هر گون اورمو گؤلونه باش چکرم
اورمو گؤلونون ساحیلینده دولانارکن آلتی اوخویان امیرحسین ایله اوز-اوزه
گلدیم. بالاجا کوچوغو ایله اورمو گؤلوندن ساحیله ساری گلیردی. بیر چایلیق
صؤحبتیم بو بالاجا اوغلان ایله بیر بهانه اولدو بیرداها اورمو گؤلو اوچون
داریخام، دالغالی سولارینی گؤزله‌یم و انتظار چکم او خوش گونلرین
قاییتماسینی.
چوخ بالاجا گولمان کندینده یاشایان امیرحسین تک باشینا قورخماز بیر آسلان
کیمی گولمان ساحیلینده گؤلون خئیلاق ایچینه ساری گئتمیشدی. ماراقلی،
دیللی-باشلی و انرژیلی بیر اوشاق ایدی. اومید ائدیرم بالاجا بیر صحبتیم
سیزین اوچون ده ماراقلی اولسون.
- هارادان گلیرسن بوجور چومورلو؟
- دریادان گلیرم...
- قورخموسان تک باشینا؟
- تک دئییلم رئکس ده (بالاجا ایتینه دئییردی رئکس) منیم له گلر...
- گؤلده بیرزاد یوخدو نییه گئدیرسن؟
- یوخ بیرآز سو گلیب گئتمیشدیم باخام. هرگون گئدرم. اورادا رئکس ایله اوینارام.
- رئکسی چوخ سئویرسن؟
- همیشه رئکس ایله‌یم. باخ اوشویور. (بونو دئییر سونرا رئکسین آیاقلارینی زور ایله سوخور یاغمورلوغون قاباق جیبینه)
- دریانی دا (اورمو گؤلونه عادت اوزو ایله هامیمیز دریا دئییریک) رئکس کیمی سئویرسن؟
- هن چوخ خوشوم گلیر آما حئییف قورویور...
- اولسون دوعا ائله بیرگون یئنه دوزلر!
- آللاه ائله‌سین. چوخ خوش اولار. آتام دئییر اوندا هامی گلر بورا. بیزده کؤچوب گئتمه‌ریک.
- کندین اوشاقلاری درسه هارا گئدیر؟
- گئدیریک گولمان شهرجییینده اولان مدرسه‌یه.
- امیرحسین دانیشیغیمیزدان سئویندیم. دریادان گؤز اول.
- ساغ اولون. (دوزلو قیافه‌سی ایله گولور و سونرادا ساغوللاشیر)
