اوچ ایل/آنتون چئخوو
او، آرتیق بیر ساعات‌دان دا چوخدور، بورادا اوتوروب موسکووا‌داکی دوست‌لاری، پیوتر، اوتاغی و یازی ماساسی باره‌ده ده فیکیرلشمیشدی. لاپتئو حیرت دولو بیر ایفاده ایله قارانلیق کوچه‌یه، حرکت‌سیز آغاج‌لارا باخدی، سانکی او، نییه سوکولنیکی‌دکی حه‌یط ائوینده یوخ، بورادا یاشاماغی‌نین پئشمانچی‌لیغینی چکیردی. لاکین هر گون سحر-آخشام مال-قارا سوروسو، فیت سس‌لری، توز-دومان ایله مشایعت اولونان کند حیاتی دا اونون اوریینجه دئییلدی. او، موسکووا‌داکی سون گون‌لرینده سئوگی باره‌سینده ائتدیگی صحبت‌لرینی دوشونمه‌یه باشلادی، بیر اینسان اونسوز یاشایا بیلمه‌یه سئوگی، احساس‌لی عشق ایسه بیر وسو‌سه‌دیر- اینسانین آغلین‌دان چیخاریب آتا بیلمه‌دیگی بیر وسو‌سه. اصلینده سئوگی دئیه بیر شئی یوخدور، بو عکس جنس‌لر آراسیندا اولان فیزیکی جاذبه قوه‌سی‌دیر. او، بوتون بو صحبت‌لری خاطرلاییردی، ایندی اوندان سوروشسایدی‌لار، سئوگی نه‌دیر هئچ شوبهه‌سیز جاواب وئره بیلمه‌یه‌جکدی.
آدام‌لار آرتیق یاواش-یاواش کیلسه‌دن چیخماغا باشلامیشدی‌لار. لاپتئو گؤزلرینی کیلسه‌دن چیخان‌لارا زیلله‌یه‌رک دقتله اونلاری ایزله‌ییردی. باش کئشیش خصوصی فایتونوندا قاباقدا، اوبیری‌لر ایسه اونون آردینجا صحبت ائده-ائده، لنگییه لنگییه گئدیردی‌لر. زینقیروو‌لارین سسی کسیلمیش، نؤوبه ایله یانیب سؤنه‌رک بیر-بیرینی اوز ائدن قیرمیزی و یاشیل ایشیق‌لار دا سؤندورولموشدو. سونوندا، لاپتئو اونا لازیم اولان تانیش سسی ائشیتدی. ایلک اؤنجه هیجان‌دان اوره‌یی شدتله دؤیونمه‌یه باشلادی، داها سونرا ایسه اونون تک یوخ، ایکی قادینلا گلدییینی گؤروب مایوس اولدو.
“بو دهشت‌دیر!”- قیسقانجلیق حسی ایله پیچیلدادی، “دهشت!”
یولیا قادین‌لارلا ساغول‌لاشماق اوچون کوچه‌نین سونوندا دایاناندا لاپتئوین اونا باخدیغینی گؤردو.
لاپتئو ده یولیانین اونو گؤردوگونو بیلیب اونا سسلندی:
“ من سیزی گؤرمه‌یه گلیرم. آتانیزلا صحبت ائتمک ایستییرم. ائوده‌دیرمی آتانیز؟”
“چوخ گومان”،-دئیه او جاوابلاندیردی- “بو واخت‌لار عادتا ائوده اولور”.
