شهریار شعر تانری سی
حاضیرلایان: حسین واحدی
شهریار اورتا تحصیلاتینی بیتیردیكدن سونرا تئهرانا گئدیب، اورادا دار الفنون اوخولوندا درسینه آرد (داوام) وئریب سونرا دوكتورلوق قولوندا یوكسك تحصیل آلماغا باشلاییب. او دوكتورلوغو بیتیرمه ییب، سئوگی آجی سی و باشقا ندن لره گؤره درسی یاریدا بیراخار.
شهریار درسی ترك ائدندن سونرا دؤرد ایله دك خوراسانا گئدیب مشهد و نئیشاپورون سند یازدیرما (ثبت اسناد) ایداره سینده چالیشار. سونرالار شهریار تئرانا قاییدیب 1315-جی گونش ایلینده اكینچیلیك بانك-یندا ایشه باشلاییر. بیر مدت دن سونرا تبریزه داشینیر.
بو اولو (والا مقام) شاعیر عؤمرونون سونلاریندا آلیز (مریض) اولوب تئهراندا خسته خاناسیندا معالجه ا.چ.ن ساخلانیلیر. سونوندا زومار (شهریور) آیینین 27-سینده یاشاما سون نوقطه نی قویوب، تبریزین مقبرة الشعرا-سیندا توپراغا تاپشیریلیر.
شهریارین یارادیجیلیغی
بؤیوك شعر اوستادی شهریاردان فارسجادا یاقلاشیق (تقریبا) 28 مین بئیت و توركجه ده یاقلاشیق 3 مین بئیت شعر یادیگار قالیب. اونون شعرلری چاغداش (معاصر) ایله كئچمیشده اولان شاعیرله رین هامیسین یانیندا یوكسك (برتر) ساییلیب همده رقیب سیز ساخلاییب دیر.
شهریارین شعرلری همیشه خالقین دیلینده اوخونوب، دیللر ازبری اولوب، اونون آدینی دیری ساخلاییب دیر. حضرت علی (ع)-ا اولان شعری كسین لیكله ایماملارا اولان تایسیز شعرلردن بیریدیر و بو عزیز شاعیری ائمه اطهاری سئونلرین یانیندادا عزیز ائدیب دیر. شهریار توركجه ده-ده «حئیدر بابایا سلام» یارادیجیلیغی ایله توركجه یه، یئنی بیر جان وئریب، پهلوی رئژیمینین او ظولوم و ازمك چاغلاریندا توركجه میزی دیری ساخلاییب دیر.
بو قیسا یازیدا بو اولو شاعیری تانیتماق و اونون یارادیجیلیقلاریندان سؤز آچماغا یئر اولمایاجاق و تكجه زومار آیینین 27-سی بو عزیزیمیزین اولوولاما (عزیزلمه) گونو موناسیبت ایله ایسته دیم شهریار-ا اولان بورجوموزو یئرینه یئتیریب، عزیز شاعیریمیزین آدینی دا دیری ساخلایام.
