اوغرو اولماق ایسته ییرم

  یازان : حسین واحدی 

هامی نی دیندیردیم، دئدیم« نه اولماق ایسته ییر دینیز؟» بیلمه دیم ندن هئچ كیمسه اوغرو اولماق ایسته مدی؟ اؤز- اؤزومله؛ «چوخ گؤزل یوردوما دوزلوك گلیب دیر، اوغرولار بو یورددان كؤچوب لر، دوزلوك لره یئرلرین وئریب لر، نه گؤزل!» -دئدیم.

سونوندا اؤزومدن سوروشدوم بو سورویو؟ آی اوغلان سن ایسه نه اولماق ایسته ییرسن؟ هئچ بونا بیر آن دا دوشونوبسن می؟ قاییدیب اؤزومه بیله سؤیله دیم:

من اوغرو اولماق ایسته ییرم یوردوما، دام- دوواریندان دیرماشام هر گون، ائلیمین ائولریندن كدری- غمی اؤزومله اوغورلایب آپارام !

اوغرو اولماق ایسته ییرم، گیزلیجه گیرم خالقیمین اوركلرینه، الجك تاخام اللریمه، اوركلریندن كینی- نیفرتی، قازدیریب اؤزومله آپارام!

اوغرو اولماق ایسته ییرم، آخشام اوستو ائولره گئدم، تلویزیونلاری اوغورلایام، بلكه سئوگینی یئرینه قویام، اینسانلار آیریلمایا بیر- بیریندن، فیكیرلر عاییله یانیندا اولا، سریال لار- فیلم لر آرادان گئده، اوشاقلار، عاییله مئیدانا گیره!

اوغرو اولماق ایسته ییرم، دینمه دن، سس سیزجه یوردوما گیرم، هئچ كیم بیلمه دن ائله جه گئدم، كیمسه بیلمه یه آیریلیق نئجه اولدو، كیم اوغور لادی كیم قویمادی قارداش-قارداش دان، آتا- بالادان، باجی- باجی دان آیریلا بیلسین، هئچ كیمه دئمه رم من اوغورلادیم ، من آپارمیشام آیریلیغینیزی، تاپا بیلمه سیز اونو هئچ یئردن، قایتارمارام بیر داها سیزه!

اوغرو اولماق ایسته ییرم، آنا دنیزلرین سویونا گئدیب دنیز بیلمه دن سو لارین قاپام، اؤزومله، قورموش گؤلومه گتیرم، قویمایام قورویا، اوركلر سولا!

اوغرو اولماق ایسته ییرم، قارانلیق دوشنده، گیرم یوردوما، آج لیغی، یوخسول لوغو گؤتوروب قاچام، قویمایام بیر اوشاق آج یاتا بیلسین، حسرت ده قویام یوخسول لوغو من!

اوغرو اولماق ایسته ییرم، من لیغی- غرورو، سوی تاپینماسین، اوغورلاییب آپارام، قویمایام كیمسه دئیه بیرینه من سندن اوستونم، اؤنجه گلمیشم!

اوغرو اولماق ایسته ییرم، گونش چیخمامیش گیرم یوردوما، بوتون دوشمنلیك لری گؤتوروب قاچام، قویمایام ساواشی، قالا یوردوما، یئرینه باریشی- صولحو وئرم من!

 اوغرو اولماق ایسته ییرم، بوتون ساتقین لاری اوغورلایام ائلیمدن، ائلیمده راحاتجا نفسین چكه، قویمایام یارپاقلاری سولا ائلیمین!

اوغرو اولماق ایسته ییرم، بوتون سیلاحلاری یئر اوزوندن اوغورلاماق ایسته ییرم...

اوغرو اولماق ایسته ییرم من، یازیلاریمدان حاققی سیلن اولسا، اونو اوغورلاماق ایسته ییرم من، قویمارام یازیلاریمدان حاق سؤزو سیلینیب آلینسین مندن!

