ایکینجی مرتبهلی دلی
ایکینجی مرتبهلی دلی
یازار: سایمان آروز
کؤچورن: حسین واحدی
“اینسانین تاریخی دلیلییین تاریخی قدردیر” (فوکو)
عادت کیمی اولموشدو منه. بوش واختلاریمدا تبریزین مرکزی دلیخاناسینا گزمهیه گئدردیم.
دلیخانانین سول طرفینده شهرین ان بؤیوک خستهخاناسی یئرلشیردی.
اورکده بوغولموش آرزولار Ürəkdə boğulmuş Arzular
اورکده بوغولموش آرزولار
یازان: حسین واحدی
آنا، اوشاغین قولوندان چكه-چكه، كوچهدن ائوه آپارماق ایستهییردی، قیزجیغاز ایسه، آغلایا- آغلایا، "منه دوندویما آل، من دوندویما ایستیرم!" دئییردی. آنا قونشولارین یانیندا اوزو قیزارا-قیزارا اوشاغی ائوه آپاردی. چورویوب پاسلانمیش قاپینی ایشیللهییب، حیطه گیردیلر.
اوشاغین آغلاماق سسی ائوی آلتینا آلمیشدی. اوشاق حیطده قالیب گؤز یاشلاری اونون تكجه یولداشی اولدو.
آنا، اوتاقدان، گئجه یاغیش یاغان زامان ایچهرییه قویان قابلاری حیطه گتیریب تاواندان دامان سولاری كردییه بوشالتدی. قیزجیغاز، باشین حیطده اولان بؤیوك تاغارا دایاییب، درین یوخویا جومموشدو.
قاپی دؤیولدو، آنا قاپینی آچماغا گئتدی، قاپینی آچارکن ارینی گؤروب:
"آى كیشی نه اولدو؟" "یئنه قاییتدین؟" – حزین سسله دئدی.
کیشی باشینی آشاغی سالیب، اوزوجو سسله: «اوچ ساعاتدی، فحله مئیدانیندا بونا-اونا یالوارماقدان یورولدوم، ایش یوخویدو» -دئییب، یاواشجا ایچهری گیردی.
خرید PDF كتاب "سئوگی یولچولاری"
پوستمودئرن آزادلیق (حیکایه)
پوستمودئرن آزادلیق
یازار: سایمان آروز
کؤچورن: حسین واحدی
یاغیش شیرهاشیرلا یاغیردی. تؤولهنین دامینا تؤکولن داملالار ایچری سوزولوب باشیمیزا تؤکولمک اوچون بیر-بیریله دالاشیردیلار.
سول طرفیمدکی شوشهسیز پنجرهدن باییری گؤره بیلیردیم. گؤزل ایدی.
آما بیزه یاغیش گؤزللیک دئمک دئییلدی. اوستوموزدکی و تؤولهدکی قیغلارلا پئیینلری بیرلشدیریب دامدان دامان سولارلا گؤزوموزه سپیردی.
یاغیش یاغاندا تؤولهده یاشادیغیمی بوتون ووجودوملا حس ائدیردیم.
سویوق اولوردو و آنام مجبور قالیردی منی و قارداش-باجیلاریمی بیر یئره ییغسین.
همیشه ایستهمیشدیم یاغیش آلتیندا دایانیب دویونجا معععع ائلییم.
آنامین گؤزونه گیرمک اوچون یئمک اوستونده قیرغین اولاردی همیشه.
چوبان بیزی اوتارماغا آپارسایدی هئچ، آما بئلنچی گونلر چوبانی گؤزلمهیه مجبور قالیردیق.
یونجانی گتیرنده ده قیامت باشلایاردی. یازیق آنام گؤرردی الینده بیر ایش گلمیر قارغیش ائدردی:
- “اتینیزی شیشده گؤروم بالاااا! چوبانا یئم اولاسیز بالاااا!
من هئچ واخت بو جملهلرین معناسینی بیلمهمیشدیم. شیشین نه اولدوغونو بیلمیردیم. هئچ آنام دا معناسینی بیلمیردی.
