قیزیل داغ
قیزیل داغ
(اؤزبک تورکجه سینده)
1981- إینچی أیلی، جزیره مه کونلرنینگ یاز پلله سی، ایرته سی جمعه دم آلیش کونی ایدی. توشگی آوقتدن کیئین غوج-غوج اؤقوچیلر یاتاقخانه لرینی ترک قیلیشیب، انستیتوت باغی آره لب، سلقین سایه لرده گی یؤلکلرنی ائله نیب، بیر یازیلیب، یه یره ب کیلیش مقصدیده شهرگه تامان آدیمله ی باشله دیلر.
قویاشنینگ إیسّـق تفیدن تورقی کیتگن اسپلت یؤللر اوزره ویجیرلب کؤرینه یاتگن سراب، خوددی، تندیردن کؤتریله یاتگن حرارتگه اؤخشه یدی. کتته یؤل بؤیلب اؤتیب- قئته یاتگن تورلی ماشینه لرنینگ کوچلی آقمی، تؤلقینله نه یاتگن سرابنی بوزیب یوباره ر، گیر- گیرلب قویوق توتونلرنی هواگه پورکر و غوریللب شاوقین سالماقده ایدی. بو آره ده تؤختاوسیز قتنب تورگن آله - سریق توسده گی تکسیلرنینگ غیزیللب اؤتیشی کیشی خیالینی آلیب قاچه دی. کابل شهری توتون و چنگ- تؤزان آستیده زورغه نفس آلرایدی.