عزیز اوخوجولاریمیز،  بو یازینی یازماغا گؤره یولا دوشوب، 9/1/1391 تاریخینده قوشاچایین گؤل کندینه گئدیب ، قوجامان و آغ ساققال آشیغیمیز اوستاد میکاییل سلیمانی ایله گؤروشموشوک. گؤل کندی قوشاچایین گونئیینده یئرلشیر و بو شهردن 15 کیلومتر آرالی­دیر. ائشیتمیشدیک اوستادیمیز بیر آز خسته احوالدیر، بونا گؤره اونونلا گؤروشمگی اؤزوموزه بورج بیله­رک، گؤروشونه گئتدیک. گؤل کندینه یئتدیگیمیزده ، آشیغی شهره دوکتورا آپارمیشدیلار، بونا گؤره آشیغین اوغلونا زنگ آچیب و آشیغین حالیندان نگران اولدوغوموزا گؤره، اوندان آشیغی سوردوق. حالینین یاخشی اولدوغونو ائشیتدیگیمیزده سئوینه­رک، کندده اونون یولونو گؤزله­ دیک. نهایت آشیق میکاییل گلیب، چاتدی. اوستادیمیزلا، گؤروشدوگوموزدن سونرا اونونلا صمیمی بیر دانیشیق آپاردیق. اوستادیمیزین تزه دوکتوردن گلمه­سینه باخمایاراق، بیزی ایستی و سئوگی دولو قوجاقلا قارشیلاماسی بیزه بیر قوناق پرورلیک درسی اولدو. اوستادیمیزا جان ساغلیغی آرزیلایاراق، سیزی دانیشیغیمیزی اوخومایا دعوت ائدیرم.

اوستاد اؤزونوزو تانیتدیرین، لطفاً؟

من آشیق میکاییل سلیمانی، 1309-جو ایلده قوشاچایین گؤل کندینده دونیایا گلمیشم. 17-18 یاشلاریمدان آشیقلیغا علاقه یئتیریب و بو صنعتین دالیجا گئتمیشم. آتام دا راضی دگیلدی من آشیق اولام. چون اکینچی بیر عایله ایدیک و قارداشیم دا یوخ ایدی، دئییردی گل منه کؤمک ائت. حتی بیر دفعه گئدیب بیر ساز آلدیم. آما آتام منی مجبور ائیله دی قایتارام. من ده ال چکن دگیلدیم. سونرا آتامین مخالف اولماغینا باخمایاراق، گئدیب بیر ساز آلدیم.

اوستاد کیمدن ساز اؤیرندینیز؟

من بیر جار شیرین کندلی آشیق فرامرز امین پورون یانینا گئدیب و اوندان اؤیرنمگه باشلادیم. آز مدت اونون یانیندا اؤیرندیگیمدن سونرا، آشیق حسن عدلین یانینا گئدیب و اونا خدمت ائیله دیم.

نئچه ایل آشیق حسندن ساز اؤیره نیبسینیز؟

من تقریباً آلتی ایل آشیق حسنه شاگردلیک ائتمیشم. 23 یاشیندان دا آشیقلیق ائتمیشم.

اوستادینیز، آشیق حسن کیم ایدی، هارالی ایدی؟

آشیق حسن، قاشیقچی کندیندن ایدی. گؤزل چالیب، اوخویاردی. اصلی آدی حسن عدل ایدی. آما هامی آشیق حسن قاشیقچی آدی ایله اونو چاغیراردی. اوغلودا آشیقدیر. اوغلونوندا آدی، آشیق باراتدی.