شهلانین ننهسی Şəhlanın nənəsi
شهلانین ننهسی
یازار: ژاله اسماعیل
کؤچورن: حسین واحدی
دیوارین کونجونده بیر مدت یوماغا دؤنندن سونرا یادینا نه دوشدوسه، تئز قالخیب تئلئویزیونو آچدی. چای سوزدو. پنجرهنین بوخاریندا آچیق پنجره شکلی چکیب، اورادان اوزون-اوزادی قار اؤرتموش یولا باخدی. تئلئفون زنگ چالدی. سبینه ایدی.
- نئینیرسن؟
- اوشویورم.
- قازی آچ دا.
- تئلئویزیونو آچمیشام.
- دلیسن؟
- سن بیزیم شهلانین ننهسینی تانیییردین؟
- یوخ. او هارادان یادینا دوشدو؟
- هئچ. منی آنجاق شهلانین ننهسی باشا دوشردی.
- او نییه؟
- شهلانین ننهسی یای واختی همیشه دئیرمیش، تئلئویزیونو سؤندورون، بیشدیک ایستیدن.
سبینه اورکدن گولدو. صاباح ایشده دانیشماغا مؤوضوسو واردی.
قوجا كیشی ایله خاقان/ناغیل
::: ناغیل (داستان فولکلوریک آذربایجان با ترجمه فارسی)
قوجا
كیشی ایله خاقان
حاضیرلایان: حسین واحدی
قدیم زامانلار بیر اؤلكهنین خاقانی اؤزونه یئنی و عظمتلی
بیر سارای تیكدیریب، جارچیلارینا امر ائدر شهرلرده جار سالسینلار هر كیم بو سارایدان
ایراد تاپیرسا، ایستهدیگی قدر قیزیل وئرهجهیم، ترسینه گلیب تاپا بیلمهسه باشین
بدندن آییراجایام.
گونلر كئچیر هئچ كیمدن خبر چیخمیر. بیر قوجاكیشی بو خبری
ائشیدهرك اؤز-اؤزونله دئییر:
"من عؤمورومو ائتمیشم، گئدیم او سارایی گؤروم،
اولابیلر بیر ایرادلار تاپابیلم، دیبی، دیریلمك یوخسا اؤلمكدیر."
یولا دوشوب، باشكنده یئتیشیر. خاقانین سارایینا یئتیشیب،
دئییر، خاقانا خبر وئرین بیری تاپیلیب سنین سارایینا ایراد چیخارتسین. خبری خاقانا
یئتیریب، اونو ایچری آلیرلار. خاقانین یانینا چاتاندا، خاقان دئیهر:
"آی كیشی بیلیدیگنی كیمی ایرادلارینی ثابت ائده بیلمهسن
یاشاییشدان آیریلمالیسان!"
كیشی ایسه جاواب وئریر:
"سیزین سارایین ایرادلاری چوخ بللیدیر، ایندی اونلارا
ایشاره ائدیب سیزه ثابت ائدهجهیم."
خاقان اوندان ایرادلاری ایستهییب، قوجاكیشی بئله جاواب
وئریر:
"بو سارایین بیرینجی ایرادی بودور؛ چوخ گؤزل، عظمتلی و
یئنی اولسادا سیزه وفا قیلمایاجاقدیر. ایكینجی ایراد ایسه اونون گلن یوز ایل
ایچینده دییشمهسیدیر، آغاجلاری یئكهلهجك، سندن سونراكی خاقانلار یئنی
دووارلار تیكهجك و مختلف دییشیكلرله اوزبهاوز اولاجاقدیر."
خاقان بو سؤزلرین قاباغیندا هئچزاد دئیه بیلمهییب، قوجایا
اؤزو ایله آپارا بیلدیگی قدر قیزیل وئریر.
ایستانبول شرق ماهنیسی
"ایکی قاره بیر شهر: ایستانبول"
ایستانبول شرق ماهنیسی
یازار: حسین واحدی
şəkil: Ömer Şahin
اولدوزلو گئجهلری ایله باش-باشا قالان ایستانبولون کوچهلری عشق ایله
بزهنیب. شکیللرله فیلم لرله تانیش اولموشام ایستانبول لا. اونلاردا گؤروموشم
ایستانبولون ائله اولدوغونو. بورالاردا چوخلارینا ایستانبول یاد اولسادا منه جان
اولوبدور.
