌لار یاشی اؤتموش، دیزلری طاقت‌ینی، گؤزلری ایتی‌لییینی ایتیرمیش بو قوجا کیشی‌نین آرخاسینجا گولوشه-گولوشه قاچا‌راق همیشه‌کی سوال‌لارینی یاغدیردی‌لار. – یاغاجاق، حؤکمن یاغاجاق… کئچن ایل ده یاغمادی. بو ایل حؤکمن یاغاجاق. دوداقآلتی، اؤز-اؤزو ایله دانیشا-دانیشا حسن عمی حه‌یطی کئچیب کوچه‌یه چیخدی، دالینا دوشوب قاچیشان اوشاق‌لاری او دقیقه اونودا‌راق، اوز توتدو یاخینلیق‌داکی محله بازاری‌نین ایچین‌دکی بالاجا، راحات، سؤز-صحبت‌لی چای‌خانایا.
اوچ ایل/آنتون چئخوو
اوچ ایل
یازار: آنتون چئخوو
حاضیرلایان: حسین واحدی
رومان‌دان بیر پارچا…
هر طرف قارانلیق ایدی. کوچه‌نی ایشیقلاندیران تکجه ایشیق ایسه بعضی ائولرین پنجره‌سین‌دن دوشن ضعیف ایشیق ایله پاریلتی‌لی آی ایدی. لاپتئو کیلسه یاخینلیغین‌داکی اوتوراجاق‌لارین بیرینده اوتوروب کیلسه‌نین آخشام خیدمتی‌نین بیتمه‌سینی گؤزله‌ییردی. همین واخت ایسه او، یالنیز بیر شئی حاقیندا دوشونوردو؛ یولیا سئرگئیئونا کیلسه‌دن چیخیب اونون یانین‌دان کئچه‌جک و بئله‌لیکله، لاپتئو سونوندا، اونونلا دانیشا بیله‌جک. اولا بیلر او، بوتون گئجه‌سینی اونونلا کئچیره‌جک بیله.
پائولو کوئلیو طریقت باشچی‌سی اولوب
پائولو کوئلیو طریقت باشچی‌سی اولوب
یازار: سایمان آروز
کؤچورن: حسین واحدی
پوستمودئرنیزم مودئرنیزمین گئنیشلنمه‌سینین بیر مرحله‌سی‌دیر. هانسی کی، مودئرنیزمین بوتون نظریه، ایستک و سوتون‌لارینی انکار ائتمکله اؤز وارلیغینی اعلان ائدیر. پوستمودئرنیزم، اصلینده، مودئرنیزمین عمومی‌لشمه‌سی‌نین مقابلینده اجتماعی تپکی[عکس‌العمل]، یعنی عمومی‌لی بحران کیمی ده کاراکتئریزه ائدیلیر. بو بحران یارادیجی بحران کیمی دئییل، بلکه، سقوطا محکوم اولان بیر جریان کیمی بوتون سیستئم‌لرین سون‌لاریندا موشاهیده اولونور. اونا گؤره‌دیر پوستمودئرنیزمین نیهیلیزمینی “اؤزونو محو ائتمه پروسئسی” ده آدلاندیریرلار. پوستمودئرنیزم نه هانسیسا بیر دؤوران، نه ده هانسیسا بیر پروسئس‌دیر. حتی اونو خصوصی دؤوره عایید اولان بیر فلسفی تفکر ده حساب ائتمک اولماز. حقیقت بودور کی، پوستمودئرنیزم اصل بحران‌دیر. اصلینه باخساق، مودئرنیزمین اؤزونو اظهار ائتمک اوچون پوستمودئرنیزمه احتیاجی وار. مودئرنیزم مودئرن‌دیرسه، دئمه‌لی، پوستمودئرن ده اولما‌لی‌دیر. “پوستمودئرنیزم” مودئرنیزمی سوال آلتینا چکمک اوچون بیر “زامان”دیر. بورادا پوستمودئرن فلسفه‌سی یئرینه، پوستمودئرنیزمین فلسفه‌لری ایله قارشی قارشییا گلیریک. بو ایسه اوندان قایناق‌لانیر، بو مرحله‌نین ضیا‌لی‌لاری نه عینی دیلده دانیشیر، نه ده عینی ماهیتی داشیییرلار.
