ایسوپیا İsopiya
زنجی [قارا] قادین گئجه‌نین قارانلیغینا قاریشیب. بیاض أندام‌لی خانیمسا، گونش‌لی سحرلرین بیرینده دار کوچه ایله هاراسا گئدیر. ائیواندا بیر کیشی سیقارئت یاندیریر. قورشاغا قدر سویونموش، گئجه‌نین ایستی‌سین‌دن سویوموش. آتش بارماغینی یاندیریر. او ایسه حس ائتمیر. خانیمین أتک‌لرینه توخونان سَرین مئه [أسینتی] دونونو یئلله‌دیر. ائیوان‌دان باخان کیشی ائوده‌کی قادینینی اونودوب. بیاض أندام‌لی بو خانیم هارا‌دان گلیر؟
سوپورگه‌چی ائیوانیما باخیر. دئیه‌سن من هر سحر بو قادینی گؤزله‌ییرم. صاباح اولا‌جاق، یئنه بو خانیم بورا‌دان کئچه‌جک. گئجه‌لر زنجی قادین کیمی گیزلنیب، گوندوزلر گؤرونه‌جک.
بو گونون سوا‌لی: “ بو قادین هارا‌دان گلیر؟”
بو محله‌نین آغ‌ساققال‌لاری بو قادینا اینانمیرلار. دوشونورلر، بو دا یونگول اخلاق‌لی قادین‌لاردان بیری‌دی.
زامان ایسه هئچ نه دئمیر. سوسور.
هر سحر عینی ساعتدا، عینی دقیقه‌ده، عینی احوالدا ائیواندا گؤرونن کیشی بو خانیمی نظرلری ایله کوچه‌نین سونونا قدر اؤتورور. خانیم ایسه هئچ کیمی گؤرمور.
بلکه کیمسه قونشو کوچه‌ده اوتوموبیلینی ساخلاییب؟ هه، او اوتوموبیل بو دقیقه اورا‌دان اوزاقلاشدی. همیشه بو ساعتدا بورا‌دان کئچیر. چوخ گومان، بو خانیم قونشو کوچه‌ده بو اوتوموبیل‌دن دوشوب اؤز ائوینه گئدیر، - فرضیه!
ساعاتین عقربه‌لری سنین اوچون دؤور ائدیر. عینیله یئر کیمی. بس اونون ائنئرژی‌سی توکنسه نئجه اولا‌جاق؟ هر گون عینی سواللا بیر گنج اؤزونه مراجعت ائدیر. اونون باشقا دردی یوخدور. یئرین قات‌لارینی آراشدیریر. نووه، مانتو. او، جوغرافیا، گئولوگیا [زمین شناسی] ایله ماراقلانیر. آغلاگلمز تجربه‌لر کئچیریر ائوینده. ساعات، باتری ایله ایشله‌ییر. بس یئر؟ بس سن؟ ائنئرژی. هارداندیر بو ائنئرژی؟ نه‌یه انسانی یاندیرمیر؟ بلکه یاندیریر؟
هیندیستاندا بیر انسان اؤلدو. بیر اولدوز آلیشا-آلیشا یئره سوزولور. بؤیوک تونقال قالادی‌لار. مرحومو آتشله قوووشدوردولار.
اود-آلوو-آتش-تونقال. عینی مفهومون، مختلف آدلاری. بلکه ده یوز آدی وار. کیم بیلیر؟
سن حرکتده اولدوقجا، دونیا فیرلانیر. دونیا حرکت‌دیر. حرکتده اولماغین، - یاشاییرسان دئمک‌دیر. ساعاتین عقربه‌سی رقم‌لر اوزرینده یئریگیر. زامانین هانسیسا نامعلوم [بیلینمه‌ین]، بلکه ده معلوم [بیلینن] بیر واختی، سن آرتیق دونیادا اولمایا‌جاقسان. هاردا اولا‌جاقسان؟ اولاجاغین یئر، بو یئر قدر ماراق‌لی‌دیر. بلکه نامعلوم اولدوغون‌دان ماراق‌لی‌دیر. بلکه او یئرین گؤزل اولدوغونو بیلسن، داها تئز اورایا گئتمک ایسته‌یه‌جکسن. آخیرته گئتمک اوچون ایسوپیا‌دان مطلق کئچه‌جکسن.
