غربی آذربایجان ؛ اوزل لیک له اورمو فولکلور چولاریندان / رضا همراز
1. یوسوف قهرمانپور – سولدوز. عومرونون بیر چوخ حیصصه سین ائله سولدوزون نقده شهرینده باشا وئرن رحمتلی اوستاد یوسوف قهرمان پورون فولکولوروموز حاقدا توپلادیغی دفتر لر بویوک عالیم رحمتلی اوستاد محمد علی فرزانه نی ده مات قویموشدو . اوستاد فرزانه بو داهی نین فولکولوروموز حاقدا کی داغارجیغینا عاید هله ایللر قاباق وارلیق درگی سینده بیر مقاله ده یازا بیلمیشدی . بو سطیرلری یازاندا اونون یارادیجیغین یاخیندان گوردوکده ؛ تبریزده نشراولان حیدربابا هفته لیینده بیر مقاله ترتیب وئرمیشدیر . تاسف لر اولسون کی اونون توپلادیغی یا خود یازیب ، ترتیب وئردیی اثرلردن بوگونه قدر اول – آخیری بیر دنه سی باسیلمیشدیر ! آرزی ائدیریک اونون یئرده قالان ساییر دفترلری ده محترم عائله سی و دوست – تانیشلارینین تشبثی ایله گون ایشیغینا چیخادیریلسینلار . اوستاد قهرمانپور 1298 ینجی ایل آنادان اولوب ، 90 ایل ثمرلی عومور سوردوکده قلمین یئره قویموشدور .
2- ع . ظفر خواه – غربی آذربایجانین خوی شهرینده سس سیز – سمیرسیز ایشلین لرین بیریسی ده ع – ظفر خواه جنابلاری اولموشدور کی بو گونه قدر بیر نئچه دفتری بو عنوانلار آلتدا نشر اولموشلار : 1- آتالار سوز 2-
3- علیرضا ذیحق ( آغ چایلی ) حالیا خوی شهرینده یاشاییر. چالیشقان یازیچی دا فولکولوروموزون حئکایه یا خود ناغیل و داستان قولونون زنگین لشمه سینه دایر دیرلی آتدیم لاری اولموشدور . او ، عاشیق غریب ایله شاه صنم ، حسین کرد ، آرزی قنبر و .. کیمی داستانلارینین بیر سیرا واریانت لارین بیر یئره توپلامیشدیر .
4- حمید شهانقی – او ادبیات عالیمنه شعر ایله آیاق قویسادا بوگون آرتیق بیر فولکلور شوناس کیمی تانینماقدا دیر. خویلو دوقتور حمید شهانقی نین بو گونه کیمی فولکولوروموزو تمثیل ائدن بیر نئچه کیتابی نشر اولموشدور .
5- بهرام اسدی –اورمودا داها چوخ نشر ایشینه اهتمام گوستریب آنجاق لازیم اولاندا فولکوولروموز ساحه سینده کی کیتابلارین دا چاپینا ماراق گوستریب ، یئری گلمیشکن اوزوده شخصا قلم اله آلیب بو ساحه لرده چالیشماغا رغبت گوسترمیشدیر کی ایش لرینین بیر قسمی نشر اولموشلار .
6- دکتر مهندس توحید ملک زاده دیلمقانی –سلماسلی بو عالیم اوزو داها آرتیق تاریخی تانینسادا ، یازیب – توپلادیغی کیتابلاردا فولکولوروموزون اوزونه گوره گوزه گلیم یئری اولموشدور . او ، بونلارا کیفایت ائتمه ده امکداشی کاظم آقا عباسی ایله سلماس عاشیقلارینین دا آنتولوژوسون توپلامیشلار .
7- علی اصغر غفوری نیا –بو امک لی معلیم سلماسدا یاشاییب ، جغرافی قونوسونا ماراقلی اولوب ، آنجاق فولکولور توپلاماقدان دا غفلت ائتمه میشدیر . اونون فولکولوروموز حاقدا یازدیغی بیر نئچه یازیسی ائله همین ائل بیلیمی درگی سینده نشر اولموشدور .
8- محمد رضا مهرزاد صدقیانی –بو قوجامان یازیچی دا تقاعد اولدوقدان سونرا داها آرتیق یازیچی لیغا واخت آییرمیشدی . اونون بیر سیرا توپلادیغی کیتابلاردا فولکولوروموزدان ؛ عنعنه لریندن و گوزل لیک لرینه یئر وئریلمیشدیر .
9- حسین واحدی – اورمیه نین گنج یازارلاریندان دیر کی داها چوخ حئکایه ، رومان و فولکولوروموزلا ماراقلانیر . ائله بو سبب دن بیر سیرا یازی لاری دا فولکولور حاقدا دوورو مطبوعاتیمیزدا نشر اولموشلار .
10-حسن انزلی- اورمونون قوجامان یازیچی لاریندان دیر . اونون اورمویا عاید یازدیغی کیتابدا بیر نئچه صحیفه ده فولکولوروموزا گوره یئر وئریلمیشدیر .
11-عیسی یگانه –او نقده شهرینده مسکونلاشیب بیر چوخ کیتاب و مقاله یازمیشدیر . کیتابلارینین یا خود مقاله لرینین بیر سیراسیندا فولکولوروموزا ، خصوصی ایله قاراپاپاق ائلینین فولکولورونا ماراقلا یئر آییرابیلمیشدیر ..
12-محمد رضا اسماعیل زاده –بو چالیشقان قلمداش اورمو فولکولورونا دایر بیر کیتابدا ترتیب وئریب ، حتی چاپ دا ائله تدیرمیشدیر . یازارین همین کیتابیندا اورمونون فولکولوروندان بوللو جا سوز – صحبت گئتمیشدیر .
