حیات سئوینجی Həyat sevinci
حیات سئوینجی
یازار: جون قولسورسی
حاضیرلایان: حسین واحدی
بو، بئرکلی-ایسکوئرین یاخینلیغیندا اولوب. من تر ایچینده، نئجه دئیرلر “داشینان املاک”لا [منقول اموال] دوپدولو حالدا ایستی قوناق اوتاغیندان چیخدیم. گیریش قاپیسی باغلاندی، باتی [غرب] کولهیی اوزومه چیرپیلدی و من آز قالا بالاجا قیزی تاپدالایاجاقدیم.
بلکی، بئش یاشی اولاردی. أینینده دیزلرینی اؤرتن قیرمیزی أتک واردی، اوتوراجاقدا اوتورموشدو. او، ألینندهکی اوستونده ایکی-اوچ قومرال [قهوهای] یارپاق اولان قورو بوداغی سککینین قیراغینا وورا-وورا ریتمله ماهنی اوخویوردو. توند قومرال چالارلی [رنگلی] بوروق [فرفری] ساچلاری یومرو [گیرده] صیفتینه دوشموشدو؛ یانیندا بؤرک قالیقلاری واردی، گؤزلریندن ایسه چیلغین قارا بهبهکلر بویلانیردی.
او ائله واله ائدیجی ایدی و همین بو “داشینان املاک”آ او قدر اوخشامیردی، آدام اوندان آرالانا بیلمیردی.
و من کوچهده یاناکی، یئنجهک [خرچنگ] کیمی حرکت ائدیردیم.
او، بیلیردی، من یاناکی گئدیرم؛ او بیلیردی، نؤوبتچی “بوببی” تینین هاراسیندا دایانیب، او اطرافداکی هر شئیی بیلیردی. اوزاقلاشدیغیمی گؤرنده منیمله اویناماغا باشلادی. بیسکویت ایستهین ایت کیمی باشینی چیینینه طرف أییب اوزونه تؤکولن ساچلارینین آراسیندان منه باخدی. او گولومسهدی، تینی دؤنه-دؤنه من ده گولومسهدیم. آیاققابی سسی ائشیدیلدی، او دا تیندن گؤروندو. اوتوراجاقدا اوتوراندا دا یاراشیقلی گؤرونن قیز آیاق اوستده داها چهکیجی گؤرونوردو. اصلینده بؤیوک قیز اوچون اولان بؤرکوندن آنجاق خاطیرهلر قالمیشدی. باشینا قویدوغو بو باش گئییمی پئیسرینه دوشموشدو. قیرمیزی أتهیی دئشیک-دئشیک ایدی، گونده قارالمیش یالین آیاقلارینا قادین آیاققابیلاری گئیینمیشدی. بوداغی یئللهده-یئللهده دالیمجا گلیردی. منیمله برابرلشنده آشاغیدان اوزومه باخیب یئنه دالا قالیردی.
یولدان کئچنلر اونا دقتله باخیردیلار، او ایسه فکر وئرمیردی.
اوکسفورد خییاوانیندا دایانیب دانیشدیق. صحبت بیرجه سؤزدن کئچیردی:
- شکرلمه [آبنبات/قندی] ایستهییرسن؟
من گئتدیم، او بوداغی ویترینین شوشهسینه وورا-وورا و ایری قارا گؤزلریله دالیمجا باخا-باخا قالدی.
نؤوبتی دفعه دالا باخاندا او، باشقا اوشاقلارلا اویناییردی، اونون قیرمیزی أتهیی ایسه آداملا دولو کوچهده فیرلانیردی.
آچیقلاما:
1. چئویرن: حمید پیرییئو
2. جون قولسورسی، اینیگیسجه؛ John Galsworthy، فارسجا؛ جان گالزورثی. جون قولسورسی [1867-1933]، اینگیلیس یازیچی و دراماتورق [نمایشنامه یازاری]، مشهور "فورسایتلار حاقیندا ساقا" سیلسیلهسینین مؤلفی، ادبیات اوزره نوبئل اؤدولونون قازانانی (1932).
Günəş ilə Günəbaxan - hekayəcik
yazar: Hüseyn Vahidi
Sarı saçlı günəş, göyə dırmaşmış dağların arxasında, xoruzun banlamasını gözələyirdi. Axşamdan, buğda tarlasında olan yalnız günəbaxan isə qara dənələrini günəşin batan yerinə tutub, günəşi görmək ümidilə yuxlamışdı.
Bir azdan, xoruz, səsini başına atdı. Kənd evlərinin çıraqları bir-bir işıqlandı. Günəş gözələdiyi anı görüncə doğmağa başladı. Günəbaxan, sevincək yuxudan oyandı. Sevədiyi günəşi bırdaha görə biləcəyinə çıçəyı çartladı.
Çox keçəmədi günəş göy üzündə, hər yanı baxışı altına aldı. Günəbaxan, günəş bunun üçün gəlibdir deyə, üzün ondan çevirəmirdi. O, uçub günəşin yanına getmək arzusundaydı.
