ائلیس مونرو: “کیم چئخوولا مقایسه ائدیلمک ایسته‌مز کی؟”
ائلیس مونرو: “کیم چئخوولا مقایسه ائدیلمک ایسته‌مز کی؟”
حاضیرلایان: حسین واحدی
- سیزی قیسا حیکایه‌لره جلب ائدن ندیر؟ بلکه، بو داها قیسا فورما سیزه اؤزونوزو آچماق اوچون ائله بیر شرایط یارا‌دیر کی، بونو رومان ائده بیلمز؟
- منه ائله گلیر حتی حیکایه‌لری ائله یازیرام کی، قیسا حیکایه ژانری‌نین قانون-قایدا‌لارینا خلل گتیریر، رومان‌لارین اینکیشاف خط‌ینه ایسه هئچ عمل ائتمرم. من بئتون‌لو بیر فورما حاقیندا دوشونمورم، داها چوخ بدیعی ادبیاتین اؤزو حاقیندا، دئیه‌ک کی، ادبیاتین اؤزولو حاقیندا دوشونورم. من نه ائتمک ایسته‌ییرم؟ حیکایه دانیشماق ایسته‌ییرم، کؤهنه طرزده، کیمه‌سه نه‌یینسه باش وئرمه‌سی حاقدا، لاکین ایسته‌ییرم کی، بو “باش وئرمه” کسکین موداخیله‌لرله، ایره‌لی-گئری دؤنمه‌لرله، قریبه‌لیک‌لرله موشایعت اولونسون. من ایسته‌ییرم کی، اوخوجو تعجب کیمی بیر حس کئچیرسین – “باش وئرمه” ایله باغلی دئییل، باش وئرن هر شئیله باغلی. اونا گؤره ده منه ان چوخ بو اوزون قیسا حیکایه‌لر اویغون گلیر.
- سیز هر هانسی بیر حیکایه و یا بئتون‌لو بیر تصویرله باغلی ایده‌نی هارا‌دان گؤتورورسونوز؟
- بعضن ائله اولور کی، من حیکایه‌نی هانسیسا بیر خاطیره، یا دا حکایت‌دن ایلهام‌لانا‌راق یازماغا باشلاییرام، لاکین حیکایه‌نین سونونا یاخین همین خاطیره آرتیق تانینماز بیر حالا گلیر. تصور ائدین سیزین خاطیره‌نیزده قاطاردان ائنن چوخ گؤزل-گؤیچک بیر گئییمده اولان گنج قادین وار. او ائله گؤزل گؤرونتو یارا‌دیر کی، عائله‌سی اونو سانکی پالتار آسیلقانین‌دان دوشورور (منیمله بیر دفعه بئله بیر شئی باش وئریب) و ائله اولا بیلردی کی، بو قادین آغیر دئپرئسیا‌دان[روح دوشکونلویو/افسرده‌لیک] سونرا ساغالماغا دوغرو گئدن، اری، آناسی و آناسینا قوللوق ائدن طب باجی‌سی[پرستار] طرفین‌دن قارشی‌لانان بیر قادین اولسون، اری ایسه خبری اولما‌دان همین طب باجی‌سینا وورولوب.
ادبیات اوزره 2013-جو ایل نوبئل موکافاتی قالیبی ائلیس مونرو
ادبیات اوزره 2013-جو ایل نوبئل موکافاتی قالیبی ائلیس مونرو
چئویرمن: نرمین موسایئوا
کؤچورن: حسین واحدی
ائلیس مونرو* 1931-جی ایل، کانادانین اونتاریو[ontario] ویلایتینده آنا‌دان اولموش‌دور.اونون آناسی معلمه، آتاسی ایسه اکینچی اولوب. اورتا مدرسه‌نی بیتیرن‌دن سونرا، او، باتی[غربی] اونتاریو بیلیم‌یوردوندا ژورنالیست‌لیک و اینگیلیس دیلی اوزره تحصیل آلماغا باشلاییر، لاکین 1951-جی ایلده عائله حیاتی قورا‌راق، تحصیلینی یاریمچیق قویور. داها سونرا حیات یولداشی ایله بیرلیکده ائلیس، کولومبیانین بریتیش ایالتی‌نین ویکتوریا شهرینه کؤچور و جوتلوک بورادا بیر کیتاب ماغازاسی آچیر. مونرو حیکایه یازماغا یئنی‌یئتمه یاش‌لاریندا باشلاسا دا، اؤزونون کیتاب حجمینده ایلک اثری 1968-جی ایلده نشر ائدیلمیشدی. ”شن کؤلگه‌لرین رقصی” آدلی حیکایه‌لر توپلوسون‌دان عبارت کیتاب کانادادا بؤیوک ماراقلا قارشیلانمیشدی.1950-جی ایللین اول‌لرین‌دن اونون موختلیف ژورنال‌لاردا اثرلری درج اولونموش‌دور. 1971-جی ایلده “قیزلارین و قادین‌لارین حیاتی” آدلی حیکایه‌لر توپلوسو نشر اولوندو و بو کیتابی تنقیدچی‌لر “تربیه‌وی رومان” کیمی شخصیت‌لندیردیلر.
