اورمولو فوتوقرافچی، رحمتلیك اكبر عباسپور
اورمولو فوتوقرافچی، رحمتلیك اكبر عباسپور
حاضیرلایان: حسین واحدی
آذربایجانین گؤزل شهری اولان اورمیهده دونیایا گلن بوتون اینسانلار، ایستر-ایسته‌مز بو شهرین تانری وئردیگی گؤزللیك‌لره گؤز یوما بیلمه‌ییرلر. بو اوزدن، اورمو اهالیسی اله دوشن ان كیچیك زاماندا طبیعته قوناق گئدر.
اورمو طبیعتی ایله تاریخی اثرلرینی‌ده دیری ساخلاماغا چالیشان عكاس‌لار ایسه طبیعتدن لذت آلاركن، او گؤزللیكلری شكیل ائدیب ساخلاییرلار. دئمك اولار طبیعت ایله یاشاییب تانرینین چكدیگی رسیم‌لردن شكیل چكیرلر.
فوتوقرافچی‌لیق ایله یاشایان گنجلردن بیری رحمتلیك "اكبر عباسپور"دور. عباسپور، 1355-جی گونش ایلینده اورمونون "باكودك" محله‌سینده دونیایا گؤز آچیب‌دیر. او رحمتلی، بو شهرده درسینی باشلاییب درس ایله بیرلیك‌ده "كونگ فو" ایدمانینادا داوام ائدیب اولوسلار آراسی كونگ‌فو حاكیم‌لیك درجه‌سینی الده ائدیر.
اكبر، درس ایله ایدمانین یانیندا عكاسلیغادا علاقه گؤستریب، اونودا اؤیرنیب، پئشه‌كارلیق ایله داوام ائد‌ه‌ر. او، گنج چاغلارینی باشلادیقدا، مختلف عكاسلیق تورلارینا قاتیلاراق اؤزوندن چوخلو شكیل‌لر یادگار قویوبدور. رحمتلیك اكبر، اورمو شهرینین یانیندا، بیر چوخ آذربایجان دیارینین طبیعت ایله تاریخی اثرلریندن‌ده شكیل چكیب اونلاری ائلیمیزه تانیتدیرماغا چالیشیب‌دیر.
