"سئوگی یولچولاری" حیكایه لر كیتابی، یاییلدی...
"سئوگی یولچولاری" حیكایه لر كیتابی، ایسته ینلرینین الینه چاتماغا حاضیر اولدو
1. نوید آذربایجان نشریه سینه، توركجه نی اورادان یازیب اوخوماغینی اؤیرندیگیم اوچون
2. "بیلیم یولو" مؤسسه سیندن، توركجه نین یازیب- اوخوماغینی بیلیمسل اؤیرندیییم اوچون
3. آفتاب آذربایجانین 2 ایل بوندان قاباقكی ائكیپین دن
4. جناب علی فرهاد-دان، یازماغی جدی توتماغیمین اصلی عامل لریندن بیری اولاراق
5. حؤرمتلی ندا خانیم عبدی دن، منی اورمو نشریه لرینه چالیشماغا آلقیشلایان
6. "شهامت" نشریه سیندن، بیر ایل توركجه سئرویسینی منه تاپشیریب، تجروبه قازاندیغیم اوچون
7. حؤرمتلی خانیم كبیری دن، حیكایه لریمی اوخویوب باخیشلاری ایله یول گؤستردیگی اوچون
8. اوستاد رضا همراز جنابلاریندان، كیتابیمی چاپدان اؤنجه اوخویوب، یول گؤستردیگی اوچون
9. حؤرمتلی محمدعلی ارجمندی جنابلارینا، هر زامان یازیلاریمی اوركدن اوخویوب، تعارفسوز یوروملادیغی اوچون، همده آغری نشریه سینه دعوت ائتدیگی اوچون
10. حؤرمتلی عاییله م دن
11. آنادیلیمی نسیل دن نسیله بیزه چاتدیران بوتون زحمت چكنلردن
12. منیم یازیلاریمی، نشریه لرینده، سایت لاریندا و وبلاگلاریندا یایان بوتون دوستلاردان .... آدلاری قید اولوب- اولمایان بوتون منه یاردیم ائدن لردن...
13. "یاز" یایین ائویندن و حؤرمتلی بهرام و احمد اسدی جنابلاریندان، هر زامان منه ده یر وئردیكلری اوچون، همده كیتابیمی چاپ ائتدیكلری اوچون
كیتابی آلماق اوچون بو تئزلیگه، بو وبلاگدان، یورد سایتیندان و بعضی اعتبارلی كیتاب ساتارلاردان آلا بیلرسینیز.
سیزلرین دیرلی یوروم لارینیز یوزده-یوز گلن كیتابلاریمین گوجلو اولماسینا ان بؤیوك ندن (سبب) اولاجاق. لطفا فایدالی باخیشلارینیزی اسیرگه مه یین.
اورك‍ـ ده قالان سئـوگی
اورك‍ـ ده قالان سئـوگی
اورگی دؤیونوردو. قافاسیندان یوزلرجه دوشونجه گلیب، كئچیردی. نه ائده جه یینی بیلمه ییردی. اوشاق لار كیمی آغلاییردی. اوتاغینین قاپیسینی باغلاییب، پنجره قیراغیندا دوروب، كوچه یه باخدی. بیری قاچیردی. بیری هارای چكیردی. اوشاقلار اویناییردیلار. قونشو قادین لار ایسه تره سئچیردیلر، آمما ائلای كدر ایچینده بوغولوردو. اورك سؤزون هئچ كیمسه یه آچیقلایا بیلمه دیگی اوچون داها چوخ عذاب چكیردی. آخشام یولدایدی و بیر آزدان شهری آلتینا آلاجاغییدی. گونش كؤچمك دوروموندایدی. ائلای پنجره قیراغیندان بیلگی سایار یانینا گئتدی. بیلگی سایارین یاندیریب، اینتئرنئته گیردی. بیلیم یوردوندا اولان ان صمیمی یولداشی چت اوتاغیندایدی. سئوینیب اونلا چتلشمه یه باشلادی. اورگینده قالدیغی آغرینی اسمره آنلاتماق اوچون چابا گؤسته ریردی. هارادان و نئجه آنلاتما سینا قالمیشدی.
اسمر ائلای-ین نه دئیه جه گینه ماراقلانمیشدی، آمما ائلای اوتانیردی. ائلای آغلاماق آیكونونو ووروب آردیجا «من عاشیق اولموشام» یازدی! اسمر ایسه دالبادال گولمك آیكونلارین صحیفه یه دوزدو. ائلای راحاتسیز اولوب، « اسمر، گولمه! بورادا قیزین، اوغلانا عاشیق اولماسینین چتینلیك لرینی بیلیرسنمی؟» یازدی. من قونشوموز اوغلو آیدین-ا عاشیق اولموشام، امما دئمك اولارمی؟
یازیق اولموشام. دارما- داغین قالمیشام. اورگیمی پارتلاتمیشام. جانیما آغری سالمیشام. اوغلانلار عاشیق اولاندا، قیزلارا دئیه بیلیرلر، آمما من نئجه دئییم و اورگیمی نه ته هر دینجلدیم؟! مین جوره آد قویارلار!!
كاش عاشیق اولماسایدیم! ... كاش!! ...
یازان: حسین واحدی
عیرفانی بیر دانیشیق
عیرفانی بیر دانیشیق
ـ ائی تانریم،بو نعمت لر منی آزدیریر،اونلاری آل.
ـ یوخ،اونلاردان اؤزون ال چكمه لیسن.
ـ ائی تانریم،منه صبر عطا ائت.
ـ یوخ،صبر آغری ـ آجیلاردا قازانیلار،وئریلمز،اؤیره نیلر.
ـ ائی تانریم،منی خوشبخت ائت.
ـ یوخ،من سنه نعمت لر وئریرم،خوشبخت اولماق ایسه اؤز ایشیندیر.
ـ ائی تانریم،منی عذاب لاردان قورتار.
ـ یوخ،عذاب لار سنی دونیادان اوزاخلاشدیریب،منه یاخینلاشدیریر.
ـ ائی تانریم،منه ذؤوق آلماقدا یاردیمجی اول.
ـ یوخ،سنه یاشاییش وئرمیشم،ذؤوق آلماغا چالیش.
ـ ائی تانریم،سن منی سئودیگین قدر منده باشقالارینی سئوه بیلدیییمه،منه یاردیمجی اول.
ـ سونوندا اؤیره ندین!
· حاضیرلایان: حسین واحدی