معشوقه‌یه گؤره پئشمان اولماق
معشوقه‌یه گؤره پئشمان اولماق
یازار: آندرئ موروا
کؤچورن: حسین واحدی
18-جی ایلده، سنت-اونورئ کوچه‌سینده گزیشن بیر طلبه[اؤیرنجی] رسم تابلولاری ساتیلان دوکانین پنجره‌سی قارشی‌سیندا آیاق ساخلاییر. دوکانین ویترین‌ینده مانئ‌‌نین (حکایه‌ده “شارتر کیلسه‌سی” تابلوسونون مؤلفی کیمی ایمپرئسیونیست ائدوارد مانئ[Eduar Mane] گؤستریلسه ده، اصلینده بو اثری 1830-جو ایلده رومانتیزم دؤورونون رسامی کامیل کورو[Kamil Koro] چکیب) "شارتر کافئدرال کیلسه‌سی" رسم اثری آسیلمیشدی. او واخت‌لار مانئ‌‌نین بو تابلوسو اونا پرستیش ائدن یالنیز بیر نئچه هوسکاری جلب ائدیردی، لاکین یول‌دان کئچن بو پیادانین ذؤوقو تام باشقا ایدی. اثرین گؤزل‌لیگی اونو مفتون[سئودالی] ائتمیشدی. او، بیر نئچه گون گلیب ائله‌جه تابلویا تاماشا ائله‌میشدی. و نهایت، بیر گون اؤزونده جسارت تاپیب دوکانا گیرمیش، تابلونون قیمتینی سوروشموشدو.
- والاه نه دئییم، بو تابلو بوردا چوخدان دورور، - دئیه دوکانچی دیللندی، اونو سیزه ایکی مین فرانکا وئره بیلرم.
طلبه‌نین[اؤیرنجی‌نین] بو قدر پولو یوخ ایدی، لاکین ایالتده یاشایان و هئچ ده کاسیب اولمایان بیر عائله‌دن چیخمیشدی. او، پاریسه گئدنده، عمی‌لرین‌دن بیری اونا دئمیشدی: "گنج اولماغین نه اولدوغونو من یاخشی بیلیرم، بیردن نیه‌سه احتیاجین اولسا، منه یازارسان". او، دوکانچی‌دان تابلونو سککیز گوندن تئز ساتماماغی خاهیش ائتدی و داها سونرا عمی‌سینه بیر مکتوب یازدی.
هر گون اورمو گؤلونه باش چکرم
دانیشیق و شکیللر: حسین واحدی
اورمیه اهالیسی ایللر بویو اورمو گؤلو ایله خاطیره‌لر یارادیب‌لار. داریخاندا، شنلیک‌لرده، ایستی یایین الیندن قاچاندا هئچ یئرده اولماسا چوخونا اورمو گؤلو وار ایدی.
اوروم نیوز، اورمیه اهالیسی ایللر بویو اورمو گؤلو ایله خاطیره‌لر یارادیب‌لار. داریخاندا، شنلیک‌لرده، ایستی یایین الیندن قاچاندا هئچ یئرده اولماسا چوخونا اورمو گؤلو وار ایدی.
نه قدر ده دئییلسه اورمو گؤلو دوزلمز، فیلان اولار بئهمان اولار آذربایجان اهالیسی قبول ائتمیر. جمعه اولاندا بعضی اورمولولار هله ده اورمو گؤلونون ساحیلینه قوناق گئدیب ده‌یرلی چاغلارینی اونلا پایلاشیرلار.
غریبه حیکایه/حیکایه‌جیک
غریبه حیکایه
یازار: او. هئنری
کؤچورن: حسین واحدی
آوستی‌نین شیمالیندا بیر واخت‌لار ناموس‌لو بیر سمودئرس[Smoders] عائله‌سی یاشاییردی. جون سمودئرسین عائله‌سی آروادین‌دان، بئش یاشین‌داکی بالاجا قیزین‌دان و اونون والیدئین‌لرین‌دن عبارت ایدی. کندین رسمی سیاهی‌یا آلماسیندا[باش ساییمیندا/سرشماری] عائله آلتی نفردن عبارت اولسا دا، اصلینده اونلار اوچ نفر ایدی‌لر.
بیر آخشام شام یئمه‌یین‌دن سونرا بالاجا قیز شدت‌لی معده سانجیسییلا قیوریلماغا باشلادی. جون سمودئرس واخت ایتیرمه‌دن ائودن چیخیب کنده درمان آلماغا گئتدی. آما او، بیر ده هئچ واخت گئری قاییتمادی.
فلئش‌موبFleşmob - حیکایه
فلئش‌موب
یازار: ژاله اسماعیل
کؤچورن: حسین واحدی
- 91!
واحید آچیق قاپی‌نین یانینداکی ماسا‌دان قیشقیردی. کافه‌دکی طلبه‌لر[اؤیرنجی‌لر] مختلف یئرلردن قروپ شکلینده آیاغا قالخیب ال چالماغا باشلادیلار. 91-جی آدام-طلبه چاشیب قالدی. اؤزونو ایتیریب ایچه‌ری گیرمک عوضینه گئری قاییتدی.
- بو، 100 فاییز بیرینجی کورسویدو.
- اؤزو ده "فیلفاک".
