◄███▓▒░░ -[ Xatirələr durağı ]- ░░▒▓███►

یاى تعطیلاتى و اوشاق لارین، بوش واخت لارى

یازان: حسین واحدی

اؤنوموزده ایستى، ایسته مه لى، یام-یاشیل، گؤزل-گؤیچک یاى فصلى واردیر. اولا بیلر، ایندى سیز بو یازینى اوخودوغونوزدا، یای دا گلیب چاتیب دیر. سیز ایسه، یای آخشامیندا، ائیوان دا ایله شیب، یای مئیوه لرین یانینیزا قویوب، بو یازینی اوخویورسونوز.

سؤز-صحبت یاى ایله تعطیلات دان گئدیر. اوچ آى اوخول لارین (مدرسه لرین) تعطیل اولماسى اوشاق لار اوچون هر ایش ائتمه یه بیر بؤیوک فرصت دیر. اوچ آى بوش واخت! اوچ آى درس دن-مشق دن اوزاق! اوچ آی دینجلمک!

یای دان اؤنجه کئچیریلین سیناو (امتهان) لاردان قاباق، اوشاق لار، یئنى یئتمه لر و بوتونلوک ده ابتدایی دن، اورتا تحصیلاتینى کئچیرنلره جن، دوزگونجه امتهان وئریب یای دا آرخایینجا گزیب-دولانیب یوخسا تفریحى کیلاسلارا گئتمک اوچون تعطیلاتین باشلانماسینی گؤزله ییرلر. بو خوش چاغ لار، هامی اوشاقلاری سئویندیرمیر. بیر پارا اوشاقلار ایسه یایین گلیب چاتماسینى چوخ دا سئومه ییرلر. اونلار عاییله لرینین اقتصادی وضعیت لرینین آشاغی اولدوق لاری اوچون، یای دا چالیشماق لاری گرکلی اولور. یئنى یئتمه (نوجوان) چاغلاریندا، عؤمورلریندن فایدالی استفاده ائتمک یئرینه، آز پول لارا بویون اگیرلر!

هر حال دا یای فصلی گلیب چاتیب، سوووشوب، بیته جکدیر. زامانى دا، دوزگون فایدالانانلار قازاناجاق لار.

بو اوزون تعطیلات لارا برنامه ایله هدف اولماسا، زامان الدن قاچاجاق دیر. بیزیم جامعه ده، بو ایکى کلمه چوخلارینا تانیش دئییل دیر. بو اوزدن عاییله لرین اوشاق لاریدا بو واخت لاری هئچ فایدا آپارمادان الدن وئریرلر!

اوشاقلاریمیزین گله جکلرینه، نه لرى، دوشونموشوک؟ هانسی برنامه لری سیرالامیشیق؟ هانسی یولو اونلارا گؤسترمیشیک؟ اوشاقلاریمیزا برنامه تؤکمه یى، آماج (هدف) سئچمه یى اؤیرتمیشیک مى؟ ... و یوزلرجه بئله سوال لارا تاى سوال لارى اؤزوموزدن سوروشا بیله ریک.

یای گلنده، بعضی آتا-آنالار اؤزگه لرین یانیندا شیشه لنمک اوچون اوشاق لارینی ایکی-اوچ یئرده مختلف کیلاس لارا یازدیریرلار. اؤزگه دیل کیلاسی، موسیقى، بیلگی سایار، ایدمان و...! یازیق اوشاغین بئیینى دینجلمه دن بو کیلاسدان چیخیب اوبیری کیلاسا گئدیر!! بئله عاییله لر، اوشاغین گله جه گینه اؤنم (اهمیت) وئرمک یئرینه، قاپی-قونشو، اؤزگه لر ایله قوهوم لارین یانیندا اوشاق لاریندان بوشونا تعریف ائتمه گى، داها چوخ دوشونورلر!

بئله عاییله لرین یانیندا، بعضی عاییله لر ده، اوغلان اوشاق لارینی، اللریندن بیر صنعت گلسین دئیه، بیر صنعت کار یانینا گؤنده ریرلر. قیزلارین ایسه تیکیجیلیک (خیاطى) یوخسا اینجه ال ایشلرینى اؤیرنمه کیلاسلارینا یازدیریرلار. سونوندا اوشاق بیلمیر درس اوخویاجاق یوخسا صنعت دالیسیجا گئده جک دیر؟!

مختلف کولتور (فرهنگ) صاحبی اولان عاییله لرین ایچینده، بعضی لرى ده برنامه ایله هدف اوزوندن ایشلرین قاباغا آپاریب، گله جکلری ایله ایندیکی چاغ لارینا قیسا زامانلى و اوزون زامانلى برنامه لر یازیرلار. بئله اینسانلار بوگون مکانیک یانینا، صاباح ایسه بیلگی سایار کیلاسینا گئتمزلر. اونلار اؤز یوللارین سئچیب، او یولدا دا نئجه آددیم آتاجاق لارینى بللى ائدیب لر. بئله عاییله لرین اوشاقلاری دا دوزن (نظم) اوزو ایله یاشایارلار.

یاشاییشیمیزدا اؤنجه اؤزوموز سونرا ایسه اوشاق لاریمیز، زامان دان دوز استفاده ائتمه یی باجارمالیدیرلار. برنامه میز اولماسا، اوچ آی یوخ، بیر ایل ده تعطیل اولسا نه ائدیب، ائتمه یه جه گیمیزى بیلمه یه جه ییک. برنامه ده، هدف اوچون یازیلار. برنامه بیر گون، بیر یئددیجه (هفته)، بیر آى، بیر ایل، یوخسا (و یا) نئچه ایللیک یازیلمالی دیر. بو دگرلى ایشی اؤز اوشاقلاریمیزادا اؤیرتمه لیییک.

گؤزل یاى دا فایدالی ایش لر ائتمک اوچون زامانی الدن وئرمه دن، ایندی دن عاییله نیز ایله بیرلیک ده، هدفینیزى سئچیب، برنامه لرینیزی یازماغا باشلایین ... .