تورکون دیلی
شعر: شهریار
تورکون دیلی تک سئوگیلی ایسته کلی دیل اولماز
اؤزگه دیله قاتسان بو اصیل دیل اصیل اولماز
اؤز شعرینی فارسا – عربه قاتماسا شاعیر
شعری اوخویانلار ، ائشیدنلر کسیل اولماز
فارس شاعری چوخ سؤزلرینی بیزدن آپارمیش
« صابیر » کیمی بیر سفره لی شاعیر پخیل اولماز
تورکون مثلی ، فولکلوری دونیادا تک دیر
خان یورقانی ، کند ایچره مثل دیر ، میتیل اولماز
آذر قوشونو ، قیصر رومی اسیر ائتمیش
کسری سؤزودور بیر بئله تاریخ ناغیل اولماز
پیشمیش کیمی شعرین ده گرک داد دوزو اولسون
کند اهلی بیلرلر کی دوشابسیز خشیل اولماز
سؤزلرده جواهیر کیمی دیر ، اصلی بدلدن
تشخیص وئره ن اولسا بو قدیر زیر – زیبیل اولماز
شاعیر اولابیلمزسن ، آنان دوغماسا شاعیر
مس سن ، آبالام ، هر ساری کؤینک قیزیل اولماز
چوخ قیسسا بوی اولسان اولیسان جن کیمی شئیطان
چوق دا اوزون اولما ، کی اوزوندا عاغیل اولماز
مندن ده نه ظالیم چیخار ، اوغلوم ، نه قیصاص چی
بیر دفعه بونی قان کی ایپکدن قزیل اولماز
آزاد قوی اوغول عشقی طبیعتده بولونسون
داغ – داشدا دوغولموش ده لی جیران حمیل اولماز
انسان اودی دوتسون بو ذلیل خلقین الیندن
الله هی سئوه رسن ، بئله انسان ذلیل اولماز
چوق دا کی سرابین سویی وار یاغ – بالی واردیر
باش عرشه ده چاتدیرسا ، سراب اردبیل اولماز
ملت غمی اولسا ، بو جوجوقلار چؤپه دؤنمه ز
اربابلاریمیزدان دا قارینلار طبیل اولماز
دوز واختا دولار تاختا – طاباق ادویه ایله
اونداکی ننه م سانجیلانار زنجفیل اولماز
بو « شهریار » ین طبعی کیمی چیممه لی چشمه
کوثر اولا بیلسه دئمیرم ، سلسبیل اولماز
باغبان قیزی / اوستاد علی نشانی
دَیرلی اوستاد علی نشانی بی، 1332-ینجی گونش ایلینده بیر قالارگی شعر دئییب دیر. سونرالار بو شعر خالق ماهنی سی ایله دیللر ازبری اولوبدور. اوستا اؤزو بو شعره گؤره بئله دئییب دیر:
باغبان قیزی منیم مایل اولدوغوم بیر قیزایدی. اونون آتاسی گول باغبانی اولدوغونا گؤره من شعریمده اونا «باغبان قیزی» آدی قویدوم جاوانلیق و ان گوجلو و ایمانچی زامانلاریم ایدی. بزازلیق ایشینه مشغول ایدیم. نهایت همین قیز منه قسمت اولمادی. بو شعریم بسته كار آهنگ ساز» موسیقی معلمی اسماعیل شاكری وسیله سی ایله ماهنیا تبدیل اولدو. اورمیه رادیوسوندا و خلق آراسیندا مجلسلرده بیر زامان اوخونوب دوام ائتدی.تهران رادیوسوندان آذربایجان اوخویانی مرحوم مصطفی پایان وسیله سی ایله اوخوندو و بیر خالق ماهنیسی كیمی دیللره دوشدو.
باغبان قیزی
ای خومار باخیشلی باغبان قیزی
چادراسی سورمه یی گولو قیرمیزی
گؤزون خومارلادیر گؤیده اولدوزو
آمان باغبان قیزی، جان باغبان قیزی
یاناغی قیرمیزی، جان باغبان قیزی
بازاردا ساتدیغیم شالدی قوماشدی
گؤردوم باغبان قیزین دیلیم دولاشدی
باخدیم گردنبنده گؤزوم قاماشدی
آمان باغبان قیزی، جان باغبان قیزی
یاناغی قیرمیزی، جان باغبان قیزی
من ده بیر اوغلانام صاف و صادقم
ثروت آختارمیرام حوسنه عاشیقم
جمالین گؤرمگه خیلی شایقم
آمان باغبان قیزی، جان باغبان قیزی
یاناغی قیرمیزی، جان باغبان قیزی
خوش بئجریب آتان گوللردن سنی
یاخشی ائشیتمیشدیم دیللردن سنی
ایسته سم آلاردیم اللردن سنی
آمان باغبان قیزی، جان باغبان قیزی
یاناغی قیرمیزی، جان باغبان قیزی
باهار1332
حاضیرلایان: حسین واحدی
آباذر دوْل لو
آباذر دوْل لو
(ه.ق – نین 13- نجو یوز ایللیگین سونلاری و 14 – نجو یوز ایللیگین ایلك لری)
دوْل لو آباذر،شاعیر،هنرلی و آذربایجانین سنتی موسیقی سینین كسین اوستادیدیر، بو حالدا بو ده یرلی اینسان اورمو شهرینین اؤزونده تانینمامیشدیر. آباذر اورمودان ساییلان «دول» كندینده بیر اكینچی عاییله سینده دوغولوب دور. ائینه ییب بؤیوك بیر گنج اولاندان سونرا ایندیكی گورجوستاندان اولان «بورچالی» بؤلگه سینه كؤچور. آباذر ه.ق - نین 14- نجو یوز ایللیگینین ایلك لرینه دك یاشاییرمیش و عؤمرونون سونونادك اورادا قالیب و دونیاسین ده ییشیب. او آذربایجان جومهورییه تینده هونر ایله آشیق صنعتینده بؤیوك اوستادلاردان ساییلیرمیش. بو ده یرلی اوستاد اوتایدا اولمایان آشیق هاوالارینین ایچینه بوتایداندا هاوالار قاتیبدیر. اؤرنك اولاراق «دوْل هیجران هاواسی»- نی آد آپارماق اولار. اوستاد بو هاوانی اؤز ماحالی «دول»- دان بورچالییا و بوتونلوكله آذربایجان جومهورییه تینه داشیییبدیر.دول لو آباذر اورادا چوخلو شاگیردلر تربییه ائدیبدیر، اونلارین ان آدلیملاریندان، آشیق « حسین ساراچلی»- نی آد آپارماق اولار. آشیق آباذر شعر ده، دئیه رمیش و شعرلرینده «ابوذر» تاخما آدینی (تخلص) ایشله دیبدیر.
اوستادین قوشما بیچیمینده (نمونه) اولان شعرلریندن بیر اؤرنك:
«دولاندیریر»
ای آغالار بیر زمانه گلیبدیر
دؤولتلی یانیندا قوُل دولاندیریر
كسیلیب محبّت یاد اولوب حؤرمت
ایندی زمانه نی پول دولاندیریر
كؤچ ائیله ییب بو دونیادان كؤچمه ین
اینسانلیغین شربتینی ایچمه ین
ائوده آروادینا سؤزو كئچمه ین
كنددا اولوب ایندی ائل دولاندیریر
«ابوذر» احوالین اولدو ایندی پریشان
اوزونده خال لارین دُردانه نیشان
بی غیرت قوهومدان ناموسلو دوشمان
گلسه قبریم اوسته گول دولاندیریر.
ـ توركجه یه چئویریب،حاضیرلایان: حسین واحدی
قایناق:
ـ نام آوران اورمیه،ص 181