Yavaş-yavaş axşam gəlib çatırdı. Günəş yerə sərdiyi saçlarını darayıb, hörməyə başlamışdı. Günəbaxan isə günəşin getəməsindən üzülürdü. O, bilirdi birazdan günəş batıdakı uca dağın arxasına gedib yox olacaqdır.
Çox çəkəmədi günəş dalına baxmadan, batının lap o uzaqlarında itərək qaranlığı yadigar qoydu.
ایسوپیا İsopiya
ایسوپیا
یازار: گونئل ائیوازلی Günel Eyvazlı
کؤچورن: حسین واحدی
یانما! آتش سویوقدور. اوندان قورخدوغوندان سنی یاندیرار. کیبریت چؤپونون اوجوندا گزیشن آلووا دقتله باخ، ایستهسن بارماغینی یاندیرماز. بلکه درینه یونگولجه توخونا بیلر. او سنی سئوسه، قویماز کول اولاسان. نئجه کی، مینیللیکلر اؤنجه أللری باغلی آتشه آتیلان ایبراهیمی آلوو سالامات ساخلادی. آذرین اوغلو یانا بیلمزدی. اونون داخیلینده قیغیلجیم وار ایدی. اود اونو سئویردی. اگر داخیلینده قیغیلجیم وارسا بیرگه آتشلنهجکسن. بوزا بنزهسن قارلا، ایستییه بنزهسن گونشله دوست اولاجاقسان. باخ، ایچینده نه گزدیریرسن؟
یول سنی هارا ایستهسن آپارا بیلر. سن هارا گئتمک ایستهدیگینی بیلیرسنمی؟
بیر ساعاتین حیکایهسی Bir saatın hekayəsi
بیر ساعاتین حیکایهسی
یازار: کئیت شوپین*
کؤچورن: حسین واحدی
خانیم ماللاردین اورک آغریسیندان اذیت چکدیگینی اوزون زامان ایدی بیلیردیک. بونا گؤره ده، ألیمیزدن گلنی ائدیردیک، حیات یولداشینین اؤلوم خبرینی اونا اولدوغو قدر داها یومشاق شکیلده چاتدیراق.
اونون باجیسی ژوسئفین قیریق جملهلرله اولانلاری ناغیل ائتدی؛ بوتون مسئله آیدین اولدو. اونون حیات یولداشینین دوستو ریچارد دا بورادا، اونون یانیندا ایدی. او، برئنتلی ماللاردین دا آدینین “اؤلنلرین” سیاهیسیندا قئید اولوندوغو دمیریول قضاسی ایله باغلی خبر لیستی اولاندا اورادا ایدی. آنجاق بو خبری تصدیق ائتمک اوچون ایکینجی تئلئقرامی گؤزلهدی و سسسیزجه بو آجییا دؤزهرک، بونو هامیدان قاباق خبر وئرمک اوچون تَلَسدی.
دئن مؤرفی / حیکایه
دئن
مؤرفی
(دول قادینین اعتراضی)
یازار: مارک توین
حاضیرلایان: حسین واحدی
“بو ایللر ایچینده، منیم دقتیمی چکن أن نیسگیللی احوالاتلاردان بیری ده ساواش دؤورونده بورادا- کارنینق شهرینده باش وئرمیشدی”- بونو دئین بانکین ایشچیسی سؤزه باشلادی.
مضحکه
مضحکه
یازار: اوزئییر حاجیبَیلی
کؤچورن: حسین واحدی
کندلینین بیری بوغداسینی، باراماسینی آپاریب بازاردا دهیر-دهیمزینه ساتیب بیر دنه آت، بیر دنه ائششک و أینینه ده بیر دست پالتار آلیب، ائوینه طرف گئدیردی....
بیر نفر بَی بونو گئندن گؤردو و تعجب ائلهدی کی، کندلینین هم آتی وار، هم ده ائششهیی. دالدان کندلییه یاخینلاشیب باشینا ائله بیر قاپاز سالدی کی، کندلی آنجاق بیر ساعاتدان سونرا آییلا بیلدی و آییلاندان سونرا دا باخیب گؤردو کی، ائششک یوخدور.
یاساوول* کندلینین آتینا باخیب شکایتینه قولاق آسدی، آما شکایت "حاققی" آز اولدوغونا گؤره، کندلییه بیر نئچه دنه قامچی چکدی و دئدی:
- باغلا آتینی بورادا، گئت اطرافی گز، بلکه ائششهیین تاپیلا.
Azərbaycan bitkiləri آذربایجان بیتکیلری
Urmiyə təbiətində olan yeməli və dərman bitkilər
اورمیه طبیعتینده اولان یئمهلی و درمان بیتکیلر
* حاضیرلایان Hazırlayan: حسین واحدی Hüseyn Vahidi
یاز فصلینده آذربایجان دیارینین بیر چوخ یئرلرینده او جملهدن اورمیهده یئمهلی و درمان اوچون عرقین چکمهلی بیتکیلر واردیر. اونلارین سایی حدسیز حسابسیزدی. او ترهلر ایله بیتکیلردن أن چوخ تانینمیشلاریندان بیر نئچهسینی آشاغیدا اوخویا بیلرسینیز.
