آشیق میکاییل سلیمانی ایله مصاحبه
آشیق میکاییل سلیمانی ایله مصاحبه/ دانیشیق آپاران: احمد اسدی
عزیز اوخوجولاریمیز، بو یازینی یازماغا گؤره یولا دوشوب، 9/1/1391 تاریخینده قوشاچایین گؤل کندینه گئدیب ، قوجامان و آغ ساققال آشیغیمیز اوستاد میکاییل سلیمانی ایله گؤروشموشوک. گؤل کندی قوشاچایین گونئیینده یئرلشیر و بو شهردن 15 کیلومتر آرالیدیر. ائشیتمیشدیک اوستادیمیز بیر آز خسته احوالدیر، بونا گؤره اونونلا گؤروشمگی اؤزوموزه بورج بیلهرک، گؤروشونه گئتدیک. گؤل کندینه یئتدیگیمیزده ، آشیغی شهره دوکتورا آپارمیشدیلار، بونا گؤره آشیغین اوغلونا زنگ آچیب و آشیغین حالیندان نگران اولدوغوموزا گؤره، اوندان آشیغی سوردوق. حالینین یاخشی اولدوغونو ائشیتدیگیمیزده سئوینهرک، کندده اونون یولونو گؤزله دیک. نهایت آشیق میکاییل گلیب، چاتدی. اوستادیمیزلا، گؤروشدوگوموزدن سونرا اونونلا صمیمی بیر دانیشیق آپاردیق. اوستادیمیزین تزه دوکتوردن گلمهسینه باخمایاراق، بیزی ایستی و سئوگی دولو قوجاقلا قارشیلاماسی بیزه بیر قوناق پرورلیک درسی اولدو. اوستادیمیزا جان ساغلیغی آرزیلایاراق، سیزی دانیشیغیمیزی اوخومایا دعوت ائدیرم.
اوستاد اؤزونوزو تانیتدیرین، لطفاً؟
من آشیق میکاییل سلیمانی، 1309-جو ایلده قوشاچایین گؤل کندینده دونیایا گلمیشم. 17-18 یاشلاریمدان آشیقلیغا علاقه یئتیریب و بو صنعتین دالیجا گئتمیشم. آتام دا راضی دگیلدی من آشیق اولام. چون اکینچی بیر عایله ایدیک و قارداشیم دا یوخ ایدی، دئییردی گل منه کؤمک ائت. حتی بیر دفعه گئدیب بیر ساز آلدیم. آما آتام منی مجبور ائیله دی قایتارام. من ده ال چکن دگیلدیم. سونرا آتامین مخالف اولماغینا باخمایاراق، گئدیب بیر ساز آلدیم.
اوستاد کیمدن ساز اؤیرندینیز؟
من بیر جار شیرین کندلی آشیق فرامرز امین پورون یانینا گئدیب و اوندان اؤیرنمگه باشلادیم. آز مدت اونون یانیندا اؤیرندیگیمدن سونرا، آشیق حسن عدلین یانینا گئدیب و اونا خدمت ائیله دیم.
نئچه ایل آشیق حسندن ساز اؤیره نیبسینیز؟
من تقریباً آلتی ایل آشیق حسنه شاگردلیک ائتمیشم. 23 یاشیندان دا آشیقلیق ائتمیشم.
اوستادینیز، آشیق حسن کیم ایدی، هارالی ایدی؟
آشیق حسن، قاشیقچی کندیندن ایدی. گؤزل چالیب، اوخویاردی. اصلی آدی حسن عدل ایدی. آما هامی آشیق حسن قاشیقچی آدی ایله اونو چاغیراردی. اوغلودا آشیقدیر. اوغلونوندا آدی، آشیق باراتدی.
