خوی آدلیم لاریندان، «خسرو شنایی»- ایله دانیشیق
خوی آدلیم لاریندان، «خسرو شنایی»- ایله دانیشیق
خسرو شنایی قاباقجالار خوی مطبوعاتیندا قلم آپاراردی ، «فردای ما» نشریه سینین خوی اؤزل ساییسینی (ویژه نامه سینی) حاضیرلایاردی و «اندیشه فرهنگی» درگی سینین نئچه ساییسینین باش یازاری اولدوغوندان، تانیرام. اونونلا «رعنا» آدلی یازدیغی قیسا رومان كیتابیندان، تانیشلیغیم وار، ایندیسه قالین و حجم لی «منیم شهریم خویون دایره المعارفی» (دایره المعارف شهر من خوی) آدیندا كیتابینی گؤروروم. اؤنجه بو كیتابی اونون الیله یازیلاجاغینی قاچاراق بویان – اویاندان ائشیتمیشدیم ، آمما ایندی او كیتاب چاپا حاضیردیر، نه ایسه دانیشیغیمیزی بو قدیم دوستویلا باشلاییرام.
سوال: بو كیتابین یازماغینی نجور دوشوندونوز؟
خویون دایره المعارف- ینه گؤره دئمه لییم، نئچه واخت بوندان قاباق خوی اوچون جامع بیر كیتابین یازماغینی دوشونوردوم، آمما اونو ائتمه یی چوخ چتین گؤروردوم، بونون ندنی (علتی) قونولارین (موضوع لارین) گئنیش اولماسیدی، هر موضوع اؤزونه گؤره بیر كیتاب اولا بیلردی، 1387- نجی ایلده عزیز دوستوم «صادق ظاهر» جینابلاریلا مشورت ائتدیم و اولا بیلر بیر نفرده بو ایشی سونا یئتیرسین نتیجه سینه یئتیردیم، آمما مهم ایشین اوزوناسییدی و بودا بیر نفرین عهده سیندن گلمزیدی، تصمیم توتدوم اول یازیچیلار درنه یینده كی یولداشلاردان یاردیم آلام و بونا گؤره هره سینین بیر قونونو آراشدیریب یازماسینی ایسته دیم و سونرا قونولارین چوخالماسیلا، تانیدیغیم بعضی دوستلارداندا او موضوعلاردا تحقیق ائدیب یازیب منه وئرمه لرینی ایسته دیم.
البته منده ایشسیز دئییلدیم، بعضی قونولاریدا اؤزوم حاضیرلاییردیم، یولداشلارین یازیلارینین یئتیشمه سیله ده ، من اونلارین یازیلارین بیر داها اوخویوردوم و اونلارا یازیلارینی قبول ائتدیییم یا ائتمه دیییمده حاققیمین اولدوغونو دئمیشدیم، بو مدت ده بعضی گئجه – گوندوزلر 15 ساعاتداندا چوخ ایشله ییردیم.
سوال: بو كیتابا گؤره بیزه و اوخوجولاریمیزا بیلگی وئره بیلرسینیزمی؟
بو كیتابین آدی منیم شهریم خویون دایره المعارفی - دیر (دایره المعارف شهر من خوی) و 712 صحیفه سی وار، 13 بؤلومده و 82 فصیل ایله سیرالانیبدیر. یازیلارین سیرالانماسی الیبفا حرف لرینین سیراسییلادیر و بودا منی قانع ائتمیر و بونا گؤره بعضی آزلیق لار گؤرونور.
بو توپلامدا (مجموعه ده) خوی شهریله ایلگیسی اولان قونولاری بیر یئره ییغیب یازیلماسینا، چالیشمیشام، قیساجا دئمه لییم: تاریخ، جغرافیا، اقتصاد، دین ، مذهب، كولتور (فرهنگ)، ائییتیم و اؤیرتیم (آموزش و پرورش)، صنعت (هنر) ..، تحمیلی ساواشین و ایسلامی انقلابین شهیدلرینین آدلاری، ادبی ، سیاسی، صنعتسل (هنری) و آدلیم روحانیلرین آدلاریدیر و آرخایینچیلیقلا دئییرم بو ایش بوتون اؤلكه میزده تایسیزدیر، یعنی هئچ شهر اوچون بئلنچی بیر دایره المعارف یازیلماییبدیر.
