یاریم منه قوناق گلهجک
یاریم منه قوناق گلهجک
یازار: حسین واحدی
آیایشیغی، سوپورگهچینین قیوریلمیش، اوزونو تومارلاییردی. کوچه ده ائولرین یوخو چیراقلاری بالالارین دؤورهسینه ییغیب، ناغیل دئییردی.
سوپورگهچی، سوپورگهسینین خیش... خیش... خیش... سسی ایله، کوچهنی پارلادارکن. اؤز عالمینده زومزومه ائدیردی:
کوچهلره سو سهپمیشم،
کوچهلره سو سهپمیشم،
یار گلنده توز اولماسین،
یار گلنده توز اولماسین...
او، هر جمعهآخشامی، سئوگیلیسی قوناق گلهجکدیر دئیه، کوچهلره سو سهپیب، عشق ایله تمیزلهییردی.
قابوسنامهده قوناقلیق حیکایهسى
قابوسنامهده قوناقلیق حیکایهسى
قوناق اولما!
یازان: عنصرالمعالی کیکاووس بن اسکندر ابن وشمگیر زیار
چئویرن: حسین واحدی
اؤزگه ایله غریبه آداملاری هرگون قوناق ائتمه. هرگون قوناقلارا یاراشیقلی و حاقلى قوللوق ائده بیلمزسن. باخ گؤر بیر آیدا نئچه سئرى اورهیین ایستهییر قوناق قبول ائدهسن؛ اوچ دفعه ایستهییرسن سه، سادهجه بیر دفعه قوناق چاغیریب، اوچ سئریده آچاجاغین سوفرانى، بو بیر سئریده آچیب، عیب آختارانلارین آغزینیدا باغلا. ائوینه قوناق گلنده، اونلارین قاباغینا چیخیب، گولر اوزله خوش گلدین دئییب، اونلارا لایق اولان کیمى قوللوق ائت، بوشکور بلخى دئدییى کیمى:
گئجه گوندوز قوناغی تومارلاماق ان گؤزل ایشلردندیر.
Ø سوفرانین آشاغىسیندا اوتور
قوناق، چؤرک یئمهدن اؤنجه گلیرسه، اونا تازا مئیوهلر گتیر یئسین. بیر آز دایان، سونرا اونلاری سوفرایا چاغیر. قوناقلار سنه دئمهیینجه: "داها بسدیر گل اوتور"، اوتورما. دئ: نه تههر اوتوروم؟ قویون قوللوق ائدیم.
بیرداها سنى چاغیرسالارسا، اوتوروب اونلارلا چؤرک یئ. آما، بؤیوک قوناقلیق دئییل سن یئر تاپا بیلمهیهسن، گئت آشاغیدا اوتور.
قوناقلاردان عذر ایستهمه، عذر ایستهمک بازارچىلارین ایشىدیر. دقیقهده بیر، دئمه: "فلانکس چوخ یئ. هئچ یئمیسن! سنین جانین بونلارین قابیلی یوخدور. سیزه لایق یئمکلر حاضیرلایا بیلمهدیم. بو دفعه باغیشلایین، گلن سفر جبران ائدهرم."
بو سؤزلر محتشم اینسانلارین سؤزو دئییل، ایلده بیر دفعه قوناق چاغیرانلارین سؤزودور، بازارچیلارا تای. بئله سؤزلرله قوناق اوتانیب، دویونجا چؤرک یئمهمیش، سوفرادان آیریلار.