دؤنگه بویونجا اوزانان باغ-باغچا، حصار بویونجا سیرا ایله دوزولموش جؤکه آغاج‌لاری آی ایشیغیندا اؤز کؤلگه‌سینی یولا سالیر، بیر طرفده ده قارانلیغا قرق اولموش هاسارین دیبینده دایانیب پیچیلتی ایله صحبت ائدن قادین‌لارین سسی ائشیدیلیردی. أهنگ گوللری‌نین خوش عطری ایله اوت-علف‌ین قوخوسو بیر-بیرینه قاریشیب اطرافی بوروموشدو. لاپتئو ایسه نه پیچیلتی ایله ائدیلن صحبت‌لری ائشی‌دیر، نه ده بو عطری دویا بیلیردی؛ او یالنیز و یالنیز یولیانی فیکیرلشیردی. یولیانین حسرت‌له بوینونا ساریلا‌راق قوجاقلاماق، اوز- گؤزون‌دن، چییین‌لرین‌دن اؤپوب باغرینا باسماق ایسته‌یی اونون بوتون روحونا حاکم کسیلمیشدی. و بوتون بون‌لارلا برابر او، یولیانین آیاق‌لارینا دوشمه‌یی، قول‌لاریندا هؤنکورتو ایله آغلاییب نئچه ایلدیر اونو گؤزلدییینی سؤیلمیی ده پلانلاشدیرمیشدی. اوسته‌لیک او، بوتون بونلارین خیال اولدوغونو، صاف سئوگی‌سی‌نین پوچ اولاجاغینی دا بیلیردی، چونکی اونون سئوگی‌سی قارشیلیق‌سیز ایدی.او، هر شئیینی ایتیردییی کیمی نه واختسا بو سئوگی‌سینی ده ایتیرمک قورخوسو ایله یاشاییردی.
یولیا آرتیق شفقت دولو بیر ایفاده ایله باجی‌سی نینا فیودوروونانین خسته‌لیگی باره‌ده دانیشماغا باشلامیشدی. خرچنگ خسته‌لییین‌دن اذیت چکن نینا ایکی آی بوندان قاباق عملیات اولونموش و ایندی هر کس اونون ساغالماسینی گؤزله‌ییردی.
“بو گون اونو گؤرمه‌یه گئتمیشدیم”-یولیا دئدی- “منه ائله گلیر, او، بو هفته کئچن هفته‌یه نیسبتا داها سولغون گؤرونوردو”.
“همم”-لاپتئو راضی‌لیق علامتی اولا‌راق باشینی ییرغالادی-“سیمپتوم‌لاری[نشانه‌لری] برپا ائتمک غیری-ممکن گؤرونور، هر گون اونون داها دا پیسلشدییینی گؤرورم، أن دهشت‌لی‌سی ایسه بو هامیمیزین گؤزو قارشی‌سیندا باش وئریر آما هئچ بیریمیز اونا کؤمک ائده بیلمیریک. بیلمیرم هئچ بونون آخیری نئجه اولا‌جاق؟!”
“آه عزیزیم! نئجه ده دولغون و گومراه ایدی بیر واخت‌لار”- بیر آنلیق سوکوت‌دان سونرا یولیا دئدی، “هر کس اونا “موسکووا کرالیچاسی” دئیه مراجعت ائدیردی. نئجه ده گؤزل گولوشو وار ایدی، گولرکن گؤزلری‌نین ایچی گولومسه‌ییردی. او، نه گئیینسه اونا یاراشیردی، کندلی قیز کیمی ده گئیینسه هامی‌دان گؤزل گؤرونوردو”.
حکیم سئرگئی بوریسوویچ ائوده ایدی. دولو بدن‌لی و قیرمیزی صفتی اولان بو آدام دیزلرینه قدر اوزون پئنجک گئییندییینه گؤره آیاق‌لاری چوخ قیسا گؤرونوردو. او، کابینئتینده اللری جیبینده گزیشه‌رک دوداق‌آلتی نسه اوخویوردو: ‘رو-رو-رو-رو’. باکئنباردی و ساچ‌لاری دارانمامیش اولدوغونا گؤره چوخ سلیقه‌سیز گؤرونوردو؛ ائله بیل یوخودان ایندیجه دورموشدو.
“جناب لاپتئو سیزی گؤرمک ایستییر”- قیزی اوتاغا داخیل اولا‌راق اونا سسلندی.