كیتابین قایناقلاریدا؛ كیتابلار، نشریه لرو اینترنت سایتلارینین یانیندا خویون چئشیتلی (مختلف) اولایلارینا (رویدادلارینا) عؤمورلرینین كئچدیغینده تانیت (شاهد) اولان یاشلی لار و قوجالاریمیزدیر.
سوال: اونون چاپی اوچون نه ایشلر گؤروبسونوز؟
ایلكجه «قوم» و «تئهران» - نین بیر نئچه یایین ائولری (اتشارات لاری) ایله دانیشیقلای آپاردیم، اونلاردان فاكتور اؤنلریده (پیش فاكتورلاردا) آلدیم ، حتتا زامان بؤلونمه سی و كیتابین نه زامان چاپ و یاییلماسینا گؤره اؤنریلر (پیشنهادلار) وئردیلر، سونوندا قورا بیشیرن (تیر) آیینین ایكینجه هفته سینده اؤز تصمیمیمی توتوب اونلارین بیریله آنلاشدیم.
سوال: ایداره لر و اورگانلارداندا سیزه یاردیم ائدنده وارمی؟
بلی، شهید لرین آدلارین و تحمیلی ساواشیلا ایسلامی انقلابین شهید فرمانده لرینین شكیللرینی «بنیاد شهید» - دن آلمیشام. بیر پارا شكیللریده شهردارینین گئنئل ایلیشكیلری - ندن (روابط عمومی سیندن) آلمیشام. خوی موناسیبتلری اوچون قاباقجالار چاپ اولونان یازیلاریدا میراث فرهنگی دن آلمیشام.
سوال: اورگانلاردان بو كیتابا مالی حمایه ائدنده وارمی؟
دئمه لییم آراشدیرمانین هزینه سی وار و بو كیتابین یازیب، حاضیرلاماسی منیم اوچون هزینه سی وارییدی و بیر رومان یازما هزینه سیله توتوشدورماق اولماز، كیتابین صحیفه ساییلارینا باخاراق و 42 صحیفه نین بویالی (رنگی) شكیل (عكس) و آغ – قارا، اعلا و گلاسه كاغیذدان اولاراق، اونون چاپینیندا هزینه لرین چوخالدیر، آما دئمه لییم هئچ اورگان و ایداره منه یاردیم ائتمه ییب، البته من اؤنجه ده «بو كیتابین چاپینا هئچ بیر بلا عوض یاردیم ایسته مه دیییمی» بو ایداره لره دئمیشم و یاردیملاری بونو اؤنجه دن آلماقلاری اولسون دئیه ایسته میشم و بونا گؤره هئچ بیر جاواب آلمامیشام، یالنیز دوستلاریمین بیری بو كیتابین 30 جیلدینی ساتیش اؤنجه سی آلیبدیر.آمما اینانیرام بو كیتاب یاخین گله جكده هر بیر آییله ده اؤز یئرین آچاجاقدیر، بونوندا ندنی كیتاب خویون كیملییینی (هویتینی) ، مهم اداره لردن اولان فرمانداری، شهرداری و ائییتیم واؤیرتیم (آموزش و پرورش) – ین كیملییین گؤستریر و خوی ایصالتینه اینانان هر بیر خویلودا ، اوصولچولوق اولاراق بو كیتابدان اولاجاقدیر و بوتون اینانجیملا دئییرم بعضی ایداره لر یاخین گله جكده بو كیتابدان چوخلوجا آلیب و خویدان گؤروش ائدن و قوناق گلنلره وئره جكلر، یوخسا هر قونو آیریجادا كیتاب دا یئرلشه بیلر، اومود ائدیرم گله جكده، منیم خویلو یولداشلاریم، بعضی قونولاری سئچیب، كیتاب ائدیب، شهرداشلارینا ایتحاف ائده لر و بو شهرین كیملیگینین تانینماسیندا ائتكیلی (مؤثر) اولالار.
