سینما – تیاتر عرصه سینین آدلیم هنرمندی : آتش تقی پور
اوستاد آتش تقی پور، 1324-ونجو گونش ایلینده خوی شهرینده آنادان اولموشدور. بیلدیگیمیز كیمی، خویون سینما – تئاتر تاریخیمیزده دانیلماز رولو اولموشدور. اورادان بهروز وثوقی کیمی دونیا شهرتلی هنرمند باش قالدیردیغی اوچون. ائله آتش ده همین شهردن قووزانمیشدیر. او هنر سئورلیک پایین اؤز آتاسیندان کسب ائتمیشدیر. آتاسنی اوز زامانیندا خویدا تانینمیش هنرمندلردن ایدی و بول – بول تیاتر اجرالاری اولموشدور .
کیچیک یاشلاریندان اعتباراً هنر عالمینه آیاق قویان آتش تقی پور 12-13 یاشیندا اؤز چالیشمالارین تیاتر عالمینده باشلامیشدیر. او؛ هنرینین اجراسی ایله درسین ده اوخویوب نهایت چوخ سئودیی رشته یعنی ائله سینما تیاتردا لیسانسینی آلابیلمیشدیر . اوستاد تقی پور؛ پایان نامه سینده آذربایجانین تانینمیش معارف خادمی میرزه فتحعلی آخوند زاده نین اثرلرینه دایاناراق دفاع ائدیب و عالی نومره لر له ماذونیت سندی الده ائتمیشدیر .
بو گؤرکملی هنرمندین آدیندان سوروشاندا ماجرالی بیر قضیه نی نقل ائدیر: كئچمیشلرده بیزیم خویدا گویا آتش خان آدیندا بؤیوک بیر شخصیت وار ایدی. اونون قهرمانلیغی؛ ایگیدلییی ده ائل ایچره دیلده – دیشده گزردی. آتام بئلنچی بیر شخصیته گؤوه نه رک بیر گون ائوده دئمیشدیر: بو اوشاغین آدین آتش سسله یه جک سیز. بوندان باشقا بو اوشاغا بیر آد سسله ینلره لعنت اولسون. بئله لیک ده منیم آدیم آتش اولور. بورادا هم آتش سؤزو تورکجه اولدوغو همده بیر قهرمانین آدیندان آلیندیغی ماراقلیدیر. تاسف له او قهرماندان بو گون آغیز یاندیران بیر خاطره الده یوخدور.
آتش تقی پور نئچه جهت لی بیر هنرمند دیر . او؛ سینما – تیاتر عالمیندن باشقا یازیچی لیق عالمینده ده اؤزوندن بیر سیرا اثرلر چاپ ائتدیره بیلدیكلریندن، بونلاری گؤسترمک اولار :
1- بایاتیلار
2- یالقیز – یالقیز
3- قورخویا سالمایین منی
4- طنز سیاه پوش (فارسجا)
آنجاق دئمه لی یم، بیر چوخلاری کیمی اوستاد آتش تقی پورون دا چاپ اولمایان اثرلری؛ چاپ اولانلاریندان قات – قات یوخاریدا دورور. بونلارلا برابر آتش خانین رول کئچیردییی سریال لاردان بونلاری گوسترمک اولار:
روزی روزگاری، تفنگ سر پر، شب دهم، خانه ای در تاریکی و ... هابئله اونون اونلارجا سینما فیلم لریندن ایسه بونلاری آد چکمک اولار: مسافران، مخترع 2001، طلسم، عروسک، زیر درخت هلو و ...
بو چالیشقان هنرمند سینما عالمینده بیر سیرا اویون بازلیقلاردان گیلئیلی ایدی. او دئییر: قولاغیمیزا دَییر بیریسی یؤنتمنه (كارگردانا) پول وئریب فیلم اویناییر. بو ایش بیزیم چوخ سئودییمیز تیاتر عرصه سینده هئچ اولاسی اولا بیلمزلیگینه چوخ شوكور ائدیریك. تاسف له، بیز بیر تیکه چؤره یه گؤره اوره یمیز سئومه دییی ایشلرده ده اشتراک ائتمه گیمیز دؤنه- دؤنه (دفعه لر الیه) اولوبدور. آذربایجانین فخرلریندن بیریسی اولان آتش تقی پور بوگون حایات یولداشی ایله یاشام سورمک ده دیرلر . بیز بو هنرمندین کئفی یاشام بویو ساز، داماغی ایسه اولدوغو کیمی چاغ اولوماسینی وگونو – گوندن بو اوجسوز – بوجاقسیز وادی ده پارلاماسینی آرزی ائدیریک.
