تیرپانچی قربانعلی /حیکایه Tırpançı Qurbanəli
تیرپانچی قربانعلی
یازار: حسین واحدی
ائشیکدن ائوه یئتیشیب بیر چای ایچمک ایسته‌ییردی. ائوده هئچ کیم اولمادیغی اوچون یورغون-آرغین اؤزونه چای قویمالی ایدی.
ساعات یای آخشامی 20نی گؤسته‌ریردی. آروادلا اوشاقلار آلیش- وئریشه گئتمیشدیلر. چای حاضیر اولاندان سونرا چایینی ایچیب بیر دورمک یاوان چؤرک یئییب باشینی یئره قویوب یاتدی.
ساعات گئجه 22:12ده. آروادلا اوشاقلار یئنی آلمیش ماشین‌لا آلیش‌وئریش له گزمک‌دن سونرا ائوه چاتدیلار. قارینی کاباب لا باسدیرمیشدیلار.
آرواد بیرآزدان اوتاقدا یاتماغا گئتدی. کیچیک اوغلان ایسه بیرآز تازا آلدیغی اویونجاق‌لار لا اویناییب یاتدی. 20 یاشینداکی اوغلان ایسه رئسیوری آچیب باخماغا باشلادی.
سحرچاغی، هرگون ساعات صوبح آلتی‌یا قورولان ساعاتین زنگی ایله قوربانعلی یوخودان اویانیب سویودوجودان ایکی- اوچ خورما گؤتوروب چؤرک آراسینا قویوب ائودن ائشیگه چیخدی. چوخراق یول گئدن دن سونرا دایاندی. تله‌سیک ائوه ساری قاییتدی.
تیرپان قاپینین آرخاسیندا قالمیشدی، تیرپانی گؤتوروب پیادا فهله مئیدانینا ساری یئنه یولا دوشدو.
او هر دفعه تازا ایش تاپماق اوچون 6:30 دا ائودن چیخیب پیادا فهله مئیدانینا گئدیردی. نئچه گونلوک ایش اولاندا ایسه ساعات 7:30دا یولا دوشردی.
بیر هفته ایدی 10 میلیون تومن وام گؤتوروب گنج اوغلونا ماشین آلمیشدی. سندین ایسه اونون آدینا یازدیرمیشدی.
قوربانعلی 47 یاشیندا ایدی. او بو یاشا قدر هئچ واخت سینما‌یا گئتمه‌میشدی. گزمه‌یه چیخمامیشدی. ایسته دیگی پالتاری آلمامیشدی. سئودیگی قیدانی[غذانی] یئمه‌میشدی. ائودن ائشیکده آجیخاندا بیرزاد آلیب قارینی‌نی دویوزدورمامیشدی. او هئچ واخت سئویلمه‌میشدی. او هله ده تیرپان لا، کرپیچ له سیمان لا قارداش ایدی.
یای‌دا یونجا بیچردی، آلاق ائدیب بئل ووراردی، قیش دا ایسه یتکینتی ایشلرینده چالیشاردی. او ماشین آلمامیشدان اؤنجه چوخ یئره پیادا گئدردی.
ساعات 9- و گؤسته‌ریردی. قوربانعلی اوزاق دوشموش بیر کندده بوغدا بیچیردی.
ائوده رئسیوئر هله ده آچیق ایدی. 20 یاشیندا اولان اوغلو تلویزیونا باخا- باخا درین یوخویا باتمیشدی. آرواد ایسه یاتاق دان آیریلا بیلمه‌ییردی. گونش هله‌ده قوربانعلی‌نی تومارلاییردی.
قولو ائو ایله اداره‌ده/حیکایه‌جیک
قولو ائو ایله اداره‌ده
یازان: حسین واحدی
ساعات سحرچاغی یئددی‌نی گؤستریردی، قولو یوخویا قالمیشدی، کؤرپه اوشاغی یوخودان اویانیب، اینقه-اینقه ائتمه‌یه باشلادی. بو سس‌له قولودا یوخودان دوروب ال-اوزون یومادان، تله‌سیک گئینییردی. قادینی، تئز چای-چؤرک حاضیرلاییب، قولو ایسه سوفرا باشیندا اوتوردو. چؤره‌ک بوغازیندان آشاغی ائنمه‌میش دئدی:
"آی آرواد، یئنه برک- برک تاپیشیریرام ها، سویو آز آچین، سوبانین خورتون لاپ آزا قویون، هله باجارسان سؤندور، گئجه یاندیرارسان، پرده‌لری قیراغا چک ائوه گونش دوشسون، چیراق‌لاریدا، قارانلیق دوشمه‌یینجه یاندیرما و...!