بو كیتابدا عكس و نقشه نین اؤزل (خاص) بیر یئری وار، بوتونلوكجه 42 صحیفه ده، 209 ساییسیندا آدلیملاردان آغ - قارا و بویالی شكیل، وحش یاشامی،یئنی و اسكی (قدیم) تاریخی اثرلر، خویدا ضرب اولونان سكه لر، خوی شهرلرشمه سی قونوسویلا ایلگیسی اولان خریطه لر، اوندا گلیب دیر و اونلاری حاضیرلایان یولداشلاریما سایغیمی بیلدیریرم. البته بو شكیللرین ایچینده خویلو اولمایان كیمسه لرده واردیرلار، آمما بو شهره مثبت یادا منفی ایشلر ائدیبلر.
سؤال: سونا یئتیشدیییمیزده، دئمك اوچون نه سؤزلر وارینیزدی؟
خویون یازیچیلار درنه ییندن، اؤزللیكجه «صادق ظاهر» جنابلاریندان تشككور ائدیرم، بو كیتابی حاضیرلاماقدا منیم ایسته ییمجه بیر آددیم آتان بوتون یولداشلاریمدان تشككور ائدیرم،اولورسا بیر نئچه صحیفه یازی یازیبلار، شكیللر حاضیرلاییب منه وئریبلر، نئچه كلمه نی یالنیز تایید یادا نفی ائدیبلر، یولداشلاریمین یازیلارین گتیرمه ك اوچون زحمت چكن گنج (جوان) دوستلاریم، یازیلاری تایپ ائدن یولداشلاریم،باخیشلاریلا مشورتلریندن یارالاندیغیم دوستلارین هامیسینا حورمت ساخلاییب سایغی گؤستریب تشككورومو بیلدیریرم، هامیسینین اللرینی محبت له سیخیرام، سیزدنده بو كیتابی نشریه نیزده تانیتدیرماغینیزا گؤره تشككور ائدیرم.
دانیشیغی حاضیرلایان: حسینـ واحدیـ
بو یازی شهامت نشریه سینده یاییلیب دیر
خوشبخت چیلیك، راحتلیق و ساده لیك له اله گلسه، لذتی اولماز
خوشبخت چیلیك، راحتلیق و ساده لیك له اله گلسه، لذتی اولماز
اینسان هر زامان آرزیلارینا ال تاپاندا، دینجلییه ال تاپیب، اؤزونو خوشبخت بیلیر. چوخلاری خوشبخت چیلییی گونده لیك مسئله لرده راحات اولماق ایله یاشاما گؤیول وئرمكده بیلیرلر. بیزیم اونلارین دوز یوخسا یانلیش (غلط) دوشوندوك لری ایله ایشیمیز یوخدور. بیز، هر كیمسه فیكر ائدیرسه خوشبخت دیر، ان آزی (حداقل) چئوره سینه یاخشی دویغوسو (احساسی) اولاجاق دیر و هئچ كیم یوخدور خوشبخت چیلیگی راحاتجا اله گتیرسینی، بیلیریك.
بیر كیمسه نئچه ایل ایشله ییب گلیرینی ییغیب، اؤزو ایله عاییله سینه ائو یوخسا آپارتمان آلا بیلیرسه، اوندان ائوی آلاندان سونرا، سیز خوشبخت سینیزمی؟ سوروسونو سوروشساق، چوخ احتمال ایله من خوشبختم جاوابینی وئره جك. ندنی ده اونون نئچه ایل چالیشیب، زحمت چكیب، خرج لرینی آزالدیب، اؤز، ایسته یینه یئتیردیكدن سونرا، اوندا خوشبخت چیلیك دویغوسونون یارانماسیدیر.
