آذربایجان کند لری ایله شهرلرینین نه یی آدلیم دیر ؟
1- اسکونون دوشابی ؛ چوره یی هابئله پالیتی مشهوردور .
2- ماماغانین قارپیزی مشهور دور.
3- خویون سیمیشقاسی ایله ایپ بورکو ؛ هابئله قیش پالتارلاری یا خود گئییم لری مشهور دور .
4- تبریزین قولابیه سی ؛ کوفته سی ؛ آجیلی ؛ لوکاسی و بیر چوخ یئمک لری مشهور دور .
5- اورمونون بیت میش نوغولو مشهور دور .
6- زونوزون آلماسی مشهور دور .
7- سارابین کره سی مشهور دور .
8- ساوالانین بالی مشهور دور .
9- ماراغانین صابینی هابئله باسلیغی مشهور دور .
10- آذرشهر یا هامان توفارقانین لپه سی مشهور دور .
11- قره مه لیین یئمیشی مشهور دور .
12- سردری نین آلچاسی ایله آغ هولوسو مشهور دور .
13- میانداب یا خود قوشا چایین قندی مشهور دور .
14- مرندین آریی ایله فریی مشهور دور .
15- لیقوانین پنیری مشهور دور .
16- لاله نین بامادورو ایله بیبه ری مشهور دور .
17- واسیمینجین شور خیاری مشهور دور .
18- هریزین قالی سی مشهور دور .
19- مشگین یا خود خیاوین اوزومو مشهور دور .
20- بینابین کابابی مشهور دور.
21- هربی – بره نین قیزیل گولو مشهور دور .
22- آخماقیه نین چوره یی مشهور دور .
23- بوستاناوانین یئر آلماسی ایله فتیری مشهور دور .
24- زنگانین پیچاغی مشهور دور .
25- گانباهانین آیی سی مشهور دور .
26- ایلخیچی نین سوغانی مشهور دور .
27- کندوانین سویو مشهور دور .
28- ملیک کندی یا بوگون دولتی سندلرده ملیکانین قورو اوزوم لری مشهور دور .
29- شیرامینین اوزومو مشهور دور .
30- شام قازانین قایماغی مشهور دور .
31- حکم آوارین تیرپی مشهور دور .
ساوه ماحالینین تانینمیش ؛ هابئله خوش ذووقولو شاعیری ؛ حاج قاسیم اوغلو رحمتلی حاج اکبر رزاقی ( 1299 – 21/5/1368 تاسوعا گونو ) شعرلرینین بیرینده بیر سیرا بولکه لرین تانینمیش شئی لرین باجاریق لا آد آپارمیش دیر . البته بو یئرلرین بیر سیرالارین تورک اوتوراق لاری احتوا ائدیرلر کی شاعیر منجه ماراقلی بیر موضوع یا اشاره ائتمیشدیر . شاعیرین شعرینین بیر سیرا بیت لری بئله اولموشدور :
... وئریبدی غله نی کرمانشاها ساری یاغ ایله ات و داوار ؛ سوتو بو اولکه لرستانه
اریک له قیسی دماونده ؛ شهریاره اوزوم وئریب دولابه خیاری ؛ توتو براقانه
شیره و باسلیغی وئرمیش ملایره یارادان چاناق ایله گونو وئرمیش خدا همدانه
وئریبدی جهرما خورما و قمصره عطری قالینی عقرب جراره ایله کاشانه
نار ایله انجیری ساوه محالینا وئرمیش شیرین قووونو زرنده ؛ پیچاغی زنگانه
چایینی لطف ائیله ییب لاهیجان ولایتینه شکر خوزستانا ؛ قندین وئریب فریمانه
او شهسواره وئریب پورتاغال و نارنگی اوزومو قزوینه و پوسته نیده داموغانه
وئریبدی ماهی ارزانی رشت و انزلیه مرکبات و دویونو وئریبدی گیلانه
تعاروف ایله قاتیق شهر ری اهالی سینا گز ایله هئیوانی لطف ائیله ییب صفاهانه
او یزده پشمک و گرگانه خربزه قند تک قوما سوهانی وئریب زیره نیده کیرمانه
وئریبدی طالیبی و گرمکی ورامینه هوای دلکش و گیلاس و آلما شمرانه
نطنزه آرمود وئرمیش بهارده قارپوز سیغار ایله توتون و تریاکی توسیرگانه
وئریبدی کوفته کبابی بلاد تبریزه کره نی شهر سرابه ؛ پنیری لیقوانه
پشنده یاخشی یئر آلما و خمسه یه بوغدا وئریبدی شافتالینی ؛ آلمانی خوراسانه
قاچاقلی یورفا آتی تورکمه نه وئریبدی خدا خوروزو لاره ؛ سیقرلا بوغانی سیستانه
یئمیش له آق دوشو و مزلقانه روزی ائدیب سرین هوانی وئریب قار ایله قار قانه
تامام مملکته نعمتی وئریب بوللو عوضده لطف ائیله ییب اشتهانی تهرانه
فکاهی شعر دئییب شاد قیلماغا خلقی وئریبدی " اکبر رزاقی " نی میصیرقانه .
قایناقلار ؛ ایضاحلار :
1- ساوه دن بیر ایشیق – حاج اکبر رزاقی نین دیوانی ؛ تهران نشر اندیشه نو ؛ 1390
2- بو سطیرلرین یازارینین ( رضا همراز ) شخصی فوندو - تبریز