ایسوپیا. اورادا گونش سنین اختیاریندا‌دیر. اونون هارادا دورماسی سندن آسیلی‌دیر. سن فکراً اونون استقامتینی [یؤنونو-جهتینی] ده‌ییشه بیلیرسن. بلکه دویونجا یاتماق اوچون گونشی اوزون مدت غروب‌دا ساخلایا‌جاقسان. دئییله‌نه گؤره اورا‌لار او قدر گؤزل‌دیر، سن هئچ یاتماق ایسته‌مزسن. گؤزلرینی بوینون‌دان آسیب، سینه‌ن اوسته گزدیررسن. حتی قولاق‌لارینی بئله ألینله قوپارا بیلرسن. سن اورادا حیصه‌لره بؤلونه و یئنی‌دن بیرلشه بیلرسن.
بیر-لش. تام-لاش. ایکی نسنه [شئی] قوووشور. بیرله‌شیر. بیر اولور.
بوداما ألینده‌کی ضرب آلتینه برک-برک وورا‌راق روح‌لاری کؤمه‌یه چالیشیر. بو گون او اؤله‌جک. ایسوپیایا یول آلا‌جاق.
یول آلا‌جاق- یول اونو آپارا‌جاق - او یولا گئده‌جک- یول اولا‌جاق.
بورادا بعضی‌لری آخار چای اولار. بعضی‌لری شام کیمی أریر. بعضی‌لری تورپاق اولار.
بورادا گؤزلرینی قاپاسان دا گؤررسن. واختیله آرزولادیق‌لارین سنین حضوروندا منتظر دایانار. سن أن چوخ آرزولادیغینی سئچرسن. بلکه نه واختسا، اوجا داغ‌لاری گؤروب، کاش بو هوندورلوگو آشاردیم دئمیشدین. ایندی آیاق‌لارین سنی ایستدیگین یئره آپارار. ألچاتماز زیروه‌لر، ألچاتان اولار. کؤرپه‌لیکده آرزولادیغین اویونجاق‌لار گؤی‌دن تؤکولر. گونش‌لی گون‌لرین بیرینده سرینلمک اوچون قار ایسته‌میشدین. باخ، لوپا-لوپا یاغار. أن چوخ آنان اوچون داریخمیشدین. او سنی ایسوپیادا گلیب تاپار. آغ‌بیرچک‌لی، نور اوزلو آنان بیر آغاجین کؤلگه‌سینده اوتورار. حزین سسی ایله لای-لای اوخویار. سن ایری گؤوده‌لی آغاجا یاخینلاشارسان. آنانین قوجاغیندا اؤزونو گؤررسن. دئمک کی، آنان دا سنی گؤرمک ایستمیشدی. بئله کؤرپه، اوفاق، دینمز شکیلده.
چونکی، گون‌لرین بیر گونو آجیلامیشدین آنانی. او دا دؤنوب “دیلین قوروسون” دئمیشدی سنه. سونرا یوز دفعه توبه ائتمیشدی. سونرا باغیشلامیشدی. اوّل‌کی کیمی قایغینی چکمیشدی. آما، دئدیگین سؤزو هئچ اونوتمامیشدی. ایندی عینی قایغی ایله سنی یئنی‌دن بؤیوتمک ایسته‌ییر. بلکه یاشی‌نین هانسیسا چاغیندا سهوه یول وئریب. بلکه سنه دوزگون تربیه وئرمه‌ییب دئیه دوشونور. سنی یئنی‌دن دوغدو، عزیزله‌دی. سونرا راحت گئده‌جک او دونیایا.
ایسوپیا آرزولارین رئال‌لاشما مکانی‌دیر. سهو‌لرینی دوزلتمک اوچون سونونجو شانسیندی. هامی‌نین یولو بورا‌دان کئچه‌جک.