یاواش- یاواش

 شعر:تورک اوغلو

یاواش- یاواش

عاشیغام اؤلدورمه انصافین اولسون

آلساندا جانیمی آل یاواش- یاواش

گل اوتور یانیمدا یانیر اوره‌ییم

قولونو بوینوما سال یاواش- یاواش

گل چیخاق چمنی سئیر ائد‌ک قوشا

اغیارین اوره‌یی چیرپیلسین داشا

من سرو قدینه ائدیم تاماشا

سنده اؤز سازینی چال یاواش- یاواش

سئومیشم گلنده سنی، بولاقدان

عطرینی آلارام گؤرسم اوزاقدان

گل باسیم باغریما اؤپوم یاناقدان

سوروشسون باشیندان شال یاواش- یاواش

«تورک اوغلو» سئویله‌ییر دوشدوم دیللره

منی مجنون ائدیب سالدین چؤل‌لره

سئوگیلیم قولاق آس بونیسگیل‌لره

دوشدو اوره‌ییمه خال یاواش- یاواش

کوچه قاپیلارینین باشلیق لاریندان

یازان: رضا همراز

لاپ ایندی کی کیمی یادیمدا دیر . ان آزی اوتوز – اوتوز بئش ایل بوندان قاباق بیزیم آتا – بابا محله میز اولان دوچی ده کوچه لر اوزون اولوب آنجاق دربند لر ده ائله اوندان بیر آز قیسا اولوب ؛ نه ایسه بوروق – بوروق اولاردی لار . بیز اوشاقلارین اویناماق یئریمیز ده ائله او دار – دودوک کوچه لر اولاردی . اونودا مکتبدن قایداندا یا خود مکتبه گئتمه دن . بیزیم او دوور اویونلاریمیزین اساسین توپ ؛ پیل دسته ؛ توپ عربی ؛ بابی – بابی آدلی بیر اویون ؛ گیزلن قاچ ؛ تکر سورمه و بو کیمی لر احتوا ائدیب ؛ قیزلارین کی لاری ایسه آیاق جیزیغی ؛ قوناق – باجی و بو سیرالاردا اویونلار اولاردی لار . همین بو اوینایب یا خود محله میزدن مکتبه یوللاناندا گاهدان گورردین ایستر – ایسته مز گوزوم کوچه قاپیلارینین اوستونده یازیلان بیر سیرا یازیلارا ساتاشاردی .

 بو یازی لارین بیر چوخو عربجه اولوب آنجاق گوزل خط لرله بیر کاشی نین یا تابلو سایاق بیر اعلا داشلارین ایچینده یازیلاردی لار . خط لری عمومیت له نستعلیق اولاردی کی او دورلر بیز یاشدا اولان اوشاقلارا اوخونماسی بیر اوقدر ده راحات اولاسی دئییل دیر . بو یازی لاردان او ائوده اوتورانلارین ایناجلارین داها آرتیق سئچمک اولا بیلردی .  ((تاسف له او بویوک – بویوک ائولر له ؛حیط لر بولدوزرلرین دمینه وئریلیب ؛ یئرلرینده ایسه دورد مرتبه ؛ بئش مرتبه و نه بیلیم نئچه مرتبه آپارتومانلار سالینمیش ؛ تاریخیمیزین بعضی صحیفه لری بو سایاق آرادان قالدیریلمیش لار . حله ده رحمتلی بویوک آنامین همین حیط لرده کردی قیراقلاریندا آخشاملار چای – سماور بساطی دوشه یب دویمج تیکه لرینین دادی داماغیمدا دی . اونلارین تاپیشیریغی ایله اکثرا ارلیک اولان قیزلار حیطی سولایب – سوپوروب ؛ کردی دن بیر سیرا عطیرلی ریحاندان ؛ سوزودان نه بیلیم هانسی گویدن بیچیب سونرا گردینی سولایب پالازلاری دورد بوجاق کرپیچ لرین اوستونه دوشردیلر .

