ماهنی درگیسینین ایلک ساییسی یاییلدی
ماهنی درگیسینین ایلک ساییسی یاییلدی
تورکجه-فارسجا اولان «ماهنی» درگیسینین ایلک ساییسی یاییلدی.
بو درگی، غربی آذربایجان، شرقی آذربایجان،
زنجان و اردبیل اوستانلاریندا یاییلاجاقدیر. درگی‌نین ایلک سایی‌سینین اصلی
موضوعسو «آذربایجانین طنز ادبیاتی»نا مخصوصدور. بونون یانیندا مختلف ادبی،
اجتماعی و کولتورل یازیلار تورکجه و فارسجا دیللرینده یئرله‌شیبدیر.
نشریه‌نین مسئول مدیری، اورمیه‌لی ژورنالیست خانیم «ندا عبدی»-دیر و جناب
«بهرنگ منتخبی» ایسه مدیرین معاونی و اجرایی مدیر عنوانیندا فعالیت ائدیر.
فارسجا بؤلومونون باش یازاری جناب «حامد عطایی» و تورکجه بؤلومونون باش
یازاری ایسه جناب «حسین واحدی»-دیرلر. بونلارین یانیندا اورمیه‌نین و آیری
شهرلردن اولان ده‌یرلی یازیچی‌لار و آراشدیرماچیلار او جمله‌دن «احمد
اسدی»، «مهران محمودی»، «آیدین بابائی»، «داوود حیدرخانی»، «علیرضا
میرزائی»، «طاهره نوید آرین» و… فعالیت ائدیرلر.
درگی‌نین ایلک سایی‌سیندا طنز ادبیاتیمیزا دایر پرونده‌نین یانیندا بو یازیلاری دا اوخویا بیلرسینیز:
- مصاحبه با اسماعیل حیدری
– طنازی در اوج بلا و مصیبت
– برای هر کسی یک روز عاشوراست
– مصاحبه با استاد کریمی مراغه‌ای
– خنده‌ای به قیمت از دست دادن یک فرهنگ
- ائل سئودی، کیم ائلین عشقینه یازدی (به یاد عمران صلاحی)
- هابیل علی‌یئو
– ظرافت سؤزلری شیرین اولوبدور
– حیکایه‌لر
– آذربایجان ادبیاتیندا طنز
و …
ماهنی درگیسی ۵۰۰۰ مین تومن قیمت ایله ساتیلاجاق و اومید ائدیریک ده‌یرلی
خالقیمیز اؤز حمایه‌لری ایله نشریه‌نین داواملی اولماسینا کؤمک اولالار.
ماهنی درگی‌سینه یازی گؤندرمک یا دا ایلگی قورماق اوچون بو ایمیل ایله ارتباط قورا بیلرسینیز: mahni.azar@gmail.com
قایناقلار:
ishiq.net
bilimsesi.com
/خبرین سونو/
غربی آذربایجان ؛ اوزل لیک له اورمو فولکلور چولاریندان / رضا همراز
غربی آذربایجان خصوصی ایله اورمودا دا تاریخ بویو ائله فولکولوروموزون توپلاییب ، آراییب ، داراماسینا گوزل آتدیم لار آتیلیب و آتیلماقدادیر . بو آرا بیر سیرا ائل وورغونلاری آیاق قاباغا قویوب هله سینه لرده یئرسالان شعرلری ، متل لری ، دئییم لری ، دویوم لاری و نه بیلیم نه لری توپلاماق هوسینه دوشوب ، بو اوزون یولدا دیرلی ایش لر گورموشلر کی ، اونلارین بیر سیراسیندان خبرلی اولساقدا ، بیر چوخ مقیاسیندان هله ده کی هله دی مع الاسف خبریمیز یوخدور !
البته کئچمیش شاه دونمینده بئلنچی بیر قونولارا توخونماق بیر او قدر ده ساده اولا بیلمز دی . اونا گوره ده یازیچی لار گاهدان کوروردون کیتابلارینین بیر بوجاغیندا فولکولوروموزا دا یئر آچیردی لار کی ، اونون عواقبیندن بیزیم خبریمیز یوخ دی !! من بو یازیمدا چالیشمیشام ذهنیمده اولان غربی آذربایجانا عاید اولان شهرلرینده هابئله کندلرینده کی فولکولورچولاری تانیدام . آنجاق بیلیرم کی بو ساحه ده قایناغین آز اولماسی بیر طرفدن ؛ منیمده علمی بضاعتیمین آزلیغی باشقا طرفدن بو ایشیمی آخساداجاق . آما امینم فولکولوروموزلا ماراقلانانلار بو ایشین آردین توتماقلا ، اونون گئنیشلنمه سینه منه یاردیم گوستره جک لر .