13-دکتر حسین پناهی –اوزو بیر داواچی اولدوغونا باخمایاراق تارخیمیز و فولکولوروموز حاقدا بیر سیرا چابالاری دا اولموشدور . اونون فولکولوروموزا عاید یازیلاری ائله همین ائل بیلیمی درگی سینده بیر نئچه دونه نشر اولموشلار .
14-کاظم عباسی –حالیا تبریزده مسکونلانمیش ، ائل بیلیمینین بلکه ده ساغ اللریندن بیریسی دیر . کاظم آقا عباسی نین فولکولوروموز حاقدا یازدیغی یا کوچوروب ، ترجمه ائتدیی یازی لارین بویوک بیر مقیاسی مقاله لر صورتینده دوورو مطبوعاتیمیزدا ماراقلا باسیلمیشلار .
15-غلامرضا غلامی قوشچو – اساسا اجتماعی مقاله یا خود یازی لارلا ماراقلانسادا ، یوردوموزون فولکولورون ثبت ائتمک دن جان قاچیرانمامیش ، ائله بو ائل بیلیمی درگی سینده اوندان بیر نئچه یازی اوجسوز – بوجاقسیز فولکولوروموزا شاهید اولموشوق .
16-محمد علی ارجمندی –اورمونون گنج و ان چالیشقان ژورنالیست لریندن دیرکی سون ایللر گوزل یازیلارینا شاهید اولموشوق . او نون یازی لاری ایچره فولکولورموزا دایر بیر سیرا مقاله لره ده یئر آچیلمیشدیر .
17-جمال آیریملو –دوقتور جمال آیریملو بیر ژورنالیست اولورسادا ؛ اوندان فولکولور حاقدا بیر سیرا یازی لار اورمو ، یا خود گاهدان تبریز مطبوعاتیندا شاهید اولموشوق .
18-احمد اسدی - اورمودا یاشایان گنج لردن دیرکی فولکولوروموزون کوکو اوزاقلاردا اولان ؛ عاشیق ادبیاتینین چیچک لنمه سینده گوزل آتدیم لاری اولموشدور . او بیر چوخ کند – کوشنی گزیب ، بیر سیرا ناغیللاریمیزی ماراقلا لنته آلمیشدیر .
19-محبوب داداش پور - قوشچو قصبه سینده یاشایان محبوب آقا داداشپور داها آرتیق تاریخچی کیمی آدلانسادا ، بیر سیرا فولکولوروموز حاقدا یازیلارینا شاهید اولموشوق . بو یازیچی نین بیر قیسم یازی لاری ائله ائل بیلیمی درگی سینده نشر اولا بیلمیشدی.
20-احمد کاویانپور – اورمولو چایشقان بیریسی ایدی . او رحمتلی بیرینجی دونه اولاراق اورمو تاریخین یازیب سونرالار ، ایسه آذربایجان ادبیاتینا هوس گوستریب بو اوجسوز – بوجاقسیز دایرده بیر نئچه جلد کیتابدا توپلایب ، ترجمه ائدیب یازمیشدیر .
21-علی دهقان - اورمو تاریخچی لریندن ایدی . تبریزده اولدوغو ایللر معارف حاقدا گوردویو ایشلر هئچ زامان اونودولماز . اونون کیتابلاریندا باتی آذربایجان و اورمو فولکولورونا دایر آز اولموشسادا ، بیر یئرلرده وئریلمیشدیلر .
22-فاطمه مصطفی پور – باتی آذربایجانین فولکولورچو قادین لاریندان اولموشدور . سون ایللر اونون « بیر داغارجیق فولکلور – خوی ؛ ماکی و چایپارا » ماحال لارینا عاید ، توپلانیب چاپ اولونموشدور .
23-محرم پریزاد – قاراپاپاق ائلیندن اولوب ؛ سورگون تخلص ائدن سایین محرم پریزاد سولدوز لو بیر یازار دیر کی یوگونه کیمی اونون ایکی کیتابینین اوخوجوسو اولوب بیر نئچه فولکولور حاقدا یازیلمیش مقاله سینه ایسه شاهد اولموشام . اونون فولکولوروموزا عاید یازی لاری اساسا ائل بیلیمی درنگی نین ایچ بولتنینده نشر اولموشلار .
24-علیرضا صرافی – ایللر بویو فرهنگ و کولتوروموز حاقدا چالیشان قلمداش ؛ مهندس علیرضا صرافی اورمودا آنادان اولوب ؛ تبریزده بویا – باشا چاتمیشدیر . او انقلاب عرفه سینده قلم اله آلیب ؛ بوگونه کیمی بیر نئچه دیرلی یازیسینین اوخوجوسو اولموشوق .او ؛ بیر نئچه ایلده دیرلی « دیلماج » درگی سین نشر ائتدی آنجاق تاسف له 36 نومره دن سونرا قضایه اوغرادی ! مهندس صرافی ایندی دوستلاری و فیکیرداشلاری ایله برابر ائل بیلیمی درگی سینده فولکولوروموز حاقدا چالیشماغا جان آتیرلار .
25-حمید شافعی : اورمودا آنادان اولوب ؛ یاشایان بو دوستوموزدا فولکولوروموزا گوره دیرلی آتدیم لار آتمیشلار . مهندس شافعی بوگونه کیمی اونلار ناغیل ؛ داستان و شعر توپلایب حتی اونلارین بیر سیراسین دا چاپ ائتدیرمیشلر .
