یاریار/حیکایه
تئز ال-آیاق ائدیب، بیری گلمه‌دن الیمی ایسلادیب باش-گؤزومو دوزه‌تدیم. اوتوراجاقدا لم وئریب بیلگی‌سایارا باخدیم، سیستئم‌ده نه مرخصی‌یه گئدن آدی وار ایدی، نه‌ده ائشیکدن گلن. ماسانین اوستونه کؤلگه دوشمک له باشیمی قالدیردیم. 55 یاش حدودوندا بیر کیشی، توک، اوز- باشین بورویوب، کؤهنه شالوار لا کوت اینینده، تورکییه بورکو ایسه باشیندا. سینیق رادیودان چیخان، یوغون بیر سس له:
-سلام علیکوم!
- سلام مندن دی عمی... بویورون...
سونرا گولومسه‌یه-گولومسه‌یه آرتیردی:
- گلمیشم دیرختور یوکلو یم.
جاواب وئردیم:
- خوش گلمیسن... بویورون ایله‌شین بیر چای وئریم...
- آی جاوان، آللاه سنی ساخلاسین لاپ ثاوابا باتیرسان...
تئز اونا فیلاکس دان چای بوشادیب ماسا اوستونه قویدوم. کیشی‌نین اوره‌یی دولموشویده سانکی، بوشالماغا باشلادی:
-من قولونجولویام، رحمتلیک دده کاتیب-ین یوردوندان...
- چوخ گؤزل... تانیرام... بؤیوک شاعیریمیزدی...
- هه‌یه دئییردیم، قولونجولویام... اورادان گئدرم هر یانا... چوخلو شهرلره یوک آپارمیشام... گئدیب یوک توتوب کریم‌یده گؤتوروب یولا دوشه‌رم... کریم له بیرلیخده
- بس ایکی نفرسیز، خوشدو...
- بلی کریم اولماسا من هئش یئره گتمه‌رم... هر یئره من‌نن گه‌لر... سیمنانا، تئهرانا، مشهده... آذربایجانیمیزن شهرلرینه... دئییرلر ماشینین قوجالیب... بو کاغیذا باخ گؤر قوجا بو قدر یول گئدر؟!
اونون اوره‌یه یاتان گولومسه‌سی، بیر آن‌دا، قیریشمیش اوزوندن آیریلماییردی. او گولومسه‌لر منه ده تاثیر ائدیب، گولومسه ایله دانیشیردیم.
یوک کاغیذینی آلیب باخدیم، گؤزومه قزوین ده‌یدی.
-عمی اورمودان قزوینه گئدیب‌سیز؟ خوش گئدیب سیز دا!
اؤز یانیمدا گولمک گلدی، آخی بورادان قزوینه بیر یول دئییل کی؟
کیشی داشلانیب، دئدی:
-آی جاوان نه قزوینی، گئتمیشم بندرعاباسا، اورادان دا گلمیشم قزوینه! منیم ساوادیم یوخدو، سنده پاسلانمیش ساوادیننان باخسان، یازیب.
کاغیذا بیر دفعه‌ده باخدیم. بلی آشاغی‌لاردا بندرعابباس‌دا وار ایدی. تعجب‌له دئدیم:
-بندر عابباس! ساغولون واللاه! بو قوجا ماشین لا اورا گئدیب قاییتماق هر کسین ایشی دئییل!
- کریم اولماسا گئده بیلمه‌رم. کریم ساغ اولسون.
- کریم به‌ی ده یولدا سوره‌ر؟
- یوخ! او فقط گه‌لر من داریخمییام، من سوره‌رم...
منه چوخ عجاییب گه‌لدی. آخی کی نه اولسون، بیرینی یانینجا گؤتور آپار مملکتین اوباشینا، ال- قولوندا بیر ایش گلمه‌سین، ایشی ده فقط دانیشماق اولسون، بو کیشی نین حوصله‌سینه باخ!
سونرادا فیکیرلشدیم حتمن ایسته‌ییر بیرزاد دا اونا چیخسین، یئنه ایشی دوز گلسین اینشاالله. کیشی هردن الینی بؤرکونه آپاریب، بؤرکو اوسته چه‌کیب یئرینه قایتاریردی. هاوا ایستی اولسادا کوتونودا چیخاتماییردی. یعنی اورمودا بئله گئیینن قدیم کیشی‌لری چوخ گؤرموشدوم. ایستی‌ده کوت گئییب، بؤرک قویان فقط قدیم کیشی‌لردی.
چایی ایچیب قورتاراندان سونرا، تئز بیر کاغیذ حاضیرلاییب، آدینی، تئلفون سایی‌سینی سیستئمه کئچمک اوچون، اوزومو اونا ساری توتوب سوروشدوم:
-عمی آدین ندی؟
- یاشار
- شؤهرتین؟
- یاریار
- تئلفون نؤمره‌نی ده دئ؟
قورتدالانیب، کوتونون جئب لرینی آختارماغا باشلادی!
اؤز یانیمدا دئدیم: عجاییب آدام دی، من تئلفونونو ایسته‌میرم کی، نؤمره‌سینی ایستیرم. تئلفونو تاپیب آرخاسینی چئویریب منه ساری توتدو:
-یاز؟
ساوادی اولمادیغی اوچون تئلفون نؤمره سینی جئب تئلفونونون آرخاسینا یازیب یاپیشدیرمیشدیلار. اونودا یازیب، دئدیم:
-عمی سؤزون دوزو، منیم ده آنا دیلیمده ساوادیم یوخدو!
بو سؤزه جاواب وئرمه‌دن، دئدی:
-من گئدیم؟
دئدیم: یوک کاغیذینی دا گؤتور گئت ساتیش بؤلومونه. قاپیدان چیخارکن، چاغیردیم:
-یار یار عمی، لطفا گلن سفر بورادان یوک وورماغا گلنده کریم آغانی دا گتیر.
سؤزون دوغروسو، چوخ ماراقلانمیشدیم کریمی یاخیندان گؤرم. چوخلو خیالات بئینیمه گلمیشدی. گؤره‌سن نه‌جور آدام دی، بو کیشی اونون نه‌یینه گؤره هریانا اونودا آپاریر؟ نه‌یه بیر آن‌دا کریم آدی دیلیندن یئره دوشمور؟! و...
یاریار فیکیره گئدیب خئیلاق دوردو. گولومسه‌دی. ایسته‌‌مه‌لی قیافه‌سی یئنه او گولومسه ایله اوزه چیخدی. سونرا گؤزلرین، گؤزلریمین ایچینه زیلله‌ییب دئدی:
-اوستا کریم سنین یانیندا، هامینین یانیندا، فقط گؤزلریمیزی دوزعمللی آشمالییخ. دوز دئسخ او هئشواخ بیزی تک قویماز. ایسته‌سن تئلفونونو یاز: 24434.
-------------------------------------------------------------------------
تاسف ایله کئچن هفته ائشیتدیم حیکایه نین اصلی شخصیتی اولان یاریار, آللاه رحمتینه گئتدی. روحو شاد یئری جنت اولسون.
