واختین خئیر آللاهیم
واختین خئیر آللاهیم
یازار:حسین واحدی
سلام آللاهیم، هر واختین خئیر اولسون، یئنه اوره‌ییم داریخدی و یئنه سنه گلدیم آللاهیم، اوره‌ییم چوخ دولودور، یامان کیمسه سیزله‌ییب، یئنه سؤزلریمی دئمه‌یه کیمسه تاپا بیلمه‌ییرم، یانی دئمک اولار، کیمسه یوخدورکی! آللاهیم دئدیگیم کیمی اوره‌ییم چوخ دولودور، چوخ!
اینسانلاردان چوخ داریخمیشام، کیمسه‌یه نه قدر یاخشیلیق ائدیرم، عوضینه پیسلیک گؤرورم، نه قدر چالیشیرام بو پیسلیک‌لره قارشی اولوب عوض آچام ائده بیلمه‌ییرم و گئت- گئده بو اینسانلار اوره‌ییمی داها چوخ سیندیریرلار، آللاهیم نه ائدیم، نه ائتمه ییم، قالمیشام، اؤزون کؤمک اول، سندن سونرا کیمه گیلئیله‌نیم، کیمه دئییم سؤزومو، کیمه آچیم اوره‌ییمین سوفراسینی؟!
آللاهیم چوخ سئویرم هامی‌یا فایدالی اینسان اولام، یاخشیلیق ائدم، الدن توتام، دؤزملو اولام، سینمایام، هرآن یاشایام و یاشاماقدان داد چیخارام، سنه یالواریرام آللاهیم سندن سونرا کیمسه منه یاردیم ائده بیلمز.
اومود وئر منه، گؤزل حیات، صالح اؤولاد، غم‌سیز یاشات، اوغور یارات، اینسانلیغی- باریشی چوخات، آللاهیم- آللاهیم، آنجاق فقط سندن ایسته‌ییرم، گؤزل حیات، گؤزل حیات.
نه اولار آللاهیم آییرما بیزی...
یازان: حسین واحدی
ایلك گؤروشوموز یادیندامی؟ داشلی بولاغین قیراغیندا كوزه نی دولدوراركن. سن منی گؤروبده منه وورولموشدون. بونو تویوموزدان سونرا دئمیشدین. یادیندامی؟ ایلك گوندن بوتون سئوگی ایله سن له یئنی بیر یاشاییش باشلادیم. سنی سئویرم سؤزونو دیلیمدن یئره سالمادیم. ائویمیزین دؤرد بوجاغی بونا شاهید دیر بیلیرم. بیزی كیسمه آییرا بیلمز، سنه دئمیشدیم. یادیندامی؟
بیر گون شهر بازاریندان ائوه دوندویون ده، منه گؤزل بیر گوموش دن بویون باغی آلمیشدین. هله ده بویونومدادیر. باخسانا!
سن منی سئویرسن، من ده سنی، بو اوزدن سندن هئچ واخت آیریلمارام سؤزونو، وئرمیشدیك بیر-بیریمیزه. یادیندامی؟
كیمسه بونو اینانمازدیرسا ایندی گلسیب اینانسین! دام-داشین آلتیندا قالمیشیق! یئر ترپنمه سینین زورو بیزه چاتمادی. سونوندا، هامی شاهید اولدو بو تایسیز سئوگیمیزه ...
و یئر، اودوزدو بیزیم سونسوز سئویگیمیزه... سئوگیلیم یئنه سنی سئویرم... سندن آیریلا بیلمه ییرم... نه اولار آللاهیم آییرما بیزی ...
... نه اولار آللاهیم آییرما بیزی!