یولداش‌لاری جاببارین آتماجاسینا اوجا‌دان گولدولر. “یورفاک”این اوغلان‌لاری اوچون “فیلفاک”این اوغلان‌لاری همیشه گولوش اوبیئکتی[زادی] ایدی.
فیلولوگیا[دیل‌بیلیمی/علم زبان] فاکولته‌سینده اوخودوغو گومان ائدیلن 91-جی آرتیق 5-جی 91-جی ایدی. بو گون 91 نفر 91-جی گؤزلمه‌یه سؤز وئرمیشدی‌لر. هر 91-ینجی‌یه بیر بالاجا دؤنر، بیر آیران آلیردی‌لار. سونرا دا اونو آلقیشلایا-آلقیشلایا یولا سالیردی‌لار. بو گون تقاعد[بیلیم/بورس] گونو ایدی و هئچ نه‌یه چاتمایان بو تقاعدله بو جور مزه‌لنمک اونلارا خصوصی ذؤوق وئریردی.
طلبه کافه‌سی‌نین آدمینیستراتورو[یؤنتیجی‌سی/مدیری] نیاز دا اونلارین خطرینه[xətirinə] دیمیردی. هم ده تئز-تئز اولموردو بئله حادثه‌لر. بو گونه‌جن ده بیر پروبلئم چیخمامیشدی. آما بیر دفعه تاریخ فاکولته‌سی‌نین دئکانینی[رئیس‌ینی] چاشدیرمیشدی‌لار. کافه‌‌دن تئز-تئز “50!” ائشی‌دن دئکان طلبه‌لرین ایچه‌ریده لوتو اوینادیغینی ظن ائتمیشدی. غضبله ایچری گیریب هامی‌نین چای ایچدییینی گؤرسه ده، یئنه لوتودان شوبهه‌لی قالیب حرصینی اؤز فاکولته‌سی‌نین طلبه‌لرینه تؤکموشدو:
- پالتار یویورلار ائله بیل ظالمین بالا‌لاری، بوتون گون چای ایچیرلر!
خزان/حیکایه‌جیک
خزان
یازار: حسین واحدی
کیشی، ایشچی‌باشی‌نین سرت باخیشلارینین آلتیندا ازیلسه ده سوپورگه‌نی داها برک توتوب داها جدی‌لیک‌له یئری سوپورمه‌یه داوام ائتدی. یانینداکی سوبای امکداشی بیر الینده سوپورگه، اوبیری الینده ایسه سیقار، ایگید اینسانلاری جاندان یاخان آجی بیر گولوش ایله ایشچی‌باشی‌نا یاخینلاشیب نئچه دقیقه پیچیلداشاندان سونرا سوپورگه‌نی گؤتوروب امکداشیندان خئیلاق اوزقلاشیب یئری سوپورمه‌سه ده سوپورمک اداسینی چیخارتماغا باشلادی.
نه‌یسه کیشی‌نین ایچینی یاندیران آلوولو باخیشلارین آلتیندا بئلی ده بوکولوردو. قولونداکی ساعاتا باخیب ایشین سونا چاتماسینی بیلدی. بیر یئره ییغدیغی زیبیللری زیبیل قابلارینا بوشالدیب ساغوللاشماق اوچون ایشچی‌باشی‌نین یانینا گئتدی. بیر آز ایشچی باشی‌نا دیل آغیز ائتمه‌یه باشلادی، او دانیشاندان سونرا ایشچی باشی اللرینی جئبلریندن چیخاردیب دیک سسله دئدی:
- مدیر سندن راضی دئییل! دئییر ایشله‌ین آدام دئییل او... فیریلداق دی... همده بیلیرسن دا... پاییز گلیب آرادا ائله ده ایش یوخدو. دئییبلر گون موزدلو ایشچی لردن فقط بیر نفر قالسین...
ایشچی باشی‌نین بو سؤزلری قمه کیمی سؤکوب دارما-داغین ائتدی ایشچی‌نی. کیشی خزانین قورو سویوغوندا اؤز ایچینده سس‌سیزجه اونو گؤزله‌ین دئدی-قودولارین هاراییندا کار اولدو.
یوخو (حیکایه‌جیک) Yuxu
یوخو
یازار: حسین واحدی
هر یانی دومان بوروموشدو. حیکایه‌لرده اولان اؤلولر شهرینه اوخشاییردی شهر. کیشی یالقیزجا آدی به‌للی اولمایان بیر خیاوان‌دا دورموشدو. یئریندن ترپنه بیلمه‌ییردی. جینقیری بئله چیخماییردی. بیر آن دومان هر یاندان چکیلیب گئتدی. باخیب گؤره بیله‌جه‌یی هر یاندا آغاجلارین یئرینه اینسان آیاغی وار ایدی.
