تورگئنیئوٰدن بیر حیکایهجیک
سئرچه
یازار: ایوان تورگئنیئو*
کؤچورن: حسین واحدی
من اوودان قاییدیب، باغین خیابانی ایله گئدیردیم. ایت قاباقدا قاچیردی.
بیردن او، آددیملارینی یاواشلادی و قوش دویموش کیمی یئره یاتیب گیزلینجه ایرهلی یئریمهیه باشلادی.
خیاوانی دقتله سوزوب، دیمدیگینین یانیندا ساریلیق و باشیندا قو توکو کیمی اولان کؤرپه بیر سئرچه گؤردوم. یووادان دوشموشدو (کولک خیابانین توز آغاجلارینی برک ییرغالاییردی)، تزهجه چیخان قانادلارینی عاجز حالدا آچاراق حرکتسیز اوتورموشدو.
ایتیم یاواش-یاواش اونا یاخینلاشیردی. بیردن قارا دؤشلو قوجا سئرچه یاخینداکی آغاجدان داش کیمی قوپوب دوز ایتین قاباغینا دوشدو و توکلری پیرتلاشمیش، ائیبجرلشمیش بیر حالدا، اومیدسیزجهسینه و یازیق-یازیق جیویلدهیه-جیویلدهیه ایکی دفعه ایتین ایری دیشلی آچیق آغزینا طرف آتیلدی.
او خلاص ائتمهیه جومموشدو، او، اؤز بدنی ایله کؤرپهسینی قورویوردو... لاکین خیرداجا ووجودو بوسبوتون دهشتدن تیترییر، سسی جیرلاشیب خیریلداییردی. او طاقتدن دوشور، اؤزونو فدا وئریردی!
ایت اونا نئجه نهنگ بیر حئیوان کیمی گؤرونوردو، یقین! بونا باخمایاراق، او، اؤز اوجا تهلوکهسیز بوداغیندا اوتورا بیلممیشدی... ایرادهسیندن قودرتلی اولان بیر قوه اونو بوداقدان قوپاریب یئره آتمیشدی.
"ترئزور"وم دایاندی، گئری چکیلدی... گؤرونور، بو گوجو او دا دویموشدو...
چاشمیش ایتی چاغیردیم و بؤیوک احترام حسیله اورادان اوزاقلاشدیم.
بلی، گولمهیین. من او کیچیک، قهرمان قوشا، اونون محبت جوشقونلوغونا پرستیش ائدیردیم.
محبت اؤلومدن و اؤلوم قورخوسوندان گوجلودور، - دئیه من فیکیرلشیردیم. حیات یالنیز سئوگی ایله اوجالیر و اوندان قوت آلیر.
چئویرن: جلال محمدوو
İvan Turgenyev *
بختلی له بختسیز
بختلی له بختسیز
یازار: حسین واحدی
ایکی گون ایدی، ائوده کیمسه یوخ ایدی. هرگون پنجرهدن بیلهسینه، قاتیغا یاخیلمیش چؤرک، ات-سوموک و... وئرردی ائو ییهسی. پنجره قاباغیندا، آجیندان ماوولداییردی. آیینشایین، سئرچه توو ایله پنجرهیه چیرپیلیب، جان وئریب یئره سرهلندی.
بیر گونش حیكایهسی
بیر گونش حیكایهسی
یازان: حسین واحدی
هامی شیرین یوخودایدی. شهرین زحمتچكن تمیزچیلرینین سوپورگهلریندن اولان خیس-خیس سسی، كوچهدن گلسهده، هئچ كیم شیرین یوخوسوندان اولماییردی.
دوغودان، قارانلیقلار سیلینمكدهیدیلر، اورهیه یاتان اذان سسی، شهری بزهمهیه باشلامیشدی. قارانلیقلار واختی الدن وئرمهدن باتییا ساری یورویوردولر.
شهرین چینار اوستونده اویانمیش سئرچهلرین جوك-جوك ائتمهلری ایسه بیرینین گلمهسینی بللی ائدیردی. یاواش-یاواش، دوم-دورو گؤی، اوزه چیخیردی، بو آرادا، دان اولدوزو یالنیز قالمیشدی. بئلهلیكله، گونش چیخیب، یاشاییشا سلام وئریب، قارانلیقلاری یوخ ائتدی!