آز قالیردی بوغولا، آما تاپیشیریقلاریندان ال چکمیردی. یئمکدن قورتولوب ایداره‌یه ساری یوللا دوشدو.
ساعات اون‌ایکی‌نی گؤسته‌ریردی، قولو ایداره‌ده لم وئریب اوتورموشدو، ایش یئرینه اینترنتده گزیردی، گونشین ایشیغی اوتاغیندان دولوب داشیردی، چیراق‌لار ایسه اوغلان تویوندایدیلار، سوبا آلوو ایچینده قالمیشدی.
قولو، ماسا آرخاسیندان آیریب، پنجره قاباغینا گئدیب، سیقار آلیشدیردی.
شانس‌سیز اوغرو
شانس‌سیز اوغرو
یازان: حسین واحدی
گئجه‌نین لاپ او شیرین یوخو گلن زامانی، دووراین یاپیشیغینداكی آغاجدان دیرماشیب ائوین حَیَطینه آتیلدی. سینه-سینه ائوه ساری گئدیب، الین یاپیشاجاغا آتیب قاپینین آچیق اولدوغونو گؤروب، سئویندی!
ایچه‌ری گیرنده، بیر كیشی‌نین اوتاقدا یوخودا اولدوغونو گؤردو. آیین ایچه‌ری‌یه دوشن ایشیغیندا ائوی آلت-اوست ائتدی، آما آپارماق اوچون درده ده‌ین بیرزاد تاپا بیلمه‌دی. اومودو پوزولوب قاچماق ایسته‌دیگی آن، ائو ییه‌سی یوخولو-یوخولو، "آی باشی داشلی اوغرو گون ایشیغیندا من بو ائوده بیرزاد تاپا بیلمیرم، سن، آی ایشیغیندا تاپماق ایسته‌ییرسن؟" دئییب، یورقانی تپه‌سینه چكدی!
قادین ان دَیرلی وارلیق
گؤزل آذربایجانیمین بوتون شرفلی قادین لارینا سونورام
قادین ان دَیرلی وارلیق
یازان: حسین واحدی
قادین، سئوگی دیر. قادین ایشیق دیر. قادین محبت دیر. قادین روح دور. قادین بركت دیر. قادین وارلیق دیر. قادین ائودیر. قادین دیریلیك دیر. قادین سیرداش دیر. قادین دیره ك دیر. قادین رحمت دیر. قادین گوجدور. قادین صمیمیت دیر. قادین اورك دیر. قادین نفس دیر. قادین دیله ك دیر. قادین ثروت دیر. قادین دؤولت دیر. قادین جان دیر. قادین ان قیمت لی اینسان دیر...
اینسان، قادین ایله كیشی دئمك دیر. باشقا دئمك له، اركك ایله دیشی. بو ایكی اینسان بیر- بیرینین یانیندا اولماق لا یاشام آنلام تاپیر. سئوگی یاشاماغا باشلاییر.
اركك كیشیلیك، ایگیت لیك، قوچلوق، قوچاقلیق دیر. اركك هر نه اولسا، اولسون، اونو گوجلو ائدن بیر اوركلی قادین دیر. قادینسیز ائو هئچ ساییلیر. هر ائوی بیر قادین یؤنه تیر. قادین ائوین دیرگی ساییلیر، اركك ایسه تاوانی. دیره كسیز تاوان، دایانا بیلمز. قادین لارین یئریندن، مقامیندان نه قدر سؤیله نیلیر سه، یئنه آزدیر.
قادین آنا دئمك دیر. آنا ایسه جننت آیاغی آلتیندا اولان مووجود-دور. جننت ایسه هر اینسانین آرزیسین چكدیگی مكان. بو ندن له، قادین ان دَیرلی وارلیق دیر.