ایندی توتالیم (فرض ائدك)، بیرینین وارلی آتاسی واردیر و آتا سینا من ائو آلماق ایسته ییرمی دئیه. آتاسی ایسه (نیز) چتینلیگه دوشمه دن اونا بیر ائو آلا، آرخایین اولون؛ او كیمسه ائو صاحابی اولماقدان موطلق یاخشی دویغوسو اولمایاجاق. بو شخص چتینلیك چكیب، دایانمادان چالیشیب، زورا دوشمه دن، ائو آلدیغی اوچون خوشبخت چیلیك دویغوسونو الده ائده بیلمز. ایشله مكده اولان لذت، راحاتچیلیقدا اولماز.
هر كیمسه آماجینا (هدفینه) یئتیرمك یوللاریندا زحمت چكیب، ایشده اولان چتینلیكلری ساهمانلاسا، ان یاخشی آرزیسینا یئتیردیكده، بو خوشبخت چیلیك دویغوسونو بیله جك، و یقین له دئیه جك: « من خوشبختم».
توركجه یه چئویرن: حسیـن واحــدیـ
قایناق: «چگونه بزرگ فكر كنیم؟» كیتابی
قیزیل چیر شلاله سی
قیزیل چیر شلاله سی
باتی آذربایجان، گؤزل ایرانیمیزین، آذربایجان بؤلگه سینده یقینن تایسیز بیر ال دیمز طبیعتینه صاحیب دیر. اوستانیمیزین قوزئی دن، گؤنئیینه كیمی یام- یاشیل باغلار و گؤیچك داغلار سیرالانیب لار. بو اوجا داغلارین شلاله لری اولاندا ایسه، دوغا (طبیعت) داها گؤزللـه نیر.
اوستانیمیزین گؤزل شهرلریندن بیری اولان، خوی شهرینده «قیزیل چیر» آدلی بیر شلاله ده بو گؤزللیك لردن بیریدیر. «قیزیل چیر» خویون 35 كیلومئترلیگینده و «بدلان» كندینین 10 كیلومئترلیگینده اورین داغینین اته گینده یئرله شیب دیر. مین لرجه گزیجی (توریست) ، بو یئری گؤرمك اوچون هر ایل بو بؤلگه یه گلیرلر. شلاله ده سویون تؤكولمه سینین اوجالیغی، سویون گوجو، اورگی آچان هاوا و تایسیز بیر دوغا بو شلاله نین اؤزللیك لریندن دیر. قوللوق ائتمك و رفاهی ایمكانلاری چوخاتماق ایله یوزده- یوز دونیانین هر یانیندان بورا قوناق گله جكدیر. بئلنچی طبیعتین حسرتین چكن چوخلو یئرلر واردیر و بیزیم طبیعت ده بئله گزملی یئرلریمیز چوخدور و قدرین بیلمه لیییك.
ایندیكی دورومدا گزه گنلیك (گردشگری) دونیاین ان چوخ گلیر گتیرن صنعت لریندن بیریدیر. بیزده اؤلكه میز ایرانین خصوصن یام- یاشیل آذربایجانین بیر بؤلگه سی اولان باتی آذربایجان، اوچ اؤلكه ایله قونشو اولدوغوندان فایدالاناراق گزیجی لری اؤز منطقه میزه چكه بیله ریك. بو یولدادا مسئوللار و كوتله میز ال- اله وئریب، دیرلیآددیم لار آتمالیدیرلار.
بو موضوع دا، خوی شهرینده اولان «قیزیل چیر» شلاله سینین مهم یئری اولا بیلر. شلاله نین گؤزللیك لریندن نه قدر دئسك آز دئمیشیك. سیز عزیز اوخوجولاریمیزیدا بو گؤزل شلاله نین باخماسینا دعوت ائدیریك و اینانیریق بو شلاله نین تانینماسیندا سیزلرده چالیشاجاقسینیز.
