او قوش ده‌یدی O quş dəydi
یازان:حسین واحدی
کوچه اوشاقلاری, توپ اوینارکن قونشولارین بیرینین ماشینینا دییب جیزدیلار.
چوخ کئچمه‌دی ماشین صاحاب چیخیب گؤردو. تله‌سیک ایشی اولاراق اونلارا ساری:
- قاییداندان سونرا سیزه دئیه‌جه‌یم، دئییب چیخیب گئتدی.
اوشاقلار او گئدندن سونرا قاپیلارین بیرینین قاباغینا ییغیشیب فیکیرداشلاریق ائتمه‌یه باشلادیلار.
- گلنده دئیه ریک بیر موتورسیکلت ده‌یدی قاچدی، اوشاقلارین بیری دئدی.
بیر آیری سی ایسه بئله دئدی:
- یوخ! دئیه ریک، بیزیم خبریمیز یوخدو!
هر کیمسه بیرزاد دئیییردی. بو آرادا بیری دئدی:
- یوخ اونلاردان یاخشی سی من دئیندی:
دئیه‌ریک، تبلئت ده Angry birds اویناییردیق، آتاندا چیخدی ده‌یدی ماشینا!
او قوشلارین گوناهی نه؟
او قوشلارین گوناهی نه؟
یازار: حسین واحدی
وورورسان، چالیرسان، چاپیرسان، هریانی بیر- بیرینه قاتیرسان، یئری گؤیه، گؤیو یئره یاخیرسان، مقصدین اؤز هدفینه چاتماق‌دیر، بونو یاخشی بیلیریک. شیمیایی بومبالارلا، اینسانلاری قان‌لارینا بله‌ییرسن، ندن؟
چونکو سن ساده‌جه اؤزونو گؤرورسن، اؤزونو! بونو گؤرمه‌یی، اینانماغی، قبول ائتمه‌یی ده ایسته‌مه‌ییرسن!
همیشه ساواش پئشینده اولورسان، باریش سوزو سنین سؤزلوکونده یوخدور کی. سن، سنه اینان اینسانلارلا بیرگه دونیانی محو ائتمه‌یه چالیشیرسان. نییه؟
چونکو سن او بئش گونلوک شاهلیق تختینی گؤرورسن. آل دونیانی وئردیک سنه. گؤتور تاجی-تختی! سنین اولسون. سن بیزی ایلک گوندن جنت‌دن ائشیگه سالدیردین، آلداتدین، یاساقلانمیش مئیوه ایله تاماها سالدین. ایندی ایسه قودرت آدی ایله آلداتماغا چالیشیرسان!
آی سیفلیس شئیطان! سنه آلدانانلارا وای اولسون! وای!
سن مقصدینه چاتماق اوچون هرنه‌یی اؤزونه پیلله ائدیرسن، بونو بیلن-بیلیر! بیلمه‌ین لره وای اولسون. آر اولسون اینسان آدینی یدک چکیب سنه قوللوق ائدنلر آر اولسون آر.
سن هر نه ائدیرسن ائت، آما بیر لحظه دوشون گؤرک، او قوشلارین گوناهی ندیر؟ اونلار ندن قوربان اولورلار، سنین اینسانلاری هلاک ائتمه‌یینین یولوندا؟