آشیقلیق سئوگی‌سی ایله یاشایان گنج
آشیقلیق سئوگی‌سی ایله یاشایان گنج
یازان: حسین واحدی
هر اینسانین یاشامیندا بیر پارا شئیلر اؤنملی اولوب، او اینسانی حیاتدا ساخلاماغا، عشق ایله یاشاماغا داها مارقلی ائدیر. اینسانلارین بعضی‌لرینین ان اؤنملی حیات مسئله‌سی وطن اولوب، اونلاری یاشادان، . وطن عشقی اولور. بئله اینسانلار عؤمورلرینین چوخونو بو یولدا قویورلار. بیرى وطنه دوکتور اولار، بیری ایشچی، بیر یازیچی و... . هر حالدا هر بیریسی اؤز یئرلرینده وطنه قوللوق ائدیرلر.
بو اینسانلاردان بیری ده قوشاچایلی کؤکنلی، اورمودا دوغولموش احمد اسدی جنابلاری‌دیر. آتا-آناسینا خلف اؤولاد اولان احمد، 1367جی گونش ایلینده یاشما گولومسه‌ییب، دونیایا گؤز آچیب‌دیر. اورمیه‌نین آدلیم شاعیر ایله یازیچی‌لاریندان بیرى اولان بهرام اسدی‌نین یگانه اوغلو اولان احمد، بیر بویا باشا چاتدیقجا اتاسی ایله بیرگه ادبیاتا، آشیق موسیقی‌سینه و شعره علاقه باغلاییر. او 1390جی ایلده دوغال قایناقلار قولوندا لیسانسینی بیتیرمکله بیرگه ادبیاتیمیزا ایکی عنوان کیتاب دا پاى وئریر. "آتالار سؤزو" توپلوسو ایله تورک شاعیری ناظیم حیکمت‌ین "قیز جوجوغو" آدلی شعرلری اونون چاپ ائتدیگی کیتابلاردیر.
آشیق بولود ساعد ایله دانیشیق/ دانیشیق آپاران: احمد اسدی
بو صنعت بیزیم وارلیغیمیزدیر، گرک قویمایاق آرادان گئده
آشیق بولود ساعد ایله دانیشیق/ دانیشیق: احمد اسدی
آشیق بولود، اورمونون آدلیم آشیقلارینداندیر. او هم گؤزل یوردوموزدا، همده یوردوموزدان ائشیکده خارجی اؤلکه لرده ده تانینمیش بیریسیدیر. آشیق بولود 1338-جی ایلده ملکندینین(ملکان) باباکلک کندینده دونیایا گؤز آچیب. 6-7 یاشی اولدوغو واختلاردا عائلهسی ایله بیرلیکده اورمویا کؤچور و بو شهرده قالارگی اولور. آشیق بولودون اوغلودا آشیقدیر و اورمو بؤلگه سینده آشیق فورماسیندا فرقلی چیخیشلاری ایله تانینیر. آللاهدان آشیق بولود ساعد و اونون خلف اوغلو سایین عسگر ساعده باشاریلار دیلرکن، دانیشیغیمیزی اوخوماغا دعوت ائدیرم.
اورمیه ده، آشیقلار درنگی نین قورولوشونون اوچونجو ایل دؤنومو
یوراج (yorac) : احمد اسدی
غربی آذربایجان حوزه هنری اداره سینین آشیقلار درنگی نین قورولوشونون اوچونجو ایل دؤنومو اورمودا گئرچکلشدی. بو درنگین اوتوروملاری و جلسه لری 1389-جی ایلدندیر, هر هفته دوزگونلری آخشام اوستلری تشکیل تاپیر. هر هفته آذربایجانین چئشیدلی بؤلگه لریندن آشیقلار بورایا گلیرلر و دئمک اولار هر هفته 4-5 آشیق بو درنکده چیخیش ائدیر. خزل آیی نین 24 بو درنگین قورولوشونون ایل دؤنومو بیر تؤرن و مراسم ایله یاد ائدیلدی. بو مراسمین گؤرونتولرینه باخا بیلرسینیز.
آذربایجان فولکلور داستانلاریندان جیک-جیک خانیم
قاری ننه اونو گؤروب سوروشدو:
-آی جیک-جیک خانیم، نازلی خانیم مزه‌لی خانیم، نیه آغلاییرسان؟
جیک-جیک خانیم آغلایا-آغلایا قاری ننه‌یه جاواب وئردی:
-آی قاری ننه، آیاغیما تیکان باتیب قاناییب، گل چیخارت!
قاری ننه جیک-جیک خانیمین آیاغیندان تیکانی چیخاریب تندیره آتدی.