یازان: حسیـنـ واحـــــدیــ
تهران- مطبوعات سرگی سی / قیروو آیی
تهران- مطبوعات سرگی سی / قیروو آیی
90/8/5
بورادان اؤز میننتدارلیغیمی ارشاد اداره سی نین سوروملولارینا و بوتون منله گلن قلمداشلاریما بیلیندیریرم. اومود ائدیرم بو یولداشلیق لار داها چوخ اولسون.
او سرگی دن نئچه شكیل:
من و خانواده سبز درگی سینین مودورو
ایمام خمینی مصللاسی
باتی آذربایجانین غرفه سی
مهد آزادی نشریه سینین غرفه سی
اردبیل غرفه سی
آذربایجان ایدمانین تكجه اولان یئددیجه سی فوتبالیست ها نین غرفه سی
همشهری غرفه سی
بودا صهیونیست لر ایله بؤیوك شیطانین بایراقلاری
جام جم غرفه سی / ان شیك غرفه
گؤروش ائدنلردن موصاحیبه
دوغو آذربایجانین غرفه سی
شكیللر: حسین واحدی
چوخ بیلمیش قولو
چوخ بیلمیش
قولو
اؤزونو چوخ بیلیجی بیر اینسان بیلیردی و جمع ایچینده هانسی قونودان سؤز آچیلسایدی، یئردن – گؤیدن سؤز ییغیب اؤزونو بیلگیلی بیریسی گؤسته رردی، قوهوملار و تانیشلار گولونج اوزوندن آدینی « چوخ بیلمیش قولو» دئییردیلر!
گئییمیده چوخ ماراقلییدی، یایین لاپ ایستی گونلرینده ده، كوتونو چیخارتمازییدی و بو ایشله اؤزونو كیلاسلی و بیلیجی گؤسترمك ایسته ییردی!!
قولونون دیشلریده اؤز یئرینده دققت ائلمه لییدیلر، اونون دیشلری ایللرییدی دیش فیرچاسی (مسواك) گؤرمه میشدیلر و لاپ موزه یه قویمالییدیلار و حئسابلاسایدیلار لاپ بئله گینئس كیتابیندا یازیمالییدی! آخی بیری یوخویدو دئیه: آرواد – اوشاغییین گوناهی نمنه دی سنین او پاسلی دیشلرییین تحمل ائدیلر؟!
چوخ دانیشماغی آروادیدا دیغلاتمیشدی و قولو چوخ دانیشدیغی زامان، آرواد «قیریق رادیو قورتار» دئیه ردی! گونلرین بیرینده، بحث ائلیینده، آروادا قاییدیب «هئچ سن بیلیرسن من گونده نئچه درگی (مجله)، گونده لیك (روزنامه)، ... اوخورام؟» دئدی و آرواد ایسه « آخی قیریق رادیو نییه بیز اونلاری گؤرموروك، هاردا گیزله دیبسن؟» جاواب وئردی!
قولو : «آرواد چوخ دانیشما !، اونلار دكه لرین قیراغیندادی، من گونده ایداره دن قاییداندا، یاریم ساعات دكه لرین قاباغیندا یئریمی سالیرام» دئدی!!
ار - آروادین داعواسی، نه دئیرلر؟ بلی، عینی یازین هاواسی! قولو كیشی بیر گون ایشدن، ائوه قاییداندا، اوره یی آیران ایسته ییر و یول اوستونده بیر باققال توكانیندان دؤرد كیلو آیران آلیر.
ایندینینده آیرانلاری چوخ ایشمه لیدیرلر! آیراندان سونرا هر نه یین دادین تاپماق اولار!!
توكانچی دئیر: آغا دببه وارینیزدی؟ قولو : «ده دم دببه نی نئیلیرسن، من آیرانی بؤركومده ائله آپارارام بیر دامجی دا یئره تؤكولمز» دئدی!!
كیشی آیرانی موشامبایا تؤكنده اوره یینده « اینشاللاه تؤكولر اوستو – باشییان، اوندا بللی اولار نجور آپارارسان؟» دئییب، آیرانی قولویا وئردی!