  اورادا عمومیت لر  سوفره دوشه نیب هره بیر تیکه ده آغیزلارینا دویمج ؛ پنیر چورک ؛ خیار – بامادر و ... قویاردیلار . خیارلاری سویاندا عطیرلریندن آدامین قوللاری بوغولاردی . بورا توپلانانلارین بیر چوخو قوهوم – طایفا اولوب ؛ بیر چوخ واخت لار یاخین قونشو لاردا توپلاناردی لار . خاص بیر گونلرده قادین لار سورمه یا وسمه چگیر ؛ چالیب اوخویوب ؛ قاش آلدیریب و  گاهدان آیاقلارینا یا اللرینه خنادا یاخاردی لار . کندلرین بو جمع لرینده گلفچه لر قورولوب یوماق توخویاردی لار . بورادا بویوک تصمیم لرده توتولاردی . بیری قیز آختاراندا اونا یاردیمچی اولوب ؛ اوغلان ائوله ندیره نده هابئله . بو توپلانتی لارین داها گوزل مزیت لریندن یا خود فایدالاریندان هامی نین بیری بیریندن خبرلی اولماسی اولا بیلردی . ))

سوز کوچه قاپیلارینین باشیندا گئدن یازی لاردان گئدی دی کی بو گون اونلارین نمونه لرین تاسف له چوخ آز تاپا بیلریک . بو نودا آرتیرمالی یام کی بو یازی لارین بیر چوخونون زمینه سینین رنگی ماوی اولاردی . بو رنگی بیز بو گون تبریزین گوزل عابیده لریندن اولان گوی مچیدین کاشی لاریندا گوره بیله ریک . منیم یادیمدا قالان یازی لاردان بونلاری خاطیرلایا بیلیرم .

هو الفتاح العلی العظیم

هوالرزاق ( بو سوز بیر چوخ توکانلارین باشیندا یازیلاردی )

بسم الله الرحمن الرحیم

وان یکاد الذی ...

نصر من الله

النظافه من الایمان ( بو حدیث ده داها چوخ حاماملارین گیره جک یئرلرینده ویریلاردی .)

یدا... فوق ایدیهم

هو الحق

الله

و ...

رحمتلیك آشیق علی علیزاده ­نین شعرلری او مرحومون وفاتینین بیرینجی ایل دؤنومو عرفه­سینده بیر مجموعه­ده یایینلاندی.  302 صحیفه ­دن تشكیل تاپان بو كتاب، خاطرلا منی آدینی داشی­ییر و او مرحوم آشیغین 300 قاطارا یاخین شعرینه شامل اولور. بو مجموعه اورمولو شاعر ، آراشدیریجی،یازیچی و رحمتلیك آشیق علی علیزاده­نین یاخین یولداشی بهرام اسدی­نین زحمتلری ایله توپلانیب و چاپا بوراخیلیبدیر.

اورمونون یاز نشریاتی­نین نشرلریندن اولان بو كتاب، ساتیشی 8000 تومن دیر و یازنشریاتی ایله اورمونون حوزه هنری اداره­سینین امكداشلیغی ایله یایینلانیب.

یاز نشریاتی: http://yaznashr.blogfa.com

گنج آشیقلار: http://gencashiqlar.blogfa.com

ایمیل: yaznashr@gmail.com

موبایل: 09141477792

قارا کؤینه گیم

 یازن: حسین واحدی

    بوگون بیر قارا کؤینک گئیمیشدیم. هئچ بیلمزدیم, هامی منیم گئییمیمه بو قدر دقت ائدیرلر. منه یئتیشن یولداش یوخسا تانیش, «نه اولوب؟ نه دن قارا کؤینک گئییبسن؟» دئییردی! آنجاق منیم بو قارا کؤینه گیمین یاخاسی مُور بویادا ایدی, همده دوگمه لرینین  یانیندان دا ائله بو بویادا ساپدان بیر جیزگی چکیلمیشدی.                                        

اؤز-اؤزومله, «من بو کؤینه گی,  بیرینین یاسیندا گئیسه یدم سه, اؤلو صاحیبلری, قارا بویانی یوخ, ائله او مور بویانی گؤروب, اؤلوله رینه, سایقیسیزلیق (احترامسیزلیق) ائتمیشه می, دوشونه جک ایدیلر.» دوشوندوم.!!