عوثمانلی دؤوروندن قالان جامیلری (جامعلر)، اذانلاری، دار کوچهلری، گؤزل
کؤرپولری، دنیز قوشلاری، گمیلر، تکنهلر، مینارهلر و... میلیونلارجا اینسان.
بونلار ایستانبولدان آیریلارمی؟
بیر گون ده قالا بیلمز ایستانبول!
دنیز قوشلارینین سسی ایله اویانان ایستانبول، نازلی گونشین تئللرینی داراماسینا باخیب گونو باشلاییر. خالقی ایسه اویانیب یئنی بیر گونله ایش باشلاییر. گمیلر گلیر-گئدیر، اویناییر. کؤرپولر ایسه بزنمیش الوان چیراقلاری ایله قاش-گؤز آتیر بالکن دا سسسیزجه دایانیب سئوگیلیسینین عسگرلیک دن دؤنمهیینی گؤزلهین قیزا. صاباح یئلی یاواشجا اسمهیه باشلاییب تکنهلری یولا سالیر. بالیقچیلار آللاه اومید یله دنیزدن روزا قازنمایا گئدیرلر.
سئچیلمیش شکیللر
موری/ حیکایهجیک
موری
یازار: روبرت والزر
چئویرن: حسین واحدی
گونلرین بیر گونو، بیر کیشی وارییدی "موری" آدیندا. پالتارلاری همیشه دوزنلی[مرتب] اولان بیر کیشی ایدی. البته بؤرکو بیرآز کؤهنه و بوزارمیش گؤرونوردو. آما مورینین اصیل قیافهسی چوخ جدی اولماسیندایدی. اؤزونه چوخ جدی بیر قیافه توتوردو، ائله باخیری ائلهبیل ایندی اؤلمهلی ایدی. باشقالارینا حیاتین اؤنونده بئله بیر قیافه توتان آداملار، سئویلمزلر. موری دئمک اولار اورتاعصرین پهلوانلارینا اوخشاییردی، بیر قولدور کیمی ایدی. دوشونجهلی گؤرونوردو، دوشونجهلی گؤرونن آداملار دا اورهیهیاتان دئییل. خالق[ائل/جاماعات] بئله قاتل سانیلان آداملارین الیندن قاچارلار. یاخشی اینسانلارین ان دوشونجهلیسی خاچا[صلیبه] چکیلیب، خاچ اوزهرینده ایسه اورکیاخان اؤلوم ایله جان وئردی.
موری خوشقلب ایدی، هم یاخشی آدام ایدی همده باشآشاغی ایدی، فقط حددن آرتیق جدی ایدی. خالق ائله قورخو ایله اونا باخیردیلار ائلهبیل باشلارینا بیر بلا گتیرمهیی گؤزلهییردیلر. آما موری مردیمآزار[مردمآزار] دئییلدی، فقط جدی ایدی. شنگول اولوب گوله بیلمیردی. شوخلوق[ظارافات]دا ائده بیلمیردی. ائله بوکی بیر کیمسه شاد اولماییب حیاتی جدی توتا، ائلین[خلقین] گؤزونده آزجا شوبههلی گؤرونمهیه یئترلیدی. موری خالقین هامیسینا چوخ جدی، قورخولو و شکلی باخیردی.
نوبئلچی پاتریک مودیانونون ایلک موصاحیبهسی
نوبئلچی پاتریک
مودیانونون ایلک موصاحیبهسی
چئویرن: نیگار آن
کؤچورن: حسین واحدی
بو ایلین نوبئل
اؤدولونون صاحیبی اولان فرانسهلی یازیچی "پاتریک مودیانو"-نون ایلک
موصاحیبهسی سیز عزیز اوخوجولارا تقدیم اولونور.
پاتریک مودیانو: آلو
هئلئنا هئرنماک:
سلام. نوبئل موکافاتی آلماغینیز موناسیبتی ایله سیزی صمیمی قلبدن تبریک ائدیریک.
پ.م : چوخ لوطفکارسینیز،
چوخ دویغولاندیم.
ه.ه : منیم آدیم
هئلئندیر. سیزه نوبئلپریز سایتیندان زنگ ائدیرم. بیر نئچه سوال وئرمک اوچون
بیزه آییردیغینیز واختا گؤره تشککور ائدیریک.
پ.م : آاا، بلی، بلی، بلی.