قولو گونده كی كیمین یولو اوستونده اولان دكه دن بیلگی (معلومات) ییغماغا گئدر! آیرانیدا اوینادا – اوینادا بو الیندن او بیری الینه وئره – وئره دكه چینین یئره سردیغی نشریه لرین باشی اوستونده دورار.
ائله بیل بوگون فرقلی گوندور و بیر آز چوخ بیلگی دالیسیجادیر و درگی لری و گونده لیك لری واراقلاییردی، اورادان قاچا بیر اوغلان اوشاغینین اویونجاغی (اسباب بازی سی) آیرانین موشامباسینی ایله شیب، ییرتار، قولو اوغلانا دؤنوب باخاندا، آیران نشریه لرین چوخونون اوستونه سپیلیب ایسلادار، دكه چینین هارایی گؤیه گئدر و اوغلان اوشاغیدا آرادان یوخ اولار!
ایندی قولونون یاخاسی اوجا بویلو و قوللو – بویونلو دكه چینین الینده قالیب و گؤزلویوده (گؤزلوك =عینك) یئره دوشوب آیاقلاری آلتیندا ازیلر!
دكه چی هاوار چكیب دئیر: آخماق كیشی! سنین 500 تومنین یوخدو گونده لیییی آلیب ائوه آپاریب، آرخایینچیلیقلا اوخویاسان؟! قورخوسوندان ال – آیاغی تیتره ین قولو : « آغا گوناه او قاچان اوغلاندایدی، منی باغیشلا، هامیسینین پولون وئره جه یم» دئدی!!
دكه چی قولونو دكه نین ایچینه سالیب، آیرانلی نشریه لری آییریب، قییمتلرین چیخاردیب، قولونو ائشییه چكیب: « آخماق كیشی 10 مین تومن ائله دی، تئز پولو وئر و یوخ اول!!» دئدی.
چوخ بیلمیش قولو! هر جیبدن بیر آز چیخاردیب جریمه نی وئرر و دكه چی : « ایندی جانین راحات اولدو؟ جریمه وئردییین نشریه لر سنین دیر، گؤتور آپار ائوده اوخو!» دئییب، ایشینه گئتدی.
قولودا تؤوبه ائدیب اللری، آیاقلاریندان اوزون یولونا دوشدو، یولدا گئده – گئده، اؤز – اؤزونه : «اوجور اولار ها، 400 – 500 تومنی هر گون وئریب، گوندلییی آلیب ائوه آپاریب راحاتجا اوخوسایدید، بیر یئره ییغیشیب 10 مین تومن اولمازییدی» دئییردی!!
دئییرم نه اولار دكه لر قاباغیندا صف چكیب نشریه لره فقط باخانلارین!! هامیسینین الینده آیران اولاردی!!
یازان : حسین واحدی
آذربایجانین ادبی توپلومونا آجی خبر: «یحیی شیدا» ، تانرییا قاووشدو
یحیی شیدا تانری رحتینه گئتدی
| |
|||||
|
| |||||
اوستاد شیدا 1303-نجو گونش ایلینده تبریزین چرنداب محلله سینده دونیایا گؤز آچدی. آتاسی حسن یوزباشی چرندابی مشروطه ایله چرندابین مجاهدلریندن ساییلیردی.
او 1327-نجی ایلدن مطبوعات ایله امكداشلیغین باشلادی و بیرینجی آددیمدا «آذر مرد» نشریه سینده باش یازار اولدو.
او بیر مدت تبریزین طالبیه اوخولوندا تحصیل ائتدی و توركجه، فارسجا، آلمانجا و عربجه دیللری ایله تانیش ایدی.
اوستادین نئچه اثرلرییندن، در زوایای تاریخ "نثر"، "تلواسه ها"، قصاید، غزلیات، پسرخان (رمان)، دریای متلاطم، جنایات زن یا شاهکارهای طبیعت (در زوایای ادبیات)، ادبیات اوجاغی در 3 قابیقدا، اودلار وطنی، اودلو سؤزلر، اون جزوه، میرزا علی معجزین "یاپیلمامیش" شعر لری و بی ریانین اوره ک سوزلری-ندن آد آپارماق اولار.
