عاغیللی قوجا
عاغیللی قوجا
چئویرن: حسین واحدی
اوشاقلارین های-كوی سسی، یئر-گؤیو آلتینا آلمیشدی.10-12 اوغلاناوشاغی كئچن گونلره تای،كوچه ایچینده فوتبال اویناییردیلار. كوچهدهكی قوجالار ایله اوشاقسیزلار بو دورومدان راحاتسیز اولوردولار.
او كوچهده بیر قوجاكیشیده یاشاییردی. بیرگون اوشاقلار یئنه سس سالیب دینجلیغی بیر-بیرینه ووراندا، قوجاكیشی اونلارین یانینا گئدیب:
ـ آی اوشاقلار،بوگوندن هركیم فوتبال اویناسا، اونا 500تومن پول وئرهجهیم!-دئدی.
ـ عمیجان پول؟-اوشاقلارین بیری، تعجب ایله سوروشدو.
ـ بلی پول...پول وئرهجهیم، -قوجاكیشی گولومسهییب جاواب وئردی.
ـ یانی سیز هركیم فوتبال اویناسا،500تومن وئررسیز؟-باشقا اوشاق دئدی.
ـ ندن وئرمهییم؟ من سیزلری چوخ سئویرم!-قوجاكیشی دئدی.
اوشاقلار، یاشاسین-یاشاسین دئیه-دئیه باغیریب، اویناماقلارینا دؤندولر. عاغیللیقوجا ایسه ائوینه قاییتدی.
نئچهگون قوجاكیشی دئین كیمی سوووشوب، فوتبال اوینایان محله اوشاقلاری فوتبالدان سونرا عاغیللیقوجادان پول آلیردیلار.
گونلرین بیرگونو بیرداها اوشاقلار فوتبال اوینایاندا، عاغیللیقوجا اونلارین یانینا گئدیب، بئله سؤیلهدی:
ـ آی اوشاقلار! بوگوندن، داها من فوتبال اویناماغینیز اوچون پول وئرمهیهجهیم، ایستر اوینایین، ایسترسهده اوینامایین!
بو سؤزو ائشیدن اوشاقلار، تئز فوتبالی یاریدا بیراخیب، ائولرینه گئتدیلر. اونلار بیرداها اورادا فوتبال اوینامادیلار!
-بو حیکایه جیک، همشهری ده چاپ اولوب دور.
عزیز آنام
عزیز آنام
یازان: حسین واحدی
آنام چوخ سئویر منی، من ایسه آنامی. او، «بالا جاندیر، آتا- آنا اولمایینجا بیلمه یه جكسینیز بونون آنلامین.»- دئییر. نه یسه، بونو بیلم، یوخسا بیلمه یم، منیم سئوگیمی، آنامین اوره ییندن آزالدا بیلمه یه جك!
آنام هر گون، منى یوخلار. منی ایش ائوینه گئتمك اوچون یولا سالار. باشقا آنالارا تاى، دالیمجا دا، دوعا ائدر. آنالار یورولمایان بیر موجوددورلار. اونلار، هئچ زامان اوشاقلارا محبت ائتمك دن داریخمازلار. اوركلرین سیندیران زامان ایسه، بیزی اونوتماییب، تئزجه، آللاها: «آللاهیم من اوشاغیمی باغیشلادیم، سنده باغیشلا، نه اولار؟»-دئییرلر!
آنامین باخیشلاری دا منه گوج وئریر. ائودن ائشیگه چیخاندا، اؤنجه گؤزلرینه باخیرام. منه باخسا سئوینه-سئوینه ائشیگه گئدرم. آنام ایسه منیم باخیشمی گؤزله ییر. ائله بیل او دا، اوغلوم ائودن چیخاندا منه باخسین ایسته ییر. آنا قایغیسی، قورتولماز قایغی دیر. آنام، هر زامان منی باش اوجا گؤرمك ایسته ییر. او، من گلنده، فخر له، «اوغلوم-دور گلیر»-دئییر. منیم دیلیمی بئله، تكجه آنام بیلیر!
آنامین توكلری ندن بئله آغارماقدادیر؟ بیلمه ییرم! دایماً نامازیمدا تانریدان اونا بركتلی ایله اوزون عؤمور ایسته ییرم. آللاهیم عؤمرومو ایسته میرم، آل، آناما وئر. آنام یاشاسا محبت یاشایاجاقدیر. محبت یاشاسین ایسته ییرم.
بیلمیرم ندن، هامی چالیشیر دوز ایش گؤرمك له جنته گئتسین. بیلمه ییرلر، جنت آنانین آیاغی آلتیندادیر ...
آناجان! سنى چوخ سئویرم.