غریبه حیکایه/حیکایه‌جیک
بالاجا قیز بیر مدت کئچن‌دن سونرا ساغالدی، سونرا دا بؤیویوب گؤزل گنج قادین اولدو. آنا ایللرله یوخا چیخان اری اوچون چوخلو گؤز یاشی تؤکدو. آما اوچ آی بوندان اول عائله قوروب سان-آنتونیو کندینده یئرلشدی. بیر مدت سونرا بالاجا قیز دا عائله قوردو و آرا‌دان ایللر کئچدیک‌دن سونرا بالاجا قیزین دا قیزی دونیایا گلیب بئش یاشینا چاتدی. گنج قادین ایسه هله ده آتاسی‌نین اونلاری ترک ائدیب و بیر ده هئچ واخت گئری قاییتمادیغی ائوده یاشاییردی.
بیر گئجه قریبه[غریبه] بیر حادثه باش وئردی. ایللر اؤنجه جون سمودئرسین یوخا چیخدیغی گئجه‌دکی کیمی گنج قادینین بالاجا قیزی معده سانجیلارییلا قیوریلماغا باشلادی. اگر جون سمودئرس یاشاییردیسا دئمه‌لی، او، نوه صاحبی ده اولموشدو. جون سمیت (گنج قادینین اری) آروادینا «موطلق کنده گئدیب بالاجا قیزیما درمان آلمالییام» دئدی. آروادی «یوخ، یوخ، جون گئتمه. بلکه، سن ده ائوه قاییتماغی اونودوب ابدی یوخا چیخارسان»، — دئیه اری‌نین گئتمیینه اعتراض ائله‌دی.
بئله‌جه جون سمیت بالاجا قیزی اوچون درمان آلماغا گئتمه‌دی. او، آروادییلا بیرلیکده گلیب بالاجا پئنزی‌نین (بالاجا قیزین آدی پئنزیدی) باشی اوستونده دایاندی‌لار. بیر مدت سونرا پئنزی‌نین حالی لاپ پیس‌لشدی. جون سمیت تکرار بالاجا قیزی اوچون درمان آلماغا گئتمک ایسته‌دی، آما آروادی یئنه ده اونا مانع اولدو. ائله بو واخت بیردن-بیره ائوین قاپی‌سی آچیلدی و هاردانسا گلمیش اوزون و آغ ساچ-ساققال‌لی، دونقار[کؤشک‌لی]، یاشلی بیر قوجا کیشی بئلی بوکولموش وضعیتده ایچرییه گیردی.
پئنزی قوجا کیشینی «خوش گؤردوک، بابا» دئیه سلاملادی. بالاجا قیز یاشلی آدامی او بیری‌لرین‌دن اول تانیمیشدی. قوجا کیشی جیبین‌دن تئز درمان شوشه‌سینی چیخاردا‌راق پئنزی‌یه بیر قاشیق سیروپ[شربت] ایچیرتدی. بالاجا قیزین وضعیتی درحال یاخشی‌لاشدی و او ساغالدی. جون سمودئرس «تراموایی گؤزلدیییم اوچون بیر آز گئجیکدیم» دئدی.
چئویردی: سید رامین