تانری بو بؤیوك اینسانیمیزا رحمت ائتسین و اینشاللاه یولو داواملی اولسون.
خاطیره لر دوراغی وبلاگی بو آجی خبری تورك و فارس ادبیاتینا علاقه سی اولانلارا باش ساغلیغی دئییر.
اوشاق لار و آذربایجان ناغیل لاری
اوشاق لار و آذربایجان ناغیل لاری
هامیمیزین اوشاق لیغیندا، ناغیل خاطیره لری واردیر و بؤیوك اولدوغوموزدادا او گون لری خاطیرلایاندا گؤزل دویغوسال آن لار (لحظه لر) یاشادیریق. او دؤوراندان الوان خاطیره لریمیز قالیر و بو خاطیره لرده او زامانین ناغیل لاریندان آلینیب دیر. عیبرتلی و فایدالی ناغیل لاریمیز ایندیده قولاق لاریمیزدا سسلنمكده دیر. آمما ایندیكی اوشاق لار بئلنچی ناغیل لاردان اوزاق قالیبلار.
آتا- آنالاریمیزدان اوشاق لیق لاریندان سوروشاندا، او زامانین تندیر داملاریندان، كورسو باشیندان و ناغیل سؤیله مه لریندن دئیه جكلر و او گون لردن سؤز آچماق دا، اونلارا یاخشی لحظه لر یارادیر.
چئشیتلی ائشیتملی آذربایجان ناغیل لاری، گئتدیكجه اونودولوب گئتمكده دیر و نسیلدن نسیله گلن او عیبرتلی ناغیل لار كولتوروموزون بیر بؤلومو اولاراق، اونودولوب گئدیرسه كولتوروموزده آرادان گئده جك دیر. ایندینین اوشاق لاری باتی (غرب) اؤلكه لرین ناغیل لارینین بیر- بیر آدلارین ساییب قهرمان لارین دئییرلر و بو ایش گئتدیكجه اوشاق لا اؤز كولتورونون آراسیندا آرا آچیب اؤزگه كولتورونه یاخینلیق دویغوسونو یاراداجاق دیر.
قاباقجالار عاییله نین بؤیوك آتا یوخسا آناسی، اوشاق لاری بیر یئره ییغیب اونلارا ناغیل سؤیله ردیلر. اوشاق ایسه او ناغیل لاردا اؤزونو ناغیلین قهرمان لارینین یئرینه قویوب درین بیر خییالا جوماردی. آنجاق بو ناغیل لار اؤزوموزون ایدیلر و قهرمان لاریدا بیزیم قهرمان لارییدیلار. زیرناچی ناغیلی، پیس پیسه لی پوسته خانیم، قوردون ناغیلی، گؤزل فاتما ایله ساری اینك، تولكو ایله قارغا، یالانچی چوبان، ... و مین لرجه بئلنچی گؤزل و ائشیتملی ناغیل لاریمیز اؤز یئرلرین، بیزیم كولتوروموز ایله غریبه اولان و ساواشجیل باتی ناغیل لارینا وئریرلر.
تلویزیون ایله رادیودادا بو ناغیل لار اؤز یئرلرین ایتیریب لر و یئرلرینه یابانجی اؤلكه لرین كارتون لارین گونو گوندن داها چوخ یاییرلار. اوستانی شبكه لر بو قونودا اؤنملی رول اویناییرلار و آنا دیلیمیزده اولان ناغیل لارین كارتون لارین توركجه ده دوزلدیب اوشاق لاریمیزا گؤسترمكده كئچمیشدن قالان گؤزل ناغیل لاریمیزیدا دیری ساخلایا بیله جكلر.
آتا- آنالار ایسه بو ناغیل لار ایله تانیش اولوب اونلاری گله جك نسیل لره تاپشیرمالیدیرلار. بونلارین یانیندا اوشاق لار باخچالاری ( مهد كودك لری) داها مهم نقش ایفا ائدیرلر. اوشاقلارین چوخو اوشاق واختی بو یئره گئدیرلر و اورادا رسمی دیلیمیزین یانیندا اوشاق لارین آنا دیللرینین دیری قالماسی و كئچمیشدن قالان كولتوروموزو دیری ساخلامالیدیرلار و فایدالی و تجروبه لی آذربایجان ناغیل لارین سؤیله مكله گله جك نسیل لره بؤیوك قوللوق ائده بیلرلر.
ناغیل لاردا ایسلامی و ایرانی (هر بولگه ده اؤز دیل لرییله) كولتوروموزه یئر آییریب بو روحیه نی اوشاق لارا وئرمه لییك. ناغیل عؤمور وار كن اوشاغین ذهنینده قالیر و اوشاق اؤزون او ناغیل لار ایچینده یاشادیر. چوخلو اوشاق لار نصیحتدن قاچارلار و بونا گؤره چوخلو سؤزلری ائله بو ناغیل لارلا اوشاق لارا دئیه بیله ریك و اوشاغا نصیحتیده ناغیل عونوانیندا چاتدیرا بیله ریك.
حسین واحدی
نئچه نفر...؟
نئچه نفر...؟
اوستاد كیلاسا گیردی. هامی آیاغینا دوردو. سلام علیك دن سونرا، كیلاسداكیلاری حاضیر- غاییب ائتدی.
- سانای؟
- حاضیر- وارام!
- احمد؟
- وارام!
- ائلگون؟
- وارام!
- ارسان؟
- یوخدو!
...
اوستاد تخته ده او گونون وئره جه یی درسین، درس باشلیقلارین یازدی. درسی ایضاح ائدن زامان توركجه سوردو:نئچه نفر فارس وار؟
40 نفرین ایچیندن ایكی نفر اللرین قالدیردیلار!
و اوستاد 38 نفرین دیلین قیراغا قویوب ایكی نفرین دیلی ایله (فارسجا) درسه داوام وئردی...!!
یازان: حسین واحدی
تهران - غربی آذربایجان یئددیجه سی
تهران - غربی آذربایجان یئددیجه سسندن شكیللر
آذربایجانین بؤیوك و قهرمان اوغوللارینین غرفه سی
وئرلیشین اولان یئری
آذربایجان رقص قوروپو - اورمو قوروپو
تاریخی و اونودولمایان بیر گئجه
آشیق عسگر ساعد، آشیق بولودون اوغلو - سعد آباد - تئهران
تایسیز ساز چالما - آشیق ساعد
یانیق كرمی - آشیق ساعد
اورمو قوروپو
urmu qurupu
بؤیوك توی
böyük toy
آشیق عسگر ساعد - بؤیوك توی
unudulma gecə - Aşıq verlişi
اونودولماز گئجه - آشیق وئرلیشی
آشیق عسگرین اوشاغی
aşıq Əsgər,in uşağı
شكیللر: آینا نیوز
آذربایجان
آذربایجان
سن گونشلی بیر یاكاموزسان،
ایچیمده دؤیونن قلبیمین ایچینده سن،
سن یاغمورلو بیر بولودسان،
اولوسونا خئییر- بركت وئرن بولود.
سن اولوسونا دایاقسان،
ناموسونو قورویان یوردوم.
سن توركجه نی یاشادان یوردسان،
دیلسیز- آغیزسیز بیر دیل.
سن آناسان اوشاق لارینا،
بوتون آناسیزلیق چكن اوشاقلارا.
سن اینتئرنئت صیفه لرینین بزه یی سن،
همده لاپ او فیلتئر اولانلارین باشیندا.
هارایسیز اولوسونا اولان هارای.
سن بیزه آنا تورپاقسان،
بیزده سنی قورویان عسگر.
سن سوسما باغیر، هارای چك،
بوغولسون سنه خور باخان دوشمن.
سن یاشایان، اؤلمه ین وارلیقسان،
توم وارلیقلارین چلنگی آذربایجان.
حسین واحدی
