ائدیتورلاری یاخشی اولان یازیچی‌لار یاخشی‌دیر
تانینمیش ژورنالیست، آپاریجی مارک لاوسونون" بیر یازیچی قیرخ ایل ایچینده باش وئرن، چوخلو یان حیکایه‌لر و موضوع‌لاری بیرلشدیرن بیر رومانی نئجه خیال ائدیر و قورور” سوالینا او.پاموک بئله جاواب وئریب:
“بیلدیییمیز کیمی، اینسان تخیّلو محدود اولور. 600 صحیفه‌لیک رومانی قاباقجا‌دان گؤرمک ممکن دئییل. گؤو‌ده‌نی [بدنه‌نی] فیکیرلشیرسن، بوداق‌لاری تصوّر ائدیرسن، سونرا بیر نئچه یارپاق آغلینا گلیر.
ائپیک [حماسی] اثر فرئسکویا [سولوبویا ایله دیوار، تاوان و گچ اوستونده نقاشی چکمک] بنزه‌ییر: اونو یاراتماغا کونج‌دن باشلاییرسان. بیر ایل مختلف کونج‌لری یازیرسان، سونرا باشقا بیر کونجه کئچیرسن، داها سونرا گؤوده‌نین یئرینی ده‌ییشدیریرسن، سونرا حیکایه‌نی یئنی‌دن کشف ائدیرسن، سونرا سئودییین آدام‌لار دئییرلر: “سن نئینیرسن؟” – بونو آیدینلاشدیرماق اوچون رئداکته‌لر ائتمه‌یه باشلاییرسان… 40 ایلدن چوخدور بئله یازیرام.”
پاموک دئییب، پوپولیار [چوخ به‌یه‌نیلن] فیکره رغماً، یازیچیلیق یالنیز ایش دئییل، ائدیتورلاری یاخشی اولان یازیچی‌لار یاخشی‌دیرلار.
“رومان اونو یئنی‌دن یازدیقجا، یئنی‌دن ایشله‌دیکجه، یئنی‌دن یازدیقجا جلا‌لانیر. ائدیتورلاریمدان ریجا ائدیرم، بو داواملی یئنی‌دن یازما ایشینده منه کؤمک ائتسین‌لر.”
لاوسون یئنی تلویزیون قوتولارین ائله 19-جو عصر رومان‌لارینی صنعت اؤلچولری و مقصد باخیمیندان احاطه ائتدییینی دئینده او.پاموک جاواب وئریب:
“منه أن چوخ وئریلن سوال‌لاردان بیری بودور: "رومان اؤلورمو؟" جاوابیم بئله اولور: گلین رقم‌لره باخاق.
سون یوز ایلده رومان بوتون ادبی فورما‌لاری سیرا‌دان چیخاریب، کنارلاشدیریب: دراما، پوئزیا ایندی مارگیناللاشیب [ده‌یری دوشوب]. اینسانلیق ادبیاتلا رومان واسطه‌سیله علاقه ساخلاییر.
هر بیر گنج تورک 1970، حتی 1980-جی ایللره قدر شاعر اولماق ایسته‌ییردی. ایندی داها شاعر اولماق ایسته‌میرلر. ایندی هامی رومان یازیر.
تانرییا شوکورلر اولسون، اوخوماق و یازماق اینستینکتی [ایچ‌گودوسو/غریزه‌سی] داوام ائدیر.”
قایناق: avanqard
