فالچی / حیکایه /
فالچی
یازار: ایستئفانو بئننی
حاضیرلایان: حسین واحدی
گلهجکدن خبر وئرن،
کارتلا فالا باخان آد چیخارمیش فالچی آمئلیا, موشتریسینی ایش اوتاغیندا
قارشیلاییر.
ماسا[میز] اوستونده اسکی[قدیم]
مصر هئیکلجیگی، قارا پیشیک پیپپو[Pippo]، اوچ قوتو سیقار[سیگار]
لا تاروت کارتلاری وار ایدی.
- کسین –
باریتون بیر سسله آمئلیا دئدی.
موشتری فالچینین
دئدیگینی ائتدی.
فالچی آمئلیا اوچ
کارت سئچیب یاواش-یاواش اونلاری اؤز قارشیسیندا آچدی.
- بیرینجی
کارت دئییر، بو ایلین مارت آییندا لوندونا، پاریسه و رومایا قورخونج سالدیریلار[هوجوملار]
اولاجاق, واشینقتونا دا, آتوم بومباسی آتیلاجاق.
کیشی اودقوندو.
- ایکینجی کارت بئله دئییر، بیرلشمیش ایالتلرین تهپکیسی [عکس
العملی] سونوجوندا [نتیجهسینده] دونیانین اوچده ایکی بؤلومونده فلاکتلی ایقلیمله
ائشلیک [مشایعت] اولوناجاق, ایکی میلیارد اؤلونون اولاجاغی ایله اوچونجو دونیا ساواشی
باش وئرهجک.
کیشی باشینی قاشیدی.
- اوچونجو کارت ایسه دئییر، ایندلیکده دوشوندوگونوز قادین هله
ده سیزی سئویر. او سیزه گئری دؤنهجک.
-چوخ ساغ اولون، چوخ میننتدارام – دئییب, اونون گؤزلری
دئمک اولار ، یاشلا دولموشدو.
پولو اؤدهدی و
چیخدی. کوچه ایله گئدرکن اینسانلار، آغاجلار، گؤی, هر شئی اونا داها گؤزل و داها
ایشیقلی گؤرسنیردی.