ائدیتورلاری یاخشی اولان یازیچیلار یاخشیدیر
اورهان
پاموک: ائدیتورلاری یاخشی اولان یازیچیلار یاخشیدیر
Orhan Pamuk: Redaktoları yaxşı olan yazıçılar yaxşıdır
حاضیرلایان: حسین واحدی
“دئ قاردیین” قزئتینین تدبیرلر زالیندا چیخیش ائدن یازیچی رومان ژانرییلا مودئرن شهرلرین بؤیومهسی آراسیندا سیخ علاقه اولماسیندان دانیشیب، بریتانیالی اوخوجولارین سواللارینی جاوابلاندیریب:
“شهرلر رومانلاری بؤیودور، رومانلارسا اؤز نؤوبهسینده شهری میفلهشدیریر (میف= اسطوره) و اونون بؤیوکلویونه بؤیوکلوک قاتیر.”
“من ده مؤولود (سون رومانینین قهرمانی) کیمی گئجهیاری شهره چیخیب اونو گؤرمهیی خوشلاییرام… شهر اینسانلیغین مختلف جیلدلره گیریب گیزلندیگی یئردیر.”
“بیر رومانچی کیمی گزمک، آددیملاماق، باخماق و قیدلر گؤتورمک بؤیوک ذوقدور. فوتو چکمک اوچون آیفونومدان فایدالانایرام، ماراقلی سایدیغیم شئیلرین ویدئوسونو دا چکیرم.”
کیمین اوچون یازیرسینیز؟
کیمین اوچون یازیرسینیز؟
یازار: اورخان پاموک
کؤچورن: حسین واحدی
اوتوز ایللیک یازیچیلیق
حیاتیم بویونجا، هم اوخوجولاردان، هم ده ژورنالیستلردن ان چوخ ائشیتدیگیم سوالدیر
بو. سوالی وئرهنین نیتی و اؤیرنمک ایستهدیگی شئی، یئره-زامانا گؤره دییشیر. آما
سوالی وئرهنین شوبههچی، دوداق بوزن، حیلهچی اداسی هئچ واخت دییشمیر.
رومانچی اولماغا قرار وئردیگیم 70-جی ایللرین اورتاسیندا، تورکییهده بو سوال “پرئ-مودئرن[pre-modern] دردلرله اللـهشن غربدنکنار یوخسول بیر اؤلکهده، صنعت و ادبیات لوکس بیر ایشدیر” شکلینده سسلهنن محدود دونیاگؤروشونو عکس ائتدیریردی. بو دوشونجهنین "سیزین کیمی تحصیللی، مدنی بیر آدام اؤلکهسی اوچون کؤرپولر تیکن موهندیس، یولوخوجو[عفونی] خستهلیکلرله اللـهشن حکیم[دوکتور] اولوب داها چوخ فایدا وئره بیلردی" شکلینده بیر نؤوع ده وار. 70-جی ایللرین اولینده ژان پول سارتر[Jan Pol Sartr] بیافرالی[بیافرا، آفریقادا اؤلکه آدی] بیر فیکیر آدام اولسایدی، رومان یازمایاجاغینی دئیهرک بو دوشونجهنی کوتلهویلشدیرمیش[عموم اوچون رواج وئرمک]، بو دوشونجهنی حؤرمته میندیرمیشدی.