آشیق‌لیق سئوگی‌سی ایله یاشایان گنج
بو چالیشمالارین هامیسی بیر یانا، احمدین آشیق موسیقی‌سینه و آشیقلیغا سالدیغی علاقه اونون یاشاییشیندا بؤیوک رول اویناییر. او گنج چاغلارینین باشلانیشیندان ائلیمیزین چئشیدلی آشیق‌لاری ایله گؤروشوب بو فخر ائدیجی صنعت دن چوخلو بیلگیلر الده ائدیب. بونلارین یانیندا آدلاری-سانلاری قافالاردان اونودولان آشیقلارین آدینی دیری ساخلاماغی دا اؤزونه آماج توتوب باشلاییر اونلارین یاشاییشینی توپلاماغا و آراشدیرماغا. بو نتیجه اینشاللاه یاخین گله‌جکده ایشیق اوزو گؤره‌جکدیر. اسدی، بو آراشدیرمالارین یانیندا، اورمیه‌نین آشیقلار درنه‌یینین جدی چالیشقانی و اشتراکچی‌سیدیر.
احمد بی اؤزو آشیقلیغا اولان علاقه‌سیندن بئله دئییر:
"اوشاقلیق ایللریندن آشیقلارلا دوشدوگومه گؤره و اونلارین مجلسلرینده حاضر اولدوغوما گؤره، آشیق ادبیاتینا ، شعرینه و موسیقی سینه وورغون اولوب، بو صنعتله دئمک اولار آرتیقراق تانیش اولموشام. آرزیم، بو صنعتی یئنی فورمادا گنجلر ایچینده یاشاتماق و گله جک ایللره چاتدیرماقدی. بو سببدن هر یئرده و هرنه اسلوبلا(شعر، یازی، حکایه، اینترنت، نشریه لر، کتابلار و ...) آشیقلیغین یولونو و فلسفه سینی یایماق ایسته ییرم."
احمد بی اسدی، آشیق صنعتی ایله بیرگه اورمیه نین بیرینجی گونده‌لیگی اولان "آراز آذربایجان"نین دا تورکجه بؤلومونون رئداکتورودور. او مختلف قونولاردا یازیلار حاضیرلاییب، بو گونده‌لیکده ادبیاتمیزا ماراقلی اولانلارا پای وئریر.
اومود ائدیرم احمد اسدی جنابلاری توتدوغو مقدس یولدا گونو-گوندن داها باشاریلی اولوب، ائلیمیز له اؤلکه‌میزه فایدالی بیر اینسان اولاجاق‌دیر.
***
قاناق‌لار:
1. دنیز نشریه سی
2. احمد اسدی جنابلاری ایله آپاردیغیم دانیشیق
3.
گنج آشیقلار وئبلاگی
gencashiqlar.blogfa.com