جیک-جیک خانیمین کئفی دورولدو. بیر او یانا بیر بو یانا اوچوب دئدی:-قاری ننه، منیم تیکانیمی قایتار!
قاری ننه دئدی:-هارا‌دان آلیم، آتدیم تندیره یاندی.
جیک-جیک خانیم دئدی:
-منه نه بورج، تیکانیمی وئر! وئرمه‌سن چؤرگینی گؤتوروب قاچارام.
قاری ننه گولدو.
جیک-جیک خانیم او یانا اوچدو، بو یانا اوچدو قاری ننه‌نین چؤرگینی گؤتوروب قاچدی.
جیک-جیک خانیم گؤی ایله اوچوردو، گؤردو یئرده بیر چوبان قویون ساغیر. یئره قوندو چوبانا طرف گلیب دئدی:
-برکت‌لی اولسون، چوبان قارداش! چؤرک گتیرمیشم، آل، سودده دوغرا، یئ!
چوبان چؤرگی آلدی، چاناغینا دوغرادی، اوستونه ده سود تؤکوب دئدی:
-جیک-جیک خانیم، نازلی خانیم، مزه‌لی خانیم گل سن ده یئ.
جیک-جیک خانیم جواب وئردی:
-من توخام، یئمیرم، اؤزون یئ.
چوبان چؤرگی یئییب قورتاردی.
جیک-جیک خانیم قانادلارینی یئلله¬دیب دئدی:
-آی چوبان قارداش، منیم چؤرگیمی وئر گئدیرم.
چوبان دئدی:
-چؤرگینی هارا‌دان آلیم؟ یئدیم، گئتدی.
جیک-جیک خانیم دئدی:
-منه نه بورج یئدین. چؤرگیمی وئر، یوخسا قویونونو گؤتوروب قاچارام!
چوبان گولوب دئدی:-آی جیک-جیک خانیم نازلی خانیم، منده نه گوناه وار کی، قویونومو آپاراسان؟ چؤرگی اؤزون وئردین، من نه دئدیم.
جیک-جیک خانیم دئدی:-گؤر ایندی سنین باشینا نه اویون گتیره‌جگم؟
جیک-جیک خانیم او یانا اوچدو، بو یانا اوچدو چوبانین قویونونو گؤتوروب قاچدی. چوبان قیشقیرماغا باشلادی:-آی آمان، آغام منی اؤلدوره‌جک!
جیک-جیک خانیم جایناغیندا قویون اوچوردو گؤردو کی، بیر دسته آتلی گلیر، اونلارا یاخینلاشیب سوروشدو:-آی قارداش‌لار، هارا گئدیرسینیز؟
آتلی‌لار جاواب وئردی‌لر:-جیک-جیک خانیم نازلی خانیم، گئدیریک پادشاها گلین گتیرک.
جیک-جیک خانیم اوچوب پادشاهین قاپی‌سینا قوندو، قویونو خدمتچی‌لره وئریب دئدی:
-آلین، پادشاهین تویونا گتیرمیشم.
جیک-جیک خانیم ایچری گیریب یوخاری باشدا اگلشدی.
خدمتچی‌لر قویونو کسیب، کاباب بیشیردی‌لر، قوناق‌لارا پایلادی‌لار.
قاضی ایله جیک-جیک خانیما دا بیر قابدا کاباب قویدولار. قاضی تئز-تئز یئییب جیک-جیک خانیمی آج قویدو.
جیک-جیک آجیغا دوشوب پادشاها دئدی:
-منیم قویونومو وئر!
دئدی‌لر:
-قویونو یئمیشیک، قورتاریب گئدیب.
جیک-جیک خانیم دئدی:
-اونو-بونو بیلمیرم، قویونومو وئریرسینیز وئرین، وئرمیرسینیز، گلینینیزی آپاراجاغام!
هامی گولدو.جیک-جیک اوچوب چپرین اوستونه قوندو، گؤزله‌دی.
گلینی زورنا-بالابان چالا-چالا گتیردی‌لر. جیک-جیک خانیم او یانا اوچدو، بو یانا اوچدو گلینی آتین اوستوندن آلیب قاچدی.
پادشاه بیر باشینا دؤیدو، بیر گؤزونه، آغلادی.
جیک-جیک خانیم گلینی هوندور بیر آغاجین دیبینده یئره قویدو، گؤردو کی، آغاجین کؤلگه‌سینده بیر آشیق ساز چالیر.
جیک-جیک خانیم دئدی:
-سلام علیکم، آی آشیق قارداش، گل گلینی وئریم سنه، سن ده سازی وئر منه.