چوخ چکمه‌دی خیاوان باشیندا اللرینده قانا بویانمیش بالتالارلا گؤرونن آغاجلاری گؤردو. نه دئدیکلری و نه دیلده شعار وئریب اعتراض ائتدیکلری به‌للی دئییلدی. یاواش-یاواش اونا ساری گلیردیلر. ال-آیاغی قورموشدو. خیالیندا، ایندی اونو دا بالتا ایله چاپاجاقلار دئیه دوشوندو. گؤزو آرخ‌لاردان آخان قانلارا ساتاشدی. خیالاتیندا، بیر آن‌دا، یوزلرجه آغاجی چاپدیغینی گؤزدن کئچیردی، آنجاق خیالاتیندان آیریلماغا امکان وئرمه‌دی، اونا ساری آتیلان بالتالار.
خیاوانی، قوخوسونا دؤزمک اولمایان بیر قان قوخوسو آلتینا آلمیشدی.
“هاشیم ترلان” ابدیته قوووشدو
ایشیق سایتینین یایدیغی خبره گؤره؛ آبان آیی‌نین ۲۵ینجی گونونون یاری
گئجه‌سینده آذربایجان خالقی‌نین شاعر اوغلو، آزادلیق، اجتماعی عدالت و بشری
ایده‌آللار مودافعه‌چیسی، دیلیمیزین، ادبیاتیمیزین و مدنیتیمیزین
اینکیشافیندا یورولمازجاسینا ۷۰ ایلدن آرتیق چالیشان و تاثیر ائدیجی ایز
بوراخان ۲۱ آذر نهضتی‌نین اشتراکچیسی علی چشم‌آلوسی(اوستاد هاشیم ترلان)
ابدیته قوووشدو.
هاشیم ترلان تکجه ادبیاتیمیزین و مدنیتیمیزین چیچکلنمه‌سینده یوخ، اجتماعی
بیر شخصیت سیماسیندادا بیر چوخ گنج و اورتا نسیلین شخصیتی‌نین
فورمالاشماسیندا قویدوغو تعیین ائدیجی تاثیری باخیمیندان، خالقیمیزین
یادداشیندا ابدیلشن شخصیتلریمیزدندیر. اونو تام معنادا دونه‌نین و بو گونون
ملی و مبارز شاعری آدلاندیرساق، یانیلمامیشیق. چونکو اوستاد هاشیم ترلانین
یارادیجیلیق حیاتی‌نین بوتونو دموکراتیک و ملی طلبات، خالق‌لار دوستلوغو،
اجتماعی عدالت، آزادلیق، صلح، امن- آمانلیق و برابرلیک کیمی موضوعلاردان
سوواریلیب، یوغرولوب و پوئتیک دیلده اؤز بدیعی عکسینی تاپمیشدیر.
۱۳۰۲ینجی ایل باکی شهرینده، آلان‌براغوش ماحالی‌نین زنگیل‌آوا کندیندن بیر
تیکه چؤره‌ک آردینجا آرازین او تایینا کؤچن بیر عائیله‌ده دوغولان هاشیم
ترلان بو گون آرامیزدان کؤچوبدور؛ آنجاق اونون معاصر ادبیاتیمیزین روحونا
هوپان و تاثیری زامان- زامان خالقین معنویاتیندا یاشایان یارادیجیلیق یولو
هله‌ده داوام تاپاجاقدیر و یئنه‌ده ادبیات و مدنیتیمیزین یول گؤستریجیسی
اولماسیلا برابر، اجتماعی مبارزه یوللاریمیزا ایشیق ساچاجاقدیر.
حیات طرزی و یارادیجیلیق یوللارینا فخر ائده‌جه‌ییمیز اوستاد هاشیم
ترلانین آغیر ایتگیسی بوتون ادبیات و مدنیتیمیزده اوز وئرن سارسیدیجی بیر
ایتگی‌دیر. بیز “ایشیق” (آذربایجان ادبیات و اینجه صنعت درگیسی) امکداشلاری
آدیندان بو آغیر ایتگینی خالقیمیزا، آذربایجان میللتینه، ادبی- مدنی
جمعیتیمیزه و اوستادین حؤرمتلی عائیله‌سینه – باشینیز ساغ اولسون! دئییریک؛
اوستادین شرفلی و عزیز خاطیره‌سینی عزیزله‌ییریک و همیشه اولدوغو کیمی
اونون معنوی ارثیندن قیدالانماغی اؤز ادبی- مدنی عؤمروموزه و یارادیجیلق
یوللاریمیزا یاراشیق ساییریق.
قوی اؤلوم سئوینمه‌سین عؤمرونو وئرمیر بادا-
ائل قدرینی جانیندان داها عزیز بیلن‌لر
شیرین بیر خاطیره تک قالاجاقدیر دونیادا
سئوه‌رک یاشایانلار، سئویله‌رک اؤلن‌لر