Yaz (bahar) mövsümündə
Azərbaycanın bir çox yerlərində o cümlədən Urmiyə,də yeməli və dərman üçün
arağın çəkməli bitkilər vardır. Onların sayı hədsiz hesabsızdı. O tərələrin ən çox tanınmışlarından bir neçəsini aşağıda oxuya bilərsiniz.
یئنی امکداش/حیکایه Yeni əməkdaş
یئنی امکداش
یازار: حسین واحدی
اورمیهنین لاستیک فابریکاسینین آمبار بؤلومونده چالیشان 43 یاشلی جاوادین داخلی تئلفونو زنگ چالماغا باشلادی. جاواد بیلگیسایاردان ال چکیب دستهیی گؤتوروب اینجه سسله دئدی:
«آلو، سالام بویورون»
خط دالیندا عصبلی سسله دئییلدی:
«علیک! تئز تئلفونو وئر جاوادا ایشیم وار»
«آغا جاواد بورادا دئییل»
«هارا گئتدی»
«گئدیب حاماما، یووونا اولا شاماما»
«سن کیمسن؟»
«من رجبم، آمبارین یئنی ایشچیسی... آلو...»
ماغارا / حیکایه Mağara
ماغارا
یازار: کمال عبدالله
کؤچورن: حسین واحدی
گــئـجه یاغماغا باشلایان یاغیش سحره یاخین قفیلدن کسدی. او، یاغیشی بهانه ائدیب ایشه گئتمک ایستمیردی، آما ایندی بو مومکون اولمایاجاقدی.
– سن نئجه آدامسان؟! بو گئجه دئمهدینمی، صاباح بوتون گونو بیر یئرده اولاجاغیق؟! گئتمه ایشه. – اورکک-اورکک اونا باخان آروادی گؤزلریله، آز قالا، یالواردی.
او بیلمهدی، سؤزونه صاحب چیخماماقدا اونو گوناهلاندیران آروادینا نه جاواب وئرسین.
"آلینمیر کی، آلینمیر. هئچ نه بارهده دوشونمهمک، هئچ نهیین دردینه قالماماق، قایغیدان، ناراحاتلیقدان کنار، بیرجه گون ده اولسون، یاشاماق – آلینمیر".
بو دوشونجهلرله ایندی او اؤز ایش اوتاغینا گیرمک اوچون دهلیزی ساغا دؤنهجک، ألینی جیبینه سالیب اوتاغین آچارینی چیخاراجاقدی.
قاپینی آچیب ایچری گیردی. اوتاقداکی دییشیکلیک او دقیقه دقتینی چکدی. اوتاغین کوچهیه آچیلان یئگانه پنجرهسیندن اوّللر اونون هئچ واخت گؤرمدیگی بیر خالچا آسیلمیشدی و بو خالچا پنجرهنین اوزونو تامامن توتموشدو. بئله کی، پنجره هئچ گؤرونموردو. خالچانین جانلی ناخیشلاری، رسملری وار ایدی. خالچادا تصویر ائدیلن یئر بیر بازار کوچهسی ایدی، بو بازار کوچهسینده ساغدا، سولدا بالاجا دوکانلاردا جانلی گؤرونن آداملار جدی-جهدله آلیش-وئریشلرینی ائدیردیلر.
گؤزلرینی خالچاداکی رسمدن آییرا بیلمیردی. کیم گتیریب بو خالچانی آسیب بورا؟ بو هارانین کوچهسیدی؟ بورادا ایندی هانسی زمانه، هانسی ایامدیر؟ بو سواللارین بیر جاوابی یوخ ایدی.
حیاتین ایلك و سون آنلامی سئوگیدیر
رعنا خانیم زارع ایله بیر چایلیق صؤحبت
رعنا زارع: حیاتین ایلك و سون آنلامی سئوگیدیر
دانیشیق آپاران: حسین واحدی
1367بایرام درگیسی- –جی گونش ایلینین آبان [قیروو] آییندا، قارلی بیرگونده، قوجامان تبریزده دونیایا گؤز آچدی. عائلهنین 5جی اوشاغی اولوب, سسسیز بیر اوشاقلیق عالمینده بویا-باشا چاتماغا آددیم آتدی. اؤزو دئییر:
" اوشاق اولا بیلمهدیم چوخ. اؤزومدن بیر تصویر یادیمدا قالسا اوشاقلیقدان، اودا كیپریك چالمادان باخماق، سوسماق اولدو".
شعری، یاشاییشی عشق ایله برابر بیلهن شاعر، گؤزل بیر دوشونجهلر ایله شعرلرینی دیلیمیزه اتحاف ائدیر. بیر چایلیق صؤحبتیمیز اولوب عزیز شاعرهمیز رعنا خانیم زارع ایله بویورون اوخویون.