آشیق سئوینیب دئدی:-آی جیک-جیک خانیم نازلی خانیم، مزه‌لی خانیم، سندن من هئچ بیر شئی اسیرگمرم. آل سازی!
جیک-جیک خانیم سازی آلدی، گلینی وئردی.
آشیق گلینی گؤتوروب ائوینه آپاردی. جیک-جیک خانیم آغاجین گؤلگه‌سینده اوتوروب سازی دینقیلداتماغا باشلادی.
تیکان وئردیم، چؤرک آلدیم،دینقیل سازیم دینقیل سازیم.چؤرک وئردیم، قویون آلدیم
دینقیل سازیم، دینقیل سازیم.قویونو وئردیم گلین آلدیم،دینقیل سازیم، دینقیل سازیم.گلینی وئردیم، بیر ساز آلدیم،
دینقیل سازیم، دینقیل سازیم.ائله او گوندن بری جیک-جیک خانیم عؤمرونو ساز چالا-چالا توی-ناغارا ایله کئچیریر.
آشیق میکاییل سلیمانی ایله مصاحبه
آشیق میکاییل سلیمانی ایله مصاحبه/ دانیشیق آپاران: احمد اسدی
عزیز اوخوجولاریمیز، بو یازینی یازماغا گؤره یولا دوشوب، 9/1/1391 تاریخینده قوشاچایین گؤل کندینه گئدیب ، قوجامان و آغ ساققال آشیغیمیز اوستاد میکاییل سلیمانی ایله گؤروشموشوک. گؤل کندی قوشاچایین گونئیینده یئرلشیر و بو شهردن 15 کیلومتر آرالیدیر. ائشیتمیشدیک اوستادیمیز بیر آز خسته احوالدیر، بونا گؤره اونونلا گؤروشمگی اؤزوموزه بورج بیلهرک، گؤروشونه گئتدیک. گؤل کندینه یئتدیگیمیزده ، آشیغی شهره دوکتورا آپارمیشدیلار، بونا گؤره آشیغین اوغلونا زنگ آچیب و آشیغین حالیندان نگران اولدوغوموزا گؤره، اوندان آشیغی سوردوق. حالینین یاخشی اولدوغونو ائشیتدیگیمیزده سئوینهرک، کندده اونون یولونو گؤزله دیک. نهایت آشیق میکاییل گلیب، چاتدی. اوستادیمیزلا، گؤروشدوگوموزدن سونرا اونونلا صمیمی بیر دانیشیق آپاردیق. اوستادیمیزین تزه دوکتوردن گلمهسینه باخمایاراق، بیزی ایستی و سئوگی دولو قوجاقلا قارشیلاماسی بیزه بیر قوناق پرورلیک درسی اولدو. اوستادیمیزا جان ساغلیغی آرزیلایاراق، سیزی دانیشیغیمیزی اوخومایا دعوت ائدیرم.
اوستاد اؤزونوزو تانیتدیرین، لطفاً؟
من آشیق میکاییل سلیمانی، 1309-جو ایلده قوشاچایین گؤل کندینده دونیایا گلمیشم. 17-18 یاشلاریمدان آشیقلیغا علاقه یئتیریب و بو صنعتین دالیجا گئتمیشم. آتام دا راضی دگیلدی من آشیق اولام. چون اکینچی بیر عایله ایدیک و قارداشیم دا یوخ ایدی، دئییردی گل منه کؤمک ائت. حتی بیر دفعه گئدیب بیر ساز آلدیم. آما آتام منی مجبور ائیله دی قایتارام. من ده ال چکن دگیلدیم. سونرا آتامین مخالف اولماغینا باخمایاراق، گئدیب بیر ساز آلدیم.
اوستاد کیمدن ساز اؤیرندینیز؟
من بیر جار شیرین کندلی آشیق فرامرز امین پورون یانینا گئدیب و اوندان اؤیرنمگه باشلادیم. آز مدت اونون یانیندا اؤیرندیگیمدن سونرا، آشیق حسن عدلین یانینا گئدیب و اونا خدمت ائیله دیم.
نئچه ایل آشیق حسندن ساز اؤیره نیبسینیز؟
من تقریباً آلتی ایل آشیق حسنه شاگردلیک ائتمیشم. 23 یاشیندان دا آشیقلیق ائتمیشم.
اوستادینیز، آشیق حسن کیم ایدی، هارالی ایدی؟
آشیق حسن، قاشیقچی کندیندن ایدی. گؤزل چالیب، اوخویاردی. اصلی آدی حسن عدل ایدی. آما هامی آشیق حسن قاشیقچی آدی ایله اونو چاغیراردی. اوغلودا آشیقدیر. اوغلونوندا آدی، آشیق باراتدی.
آشیق نباتعلی علیزاده ایله دانیشیق
