یوخو (حیکایهجیک) Yuxu
یوخو
یازار: حسین واحدی
هر یانی دومان بوروموشدو. حیکایهلرده اولان اؤلولر شهرینه اوخشاییردی شهر. کیشی یالقیزجا آدی بهللی اولمایان بیر خیاواندا دورموشدو. یئریندن ترپنه بیلمهییردی. جینقیری بئله چیخماییردی. بیر آن دومان هر یاندان چکیلیب گئتدی. باخیب گؤره بیلهجهیی هر یاندا آغاجلارین یئرینه اینسان آیاغی وار ایدی.
چوخ چکمهدی خیاوان باشیندا اللرینده قانا بویانمیش بالتالارلا گؤرونن آغاجلاری گؤردو. نه دئدیکلری و نه دیلده شعار وئریب اعتراض ائتدیکلری بهللی دئییلدی. یاواش-یاواش اونا ساری گلیردیلر. ال-آیاغی قورموشدو. خیالیندا، ایندی اونو دا بالتا ایله چاپاجاقلار دئیه دوشوندو. گؤزو آرخلاردان آخان قانلارا ساتاشدی. خیالاتیندا، بیر آندا، یوزلرجه آغاجی چاپدیغینی گؤزدن کئچیردی، آنجاق خیالاتیندان آیریلماغا امکان وئرمهدی، اونا ساری آتیلان بالتالار.
خیاوانی، قوخوسونا دؤزمک اولمایان بیر قان قوخوسو آلتینا آلمیشدی.