سونوندا شهریاردان بیر گؤزل شعری سیز عزیزلریمه سونورام (تقدیم ائلیرم):
تورکون دیلی
تورکون دیلی تک سئوگیلی ایسته کلی دیل اولماز
اؤزگه دیله قاتسان بو اصیل دیل اصیل اولماز
اؤز شعرینی فارسا – عربه قاتماسا شاعیر
شعری اوخویانلار ، ائشیدنلر کسیل اولماز
فارس شاعری چوخ سؤزلرینی بیزدن آپارمیش
« صابیر » کیمی بیر سفره لی شاعیر پخیل اولماز
تورکون مثلی ، فولکلوری دونیادا تک دیر
خان یورقانی ، کند ایچره مثل دیر ، میتیل اولماز
آذر قوشونو ، قیصر رومی اسیر ائتمیش
کسری سؤزودور بیر بئله تاریخ ناغیل اولماز
پیشمیش کیمی شعرین ده گرک داد دوزو اولسون
کند اهلی بیلرلر کی دوشابسیز خشیل اولماز
سؤزلرده جواهیر کیمی دیر ، اصلی بدلدن
تشخیص وئره ن اولسا بو قدیر زیر – زیبیل اولماز
شاعیر اولابیلمزسن ، آنان دوغماسا شاعیر
مس سن ، آبالام ، هر ساری کؤینک قیزیل اولماز
چوخ قیسسا بوی اولسان اولیسان جن کیمی شئیطان
چوق دا اوزون اولما ، کی اوزوندا عاغیل اولماز
مندن ده نه ظالیم چیخار ، اوغلوم ، نه قیصاص چی
بیر دفعه بونی قان کی ایپکدن قزیل اولماز
آزاد قوی اوغول عشقی طبیعتده بولونسون
داغ – داشدا دوغولموش ده لی جیران حمیل اولماز
انسان اودی دوتسون بو ذلیل خلقین الیندن
الله هی سئوه رسن ، بئله انسان ذلیل اولماز
چوق دا کی سرابین سویی وار یاغ – بالی واردیر
باش عرشه ده چاتدیرسا ، سراب اردبیل اولماز
ملت غمی اولسا ، بو جوجوقلار چؤپه دؤنمه ز
اربابلاریمیزدان دا قارینلار طبیل اولماز
دوز واختا دولار تاختا – طاباق ادویه ایله
اونداکی ننه م سانجیلانار زنجفیل اولماز
بو « شهریار » ین طبعی کیمی چیممه لی چشمه
کوثر اولا بیلسه دئمیرم ، سلسبیل اولماز
سئوگی یولچولاری
بو تئزلیگه یاییلاجاق:
Sevgi yolçuları ... سئوگی یولچولاری
Hikayələr حیكایه لر
حسین واحدی
كیتاب یاییلاندا ساتیش یوللاری و یئرلری وئریله جك.
بوكیتاب بوتون آنادیلیمیزه چالیشان اینسانلارا اتحاف اولونور...
سونای؛ آذربایجانین سئوگی گونو
Sonay Azərbaycanın sevgi günü
یازان: ندا عبدی
بیلمیرم نه یه گؤره رسم اولوب هر كیمسه غرب كولتوروندان یاشایشیندا چؤخ ایشلتسه او قدر كیلاسلی دی!بونون دلیل لرینین بیری، بیزیم اؤز كولتورموزلا فولكلوروموزا تانیش اولماماقیمیز اولا بیلر. دئملی دی بیزیم اؤزوموزون ان گؤزل دب لریمیز اولا- اولا، هر دن اؤزگه كولتورلارینین دالیسیجا گئدیب، اؤزوموزی اؤنودوروك...
آمما هامی گوناهلار بیزده دئیل! فولكلوردان، كولتوردان دانیشانمیز یوخدو، تلویزیونوموزلا قئزئت لریمیزده، بو سیرادا آز دانیشیر و دئملی اولا بیلریك هئچ دانیشمیر!بو دب لرین بیری “سونآی” دی... نئچه میز بونون آدین ائشیتمیشیك؟! آمما بیر آیری كلمه دییرم: “ولنتاین”! دا بونو هامییز ائشیدیب سینیز! ولنتاین گؤزل بیر رسم دی. بیز بو گونون گؤزلیك لرین دانمیریك، آمما بیزیم ده كولتورموزدا بیر گون وار “سئوگیلی لر” اوچون... بو گونون آدی “سونآی” دی.
“سونآی”، آذربایجانین ولنتاینتی دی.یایین سون آیی خیرمن لر ییغیشارگئجه لر آی چیخارهئچ زامان آیین باخیشییایین سون چاغی كیمینسئودالی اولا بیلمز…
سونآی ندی؟
سونای بیر یوكسك رسیم دی، ایسلامدان قاباقدان ایندیه كیمی، بو گؤزل رسیم دیری ساخلانیب، اونودولمویوب.دوزدو بو رسیم گئتدیكجه، اؤز رنگین الدن وئریب، آمما ایندی ده چوخلو كندلرده بو گون سئوگیلی لر گونونه آدلانیر. سونآی آدیندان گلن كیمی، آیین سونونلا باغلانتی سی وار. بیز آذربایجانلیلارین فولكلوروندا، “آی”ین یوخاری یئری وار و بو كلمه، افسانه لریمیزده چؤخ قولاقیمیزا چاتیب.
