Günəş ilə Günəbaxan - hekayəcik
yazar: Hüseyn Vahidi
Sarı saçlı günəş, göyə dırmaşmış dağların arxasında, xoruzun banlamasını gözələyirdi. Axşamdan, buğda tarlasında olan yalnız günəbaxan isə qara dənələrini günəşin batan yerinə tutub, günəşi görmək ümidilə yuxlamışdı.
Bir azdan, xoruz, səsini başına atdı. Kənd evlərinin çıraqları bir-bir işıqlandı. Günəş gözələdiyi anı görüncə doğmağa başladı. Günəbaxan, sevincək yuxudan oyandı. Sevədiyi günəşi bırdaha görə biləcəyinə çıçəyı çartladı.
Çox keçəmədi günəş göy üzündə, hər yanı baxışı altına aldı. Günəbaxan, günəş bunun üçün gəlibdir deyə, üzün ondan çevirəmirdi. O, uçub günəşin yanına getmək arzusundaydı.
Yavaş-yavaş axşam gəlib çatırdı. Günəş yerə sərdiyi saçlarını darayıb, hörməyə başlamışdı. Günəbaxan isə günəşin getəməsindən üzülürdü. O, bilirdi birazdan günəş batıdakı uca dağın arxasına gedib yox olacaqdır.
Çox çəkəmədi günəş dalına baxmadan, batının lap o uzaqlarında itərək qaranlığı yadigar qoydu.
موری/ حیکایهجیک
موری
یازار: روبرت والزر
چئویرن: حسین واحدی
گونلرین بیر گونو، بیر کیشی وارییدی "موری" آدیندا. پالتارلاری همیشه دوزنلی[مرتب] اولان بیر کیشی ایدی. البته بؤرکو بیرآز کؤهنه و بوزارمیش گؤرونوردو. آما مورینین اصیل قیافهسی چوخ جدی اولماسیندایدی. اؤزونه چوخ جدی بیر قیافه توتوردو، ائله باخیری ائلهبیل ایندی اؤلمهلی ایدی. باشقالارینا حیاتین اؤنونده بئله بیر قیافه توتان آداملار، سئویلمزلر. موری دئمک اولار اورتاعصرین پهلوانلارینا اوخشاییردی، بیر قولدور کیمی ایدی. دوشونجهلی گؤرونوردو، دوشونجهلی گؤرونن آداملار دا اورهیهیاتان دئییل. خالق[ائل/جاماعات] بئله قاتل سانیلان آداملارین الیندن قاچارلار. یاخشی اینسانلارین ان دوشونجهلیسی خاچا[صلیبه] چکیلیب، خاچ اوزهرینده ایسه اورکیاخان اؤلوم ایله جان وئردی.
موری خوشقلب ایدی، هم یاخشی آدام ایدی همده باشآشاغی ایدی، فقط حددن آرتیق جدی ایدی. خالق ائله قورخو ایله اونا باخیردیلار ائلهبیل باشلارینا بیر بلا گتیرمهیی گؤزلهییردیلر. آما موری مردیمآزار[مردمآزار] دئییلدی، فقط جدی ایدی. شنگول اولوب گوله بیلمیردی. شوخلوق[ظارافات]دا ائده بیلمیردی. ائله بوکی بیر کیمسه شاد اولماییب حیاتی جدی توتا، ائلین[خلقین] گؤزونده آزجا شوبههلی گؤرونمهیه یئترلیدی. موری خالقین هامیسینا چوخ جدی، قورخولو و شکلی باخیردی.
ویجدان/حیکایهجیک
ویجدان
یازار: ایتالو کالوینو*
کؤچورن: حسین واحدی
محاربه باشلایاندا لویجی آدلی بیر آدام تاپیلمیشدی، کؤنوللو یازیلماق ایستهییردی. هامی اونو تعریفلهییب گؤیلره قالدیریردی.
لویجی سلاح پایلانیلان یئره گئدیب بیرینی گؤتوروب دئدی: “ایندی گئدیب آلبئرتونو اؤلدورهجم”. اوندان آلبئرتونون کیم اولدوغونو سوروشدولار. “دوشمندیر آلبئرتو، منیم دوشمنیم”، - دئیه جاواب وئردی. اونا ایستدییی هر آدامی اؤلدورمهیه ایجازه وئریلمهدییینی، یالنیز بللی دوشمنلری اؤلدورمهلی اولدوغونو باشا سالماق ایستهینده، “نهدی؟!” دئییب بوزاردی: “سیز منی آخماقمی ساییرسیز؟ آلبئرتو ائله ان بؤیوک دوشمندی. اونلارا قارشی محاربهیه باشلادیغینیزی ائشیدنده، درحال سیزه قوشولمالی اولدوغومو دوشوندوم، چونکی یالنیز بو حالدا آلبئرتونو اؤلدوره بیلردیم. ائله بونا گؤره ایندی یانینیزدایام. اونو یاخشی تانیییرام، اجلافین، آلچاغین یئکهسیدیر. منله خاینجهسینه داوراندی، قادینین یانیندا اوزوقارا اولدوم، آلچالدیم... کؤهنه صحبتدی، ایستهییرسیزسه سیزه دانیشیم”.
- یوخ، لازیم دئییل، سنی باشا دوشوروک، - یولداشلاری دئدی.
- یاخشی، اوندا منه آلبئرتونون هاردا گیزلندییینی دئیین.
- بیلمیریک.
- عئیبی یوخ، اونون یئرینی بیلن بیرینی تاپارام. اونسوز دا اول-آخیر الیمه کئچهجک.