ننه‌م/ زهرا ولیزاده
ننه‌م/ زهرا ولیزاده
ننه جوراب توخویور
ایشله‌ییر بارماق‌لاری.
لاپ کله‌مه اوخشاییر
خیرداجا یوماق‌لاری.
ایلمه وورور، میل سالیر،
جوراب توخویور ننه.
رنگلی ایپ‌له گول سالیر،
گئییم یاراشسین منه.
دئییر قارلی قیش گلیر
ایستی اولسون نوه‌مه.
من‌ده نغمه اوخودوم
نغمه‌سئوه‌ن ننه‌مه.
قایناق: ایشیق
خوروز
آذربایجان اوشاق ناغیل لاریندان:
خوروز
بیری وارمیش، بیری یوخموش، بیر قاری ننه وارمیش. بو قاری ننه نین خوروزو وارمیش. بیر گون خوروز حیه طده ائشه لنن واخت بیر مانات قیزیل پول گؤردو.
- - قوق- قولو- قو، بیر مانات پول تاپمیشام، - دئیه بانلاماغا باشلادی. بونو گؤره ن خاقان امر ائتدی كی، پولو خوروزدان آلسینلار. نؤكرلرخوروزو توتوب پولو اوندان آلدیلار.
بونو گؤره ن خوروز بانلاناغا باشلادی:
- - قوق- قولو- قو، خاقانین پولو یوخ ایمیش. خاقانین امرر ایله پولو خوروزا قایتاردیلار.
خوروز لووغا- لووغا قیشقیردی:
- - قوق- قولو- قو، خاقان مندن قورخورموش.
خاقان حیرص لندی:
- توتون باشینی كسین، - دئدی.
خوروزو توتدولار. جلاد اونون باشینی كسدی.
- - قوق- قولو- قو، نه ایتی پیچاق ایمیش،- دئیه خوروز بانلادی.
آشچی خوروزو قاینار سو ایله دولو قازانا سالدی.
- - قوق- قولو- قو، نه ایستی حامام ایمیش،- دئیه خوروز بانلادی.
خاقان خوروزو یئمه یه باشلادی. خاقانین بوغازیندان خوروزون سسی ائشیدیلدی.
- - قوق- قولو- قو، نه دارجا كوچه ایمیش.
خاقان برك حیرص لندی. اونو سانجی توتدو. آغریدان دورا بیلمیردی. بیردن خوروز ظالیم خاقانین قارنینی ییرتیب چیخدی.
- قوق- قولو- قو، خاقانین قارنی ییرتیلدی، منیم جانیم قورتولدو،- دئیه بانلادی. او، سارایدان قاچیب یئنه ده ننه نین یانینا گلدی.
حاضیرلایان: سكینه امیری
