یوخو (حیکایهجیک) Yuxu
یوخو
یازار: حسین واحدی
هر یانی دومان بوروموشدو. حیکایهلرده اولان اؤلولر شهرینه اوخشاییردی شهر. کیشی یالقیزجا آدی بهللی اولمایان بیر خیاواندا دورموشدو. یئریندن ترپنه بیلمهییردی. جینقیری بئله چیخماییردی. بیر آن دومان هر یاندان چکیلیب گئتدی. باخیب گؤره بیلهجهیی هر یاندا آغاجلارین یئرینه اینسان آیاغی وار ایدی.
چوخ چکمهدی خیاوان باشیندا اللرینده قانا بویانمیش بالتالارلا گؤرونن آغاجلاری گؤردو. نه دئدیکلری و نه دیلده شعار وئریب اعتراض ائتدیکلری بهللی دئییلدی. یاواش-یاواش اونا ساری گلیردیلر. ال-آیاغی قورموشدو. خیالیندا، ایندی اونو دا بالتا ایله چاپاجاقلار دئیه دوشوندو. گؤزو آرخلاردان آخان قانلارا ساتاشدی. خیالاتیندا، بیر آندا، یوزلرجه آغاجی چاپدیغینی گؤزدن کئچیردی، آنجاق خیالاتیندان آیریلماغا امکان وئرمهدی، اونا ساری آتیلان بالتالار.
خیاوانی، قوخوسونا دؤزمک اولمایان بیر قان قوخوسو آلتینا آلمیشدی.
یوخو / حیکایهجیک
یازار: ایلقار الیف اوغلو
کؤچورن: حسین واحدی
شهر مئری پارکا باش چکدی - ایش تاپشیرمیشدی، یوخلامالییدی...
تمیزلمیشدیلر، بیرجه آغاج دا قالمامیشدی. قولاغینا اینیلتیلر دهیدی. اطرافینا باخدی، کیمسه یوخدو - دؤرد بیر یاندا تورپاقدان بویلانان کؤتوکلر، کؤتوکلر، قارا-بوز کؤتوکلر...
آخشام ایجلاسدا تعریفلندی، جانینا ساری یاغ کیمی یاییلدی...
گئجه ایسه یوخودا گؤردو کی، صاحیبی آغاجلار اولان بیر شهرده یاشاییر و شهرین ییهسی اراضینی اینسانلاردان تمیزلتدیریب... دؤرد بیر یاندا تورپاقدان بویلانان آیاقلار، آیاقلار، رنگبرنگ آیاقلار...
اؤز آیاغینی تانیدی و بایاقکی اینیلتیلرین ایچینده اؤز سسینی یالنیز ایندی سئچه بیلدی...
کؤرپهلرده یوخو رئژیمی ساغلام اینکیشافین آچاریدیر
کؤرپهلرده یوخو رئژیمی ساغلام اینکیشافین آچاریدیر
حاضیرلایان: حسن واحدی
کؤرپه [نوزاد] بؤیودن عائلهلرین یاشادیغی ان اهمیتلی چتینلیكلردن بیری، کؤرپهلرینین اوزون مدت قایدایا دوشمهین گئجه یوخولاریدیر. دیلیمیزه یئرلشن "کؤرپهلر کیمی یاتماق" دئییمینه قارشی، کؤرپهلرین درین و کسیلمز بیر گئجه یوخوسونا گئتمهلری آنا-آتالار اوچون چوخ واخت خیالدان او طرفه کئچمیر.
اوشاق ساعت 22.00 'ده ان درین یوخوسوندا اولمالیدیر!
اوشاقلارین یوخویا اولان احتیاجلاری و یوخو مدتلری بؤیومه دؤورلرینه گؤره دییشر. یئنی دوغولان دؤور، ان چوخ یوخویا احتیاجی اولان دؤوردور. یئنی دوغولان کؤرپهنین یوخوسو 18-20 ساعتا قدر چاتا بیلر. بؤیودوکجه قاوراما حیسسی اینکیشاف ائدن اوشاغین، یوخو مدتی ده قیسالاجاقتیر. بؤیومه هورمونو ساعت 22.00 اطرافیندا ان یوکسک سویهلره چاتاجاق. بو سببله اوشاق هانسی یاشدا اولورسا اولسون، بو ساعتلاردا درین یوخودا اولمالیدیر.