سونآی ایلین اؤ گونودور كی گوندوزنن گئجه بیر حدده یئتیشیب، اصطلاحدا “اعتدال” حدینده اولورلار. دئمك اولار بو گون، یایین سون گونودور... آذربایجاندا، سئوگی گونو...بو گئجه ده، گون له اولدوز 180 درجه لی زاویه ده قرار تاپیب، گون باتاندا دوز بیربیرین اوستونه دوشورلر. بو صحنه چوخ سرعتله اوز وئریر، آمما بو آن ابدیته كیمی ایدامه تاپیر. یوكسك افسانه لرده، بو صحنه عشقه تعبیر اولوب... سئوگیه... بیر سئوگی كه سونو یوخدو...آمما بو گونو نئجه دیری ساخلاماق اولار؟ بیزلر ائلیه بیلریك ولنتاین كیمی، سونآیی دا دیری ساخلایاق...
نئجه كی ولنتاین-ین نمادی قیرمیزی قولچاقلار یا آیری شیءلر اولوب، سونآیین دا نمادی آی شكلینده قولچاقلار یا آیری نمادلار اولا بیلر كه بیزلر دوزلدیب، بیر بیریمیزه پای وئریب، سونآیی رواج وئره بیلریك.
آخرین روز شهریور، روز سونای است كه به روایت افسانه های آذربایجان، روز عشق می باشد. روزی مناسب برای جایگزینی روز ولنتاین
می توانید برای اطلاعات بیشتر این پیوند را بخوانید.
اورك‍ـ ده قالان سئـوگی
اورك‍ـ ده قالان سئـوگی
اورگی دؤیونوردو. قافاسیندان یوزلرجه دوشونجه گلیب، كئچیردی. نه ائده جه یینی بیلمه ییردی. اوشاق لار كیمی آغلاییردی. اوتاغینین قاپیسینی باغلاییب، پنجره قیراغیندا دوروب، كوچه یه باخدی. بیری قاچیردی. بیری هارای چكیردی. اوشاقلار اویناییردیلار. قونشو قادین لار ایسه تره سئچیردیلر، آمما ائلای كدر ایچینده بوغولوردو. اورك سؤزون هئچ كیمسه یه آچیقلایا بیلمه دیگی اوچون داها چوخ عذاب چكیردی. آخشام یولدایدی و بیر آزدان شهری آلتینا آلاجاغییدی. گونش كؤچمك دوروموندایدی. ائلای پنجره قیراغیندان بیلگی سایار یانینا گئتدی. بیلگی سایارین یاندیریب، اینتئرنئته گیردی. بیلیم یوردوندا اولان ان صمیمی یولداشی چت اوتاغیندایدی. سئوینیب اونلا چتلشمه یه باشلادی. اورگینده قالدیغی آغرینی اسمره آنلاتماق اوچون چابا گؤسته ریردی. هارادان و نئجه آنلاتما سینا قالمیشدی.
اسمر ائلای-ین نه دئیه جه گینه ماراقلانمیشدی، آمما ائلای اوتانیردی. ائلای آغلاماق آیكونونو ووروب آردیجا «من عاشیق اولموشام» یازدی! اسمر ایسه دالبادال گولمك آیكونلارین صحیفه یه دوزدو. ائلای راحاتسیز اولوب، « اسمر، گولمه! بورادا قیزین، اوغلانا عاشیق اولماسینین چتینلیك لرینی بیلیرسنمی؟» یازدی. من قونشوموز اوغلو آیدین-ا عاشیق اولموشام، امما دئمك اولارمی؟
یازیق اولموشام. دارما- داغین قالمیشام. اورگیمی پارتلاتمیشام. جانیما آغری سالمیشام. اوغلانلار عاشیق اولاندا، قیزلارا دئیه بیلیرلر، آمما من نئجه دئییم و اورگیمی نه ته هر دینجلدیم؟! مین جوره آد قویارلار!!
كاش عاشیق اولماسایدیم! ... كاش!! ...
یازان: حسین واحدی