اورادا انسان‌لار ائنئرژی‌لرینی بیرلشدیره‌رک گونشی باش‌لاری‌نین اوزرینه قالدیرارلار. کؤلگه‌لر محو اولار. ایسوپیادا سن، سنین اختیارینداسان. بوتون اعضالارین سنین أللرینده‌دیر. طبیعت بئله سنه تابع‌دیر. بارماغینلا سمانی قاریش‌دیریرسان. بولودلاری سیلرسن. علینله آی چکرسن. اولدوز چکرسن. سؤز یازارسان .
هر شئی گؤردوگون کیمی دئییل. گؤردوگون‌دن ده او طرفی گؤرمه‌یی باجار.
بورادا انسان‌لار بیر-بیرلری‌نین ایچین‌دن کئچرلر. قاپی دؤیمزلر، قاپی آچمازلار. اؤزلرینه چکیلیب، باشقا‌لاری اوچون آچیلماغی باجارارلار.
بلکه‌ده بیاض، هاوا‌لی قادین ایسوپیایا تله‌سیردی. او، آستا-آستا، کولک‌دن دالغا‌لانان ساچ‌لاری ایله دار کوچه‌دن کئچیر. یونگول پارفوم عطری ائیواندا دایانان کیشینی بیهوش ائدیر. او، قوش اولوب ائیوان‌دان آشاغی اوچماق ایسته‌ییر. قفلتن [غفلتاً] قاغایی‌یا دؤنور. خانیمین باشینین اوزرینده دؤوره وورور. بیر نفر ایسه، قاغایی‌لار دنیز کناریندا اولما‌لی‌دیر، دئییر. کیم دئییر، قاغایی‌لار مطلق دنیز کناریندا اولما‌لی‌دیر؟
خانیم ایسه دار کوچه‌لرله آددیملاییر، آددیملاییر. قاغایی یول بویو اونو مشایعت ائدیر. خانیم آرابیر قولون‌داکی ساعتا باخیر. ساعات سککیزدیر. تام سککیز.
قاغایی انسان اولوب خانیمین قارشی‌سیندا دایانیر. کیشی، أللرینی بدنی اوزرینده چارپازلاییر. خانیم اونون ایچین‌دن کئچیب ائوین گیریشینه داخل اولور. پیلله‌لر ایله یوخاری قالخیر. پیلله‌لر بیتمیر. اگر ایسته‌سه‌یدی بیتردی. اوزون یول وار قارشیدا. نهایت بینانین دامینا چاتیر. آیاق‌لاری أسه-أسه هوندورلوک‌دن آشاغییا بویلانیر.
گئدیممی؟ گئتمه‌ییممی؟ دوشونور. نهایت فکرینی قطعی‌لشدیریر.
آغ پالتارلی قادین، بیر بیاض له‌لک [پر-توک] کیمی، بیاض قار کیمی یئره یاخینلاشیر. سکوت...
زنجی قادین اوغلو بودامانی اؤلولر دونیاسینا یولا سالیر. اوغلونون سون دفعه چالدیغی ضرب آلت‌ینی داها شدت‌له دؤیَجله‌ییر. قولاق باتیران سس آلتیندا وار گوجو ایله آغلاییر. هامی اونون دهشت‌لی سسینه قولاق آسیر. قارانلیقدا هئچ کیم اونو گؤرمور.
بوداما هر گون عینی محله‌دن کئچن آناسینا یازیغی گلیر. اونون أن بؤیوک آرزولاریندان بیری ایدی، آناسینی بیاض گؤرمک. ائله ده گؤروردو. هر گون پیلله‌لری قالخان و اؤزونو آتماق ایسته‌ین آناسی، سون آندا فکرینی ده‌ییشیب ائوه دؤنوردو. بو دفعه ایسه دؤنمور. بوداما، ایسوپیا‌دان همین دار کوچه‌یه بویلانیب، ظریف آددیم‌لارلا ایره‌لیله‌ین آناسینا باخیر. بیر قاغایی‌نین اونون باشینین اوزرینده دؤوره ووردوغونو گؤرور. آناسینی انتحاردان ساخلایا بیلمیر.
نه قدر چالیشسا دا، بو دونیایا کئچه بیلمیر. ساده‌جه دعا ائدیر. آناسی‌نین، یئره ساکت، آغریسیز دوشمه‌سی اوچون، بیاض قارا دؤنمه‌سی اوچون دعا ائدیر. بئله ده اولور.
بوداما آغاجین کؤلگه‌سینده اوزون-اوزادی اوتوروب، کؤکسونده بالاسینی اوخشایان، اونا لای-لای چالان بیاض قادینا باخیر. و ایکینجی دفعه دونیایا گلرکن، زنجی دوغولمادیغی اوچون شوکر ائدیر.
گؤی اوزونه گونش چکیر. سونرا أن سئویملی اویونجاق‌لارینی کؤرپه‌یه وئریر. آناسی‌نین أللرین‌دن اؤپور. آناسی اونو تانیماسا دا، او تانیییر. آناسییلا اولدوغونا سئوینیر.
ایسوپیا. هم اوزاق‌دیر، هم ده یاخین. بلکه سن دفعه‌لرله اونون ایچین‌دن کئچمیسن. آما، حس ائتمه‌میسن. بلکه همین آندا نه‌لریسه ده‌ییشه بیلردین. آما، ده‌ییشمدین. هر شئی أللرینده ایکن، ألین‌دن قاچیردین. هر شئی سو کیمی بارماق‌لاری‌نین آراسین‌دان آخیب تؤکولدو. حیاتین نفس قدر آنی اولدو. بیتدی.
چوخ کئچمیر، قوجالیرسان. چوخ کئچمیر، یاتاغا محکوم اولورسان. چوخ کئچمیر، گنجلیگینده ائتدیگین سهو‌لری دوشونورسن. آلداتدیغین قیزی. سئودیگین اوغلانی. اوزونه غضبله سیلله ووردوغون اوغلونو. بس‌دیر، أل چک، دئدیگین آنانی. آلداتدیغین انسانی. آلداندیغین مقام‌لاری. یولو کئچرکن بیله‌رک‌دن تاپدادیغین قاریشقانی. سنه أل آچان و اوووج‌لاری بوش قاییدان دیله‌نچینی. اوزون ایللر اوزرینده اوتوردوغون، سونرا اونوتدوغون اوتوراجاغی. یاریمچیق کتاب‌ینی. سئویرم دئمه‌دیگین قیزی. سئویرم دئمه‌دیگین اوغلانی... چوخ شئیی ده‌ییشه بیله‌ردین. ده‌ییشمه‌دین. آما، بو مکانین وارلیغینا اینان. ایسوپیا، سهو‌لرینی دوزلتمک اوچون سونونجو شانسین‌دیر. یارارلان.
تنگنفس ائوه قاییدان کیشی ائوینده اونوتدوغو قادینی تاپمیر. بوتون ائوی گزیر. بوتون قاپی‌لاری آچیر، اونو تاپمیر. قادینی گئدن گؤرموشدولر. دئییرلر لاقئیدلیک‌دن چوخ بئزمیشدی. هر سحر، اوتاغین‌دان یوخا چیخمیش سئودیگینی آختاریردی. سئودیگی کیشینی باشقا بیر خانیمین آردینجا گئدن گؤرموشدو. ائوه پریشان دؤنرکن، اوتوموبیل‌دن دوشن انسان، اونا چیچک وئرمیشدی. اصلینده گول‌لرین سببکاری گؤروشه گلمه‌دیگین‌دن، بیر باشقا خانیما وئریلمیشدی. دئمک، قسمت اونون ایدی. چیچک‌لری آلدی. قونشو کوچه‌دن هر گون عینی ساعاتدا، عینی واختدا کئچن اوتوموبیله میندی. بو دفعه همیشه‌لیک گئتدی.
بوداما هر شئیی گؤروردو. اونو ایسه، یالنیز قاغایی‌لار